Ondrofenitori fu a Jaarboek 2013
No misi den Kresten konmakandra
Baka a feti fu 1988, na ekonomia fu Birma kon moro ogri. Aladi dati ben pasa, toku den brada nanga sisa ben bribi tranga na ini Gado, fu di den poti Kownukondre afersi na a fosi presi na ini den libi.—Mat. 6:33.
Luku na eksempre fu Cin Khan Dal, di ben tan nanga en famiri na wan dorpu di de farawe na ini Sagaing. A e taki: „Wi ben wani go na a distrikt kongres na ini Tahan, ma a e teki tu dei fu go nanga boto noso truck. Ma nowan sma ben o luku den fowru fu wi efu wi no ben o de na oso. Toku wi poti ala wi frutrow na tapu Yehovah èn wi go na a kongres. Di wi doro oso, wi lasi 19 fowru. Na so wi lasi furu moni. Furu fowru no ben tan abra, ma baka wán yari wi ben abi moro leki 60 fowru. Aladi furu fowru fu den sma na ini a dorpu kon dede a yari dati fu di den ben siki, toku nowan fowru fu wi dede.”
Wan tra trowpaar di ben tan frutrow na tapu Yehovah, ben de Aung Tin Nyunt nanga en wefi Nyein My. Den nanga den neigi pikin fu den ben e libi na ini Kyonsha, wan pikin dorpu di ben de 64 kilometer noordsei fu Yangon. Aung Tin Nyunt e taki: „Na osofamiri fu wi ben gwenti nyan aleisi papa nanga gruntu. Aladi wi no ben abi moni èn noti fu seri, toku wi no ben brokosaka. Mi taigi mi osofamiri: ’Yesus no ben abi wan presi fu sribi. Sobun awinsi mi musu tan na ondro wan bon, noso dede fu angri, toku mi o tan dini Gado.’
„Ma wan dei wi no ben abi notinoti fu nyan. Mi ben kan si taki mi wefi nanga den pikin fu mi ben broko den ede. Mi taigi den taki den no abi fu broko den ede, fu di Gado o yepi wi. Baka di wi komoto na a preikiwroko a mamanten dati, mi nanga den boi fu mi go uku. Ma den fisi di wi kisi ben sari fu nyan wán leisi nomo. Wi libi den baskita fu wi na ini a liba, sei wan tu Leilibromki. Mi taigi den boi: ’Baka a konmakandra wi o kon baka.’ A bakadina dati, winti ben wai tranga. Di wi doro drape, wi si taki furu fisi ben kibri gi a tranga winti na ondro den Leilibromki. Wi saka den baskita fu wi na ini a watra èn wi kisi furu fisi di wi seri fu bai nyanyan gi wan heri wiki.”
Ibri leisi baka, den futuboi fu Yehovah na ini Mianmar si taki Yehovah e du san a pramisi: „Mi no o libi yu kwetikweti èn noiti mi o gowe fu yu.” Dati meki den e taki: „Yehovah na mi yepiman. Mi no o frede. San libisma kan du mi?”—Hebr. 13:5, 6.