Sreka sani now fu du moro na ini preikiwroko
1. Fu san ede a ten fu a Memrefesa prenspari, èn fa wi kan sreka sani gi a ten dati?
1 Na ini a pisi ten te a Memrefesa e kon krosibei, wi e kisi na okasi fu „prèise Yehovah ala ten baka” (Ps. 109:30). Wi kan sori warderi gi Gado di sorgu taki a lusu-paiman pai gi wi, te wi o du moro na ini a preikiwroko na ini maart. Yu o sori warderi tu na a fasi dati? Now na a ten fu bigin sreka sani fu du moro.—Odo 21:5.
2. Fa yu ben feni a nyun seti gi yepipionier di ben kan wroko 30 yuru na ini april a yari di pasa, èn fa tra sma ben feni en?
2 A yepi-pionierwroko: A yari di pasa den gemeente ben breiti srefisrefi fu yere taki preikiman kan wroko 30 yuru na ini a yepi-pionierwroko na ini april. Wan brada ben skrifi: „Mi de na middelbaar skoro ete, èn a muilek srefisrefi gi mi fu go na ini a gewoon pionierwroko. Ma mi o poti mi nen fu wroko den 30 yuru èn na ini april mi o du muiti fu wroko den 50 yuru.” Wan sisa di e wroko heri wiki ben skrifi: „Dritenti yuru mi man doro seiker!” Di den brada meki bekènti taki a sani disi ben seti, wan sisa di ben pionier fosi èn di pasa 80 yari now, ben taki: „Na disi mi ben e wakti! Yehovah sabi taki a pionierwroko ben de a moro bun sani na ini mi libi!” Trawan di no ben man go na ini a yepi-pionierwroko ben seti sani fu du moro na ini a preikiwroko.
3. Fu san ede a bun fu luku efu wi kan go na ini a yepi-pionierwroko na ini maart, april, nanga mei?
3 Maart o de wan bun mun fu go na ini a yepi-pionierwroko fu di wi o abi na okasi baka fu wroko 30 yuru noso 50 yuru. Boiti dati, bigin nanga satra 17 maart, wi o teki prati na wan spesrutu kotoigiwroko fu gi sma wan kari fu kon nanga wi na a Memrefesa tapu 5 april. Furu sma di o du moro na ini a preikiwroko, lobi disi so te taki den o wani go na ini a yepi-pionierwroko na ini april nanga mei tu te den o wroko 50 yuru.
4. Fa wi kan du moro na ini a preikiwroko, èn san o de a bakapisi?
4 A tra leisi te yu o hori na Osofamiri Anbegi fu yu, dan yu kan taki nanga yu osofamiri fa ibri memre kan du moro na ini a preikiwroko na a ten fu a Memrefesa (Odo 15:22). Aksi Yehovah fu blesi a muiti di yu e du (1 Yoh. 3:22). Te yu o du moro na ini a preikiwroko, dan yu o prèise Yehovah moro èn yu o abi moro prisiri tu.—2 Kor. 9:6.