„Preiki finifini” fu Gado Kownukondre

1. Sortu buku wi o bigin studeri na a Gemeente Bijbelstudie na ini a wiki fu 3 september 2012?

¹ Na ini a wiki fu 3 september 2012, wi o bigin studeri a buku „Preiki finifini” fu Gado Kownukondre, na a Gemeente Bijbelstudie. A buku disi e taki fu Tori fu den apostel na so wan fasi taki a leisiman man si den span sani di skrifi na ini. Na presi fu taki fu ibri vers, a Preiki-buku e sori wi san wi kan leri fu a buku Tori fu den apostel èn a e yepi wi fu si fa wisrefi kan du den sani di wi leri.​—Rom. 15:4.

2. San na wan tu moi sani fu a Preiki-buku?

² Wan tu moi sani fu a buku: Den biginwortu na bladzijde 2 na wan moi brifi fu a Tiri Skin di e sori fa den wani taki wi musu kisi wini fu a buku disi. Bigin nanga kapitel 2, wan tu wortu skrifi di e sori san na den prenspari sani na ini a kapitel dati. Wan tekst skrifi tu fu sori fu sortu pisi fu Tori fu den apostel wi o taki. Furu fu den kapitel abi faki di e taki fu moi sani. Wan tu fu den faki e fruteri moro fu den sma, a presi pe den sani ben pasa, noso fu den tori di skrifi na ini a buku Tori fu den apostel. Den bradi pisi na a lanki fu den bladzijde e gi yu okasi fu skrifi wan tu sani te yu e studeri. Na ini a buku moi prenki de di e sori fa sani ben de na ini Bijbel ten. Disi sa yepi wi fu frustan moro bun san ben pasa. Na a lasti bladzijde den skrifi san den difrenti prenki e sori. Na a inisei fu a fesisei kafti nanga a bakasei kafti, karta de di e sori wi pe den anbegiman fu a fosi yarihondro ben e go fu preiki a bun nyunsu „te na den moro farawe presi fu grontapu”.​—Tori 1:8.

3. Fu sortu prenspari aksi wi o taki te wi o studeri Tori fu den apostel?

³ Piki tapu prenspari aksi: Te wi e luku Tori fu den apostel, dan dati o yepi wi fu sabi den piki tapu prenspari aksi di abi fu du nanga wi Kresten diniwroko. Fu eksempre: Sortu wroko den trutru bakaman fu Yesus Krestes ben o du èn san na a boskopu di den ben o tyari gi sma? Suma e teki fesi fu du a preikiwroko na heri grontapu, èn fa den e du dati? Sortu okasi preikiman abi te den kisi frufolgu nanga gens? Fa a santa yeye e yepi wi na ini wi diniwroko?

4. Fa wi kan kisi wini te wi e studeri a buku disi?

⁴ Fu man kisi wini fu a Gemeente Bijbelstudie, dan studeri den tori na fesi èn sreka yusrefi fu gi piki na a konmakandra. De na ibri konmakandra, èn prakseri fa yu kan gebroiki den sani di yu leri na ini yu diniwroko. Meki a de so taki te wi e luku a span buku disi, a sa gi wi deki-ati fu preiki finifini fu Gado Kownukondre!​—Tori 28:23.