Overtoigi sma te yu e gi leri
1. San a wani taki fu gebroiki Gado Wortu bun na ini a diniwroko?
1 Neleki na apostel Paulus, sma di abi bun bakapisi na ini a preikiwroko e frustan taki den musu „gebroiki a wortu fu waarheid na wan reti fasi”. Disi wani taki moro leki fu kari tekst fu den Santa Buku fu Bijbel (2 Tim. 2:15). Te wi e gebroiki Gado Wortu fu gi leri, dan fa wi kan „overtoigi” sma?—Tori. 28:23.
2. Fa wi kan meki sma kisi moro lespeki gi Gado Wortu?
2 Sori san Gado Wortu e taki: Na a fosi presi, meki sma poti prakseri na Bijbel na so wan fasi taki den e kon kisi lespeki gi Bijbel èn den e kon frustan taki a koni fu Gado skrifi na ini. Te wi e taki nanga overtoigi fu Gado Wortu, dan dati kan gi den arkiman deki-ati fu arki bun te wi e leisi wan Bijbeltekst (Hebr. 4:12). Fu eksempre, wi kan taki: „Mi kisi wini di mi kon sabi fa Gado e denki fu a tori disi. Luku san en Wortu e taki.” Leisi langalanga komoto fu Gado Wortu efu yu abi na okasi fu du dati.
3. Te wi leisi wan tekst, dan san wi kan du fu yepi den arkiman fu wi fu frustan a tekst?
3 Na a di fu tu presi, fruklari san a Bijbeltekst di yu gebroiki wani taki. Furu sma feni en muilek fu frustan wan tekst te den e leisi en fu a fosi leisi. Nofo tron a de fanowdu fu tyari kon na krin fa a Bijbeltekst e horibaka gi a tori di wi e taki fu en (Luk. 24:26, 27). Poti prakseri na den moro prenspari wortu fu a tekst. Te yu e poti wan aksi, dan yu kan si efu a sma frustan san a tekst e sori.—Odo 20:5; Tori. 8:30.
4. San na a lasti sani di wi musu du fu man overtoigi sma te wi e gi leri?
4 Taki-go-taki-kon nanga yepi fu Bijbel: Na a di fu dri presi, pruberi fu doro a frustan nanga na ati fu sma. Yepi na ososma fu si fa a kan fiti a tekst na ini en libi. Te wi e taki-go-taki-kon nanga yepi fu Bijbel, dan dati kan yepi wan sma fu kenki en denki (Tori. 17:2-4; 19:8). Fu eksempre, te wi leisi Psalm 83:18, wi kan sori a sma o prenspari a de fu sabi wan sma en nen efu wi wani tron wan mati fu en. Baka dati yu kan aksi: „Yu denki taki den begi fu yu o kon moro bun te yu sabi Gado nen?” Te yu e sori na ososma fa a tekst e fiti na ini en libi, dan a kan si taki Bijbel abi bun rai. Te wi e overtoigi sma nanga yepi fu Gado Wortu, dan dati e hari reti-ati sma fu anbegi a tru èn libilibi Gado, Yehovah.—Yer. 10:10.