Gebroiki jw.org na ini a preikiwroko​—„Tron wan mati fu Yehovah”

A faki di nen „Buku nanga tra sani” tapu a Sranantongo jw.org website abi wan faki di nen Felem. Drape yu kan feni singi nanga syatu felem gi pikin-nengre. Yu e sori sma a faki disi te yu e preiki? Wi no abi furu fu den sani disi na ini Sranantongo, ma wi kan gebroiki den wan na ini Bakratongo tu. Efu yu e studeri nanga wan sma di abi pikin-nengre, dan yu kan sori en den sani disi tapu jw.org. A sani disi kan meki taki a o go luku san de na den tra faki fu wi website.

Di wan brada ben e prati Kownukondre Nyunsu nr. 38, dan a miti wan uma di bigin leisi a traktaat wantewante. Na uma ben abi wan tu yongu pikin di ben wani sabi san skrifi na ini a traktaat. A brada fruteri syatu san de na ini a traktaat èn a sori na adres fu a website na bakasei fu a traktaat. Fu di na uma ben wani sabi moro, meki a brada gebroiki en cel fu prei wan fu den felem fu Kaleb gi en nanga den pikin.

Wan sisa fruteri wan uma na en wrokope di abi yongu pikin, taki a website fu wi abi sani gi osofamiri. Na uma nanga den pikin fu en go luku tapu jw.org. Bakaten a taigi a sisa taki den pikin fu en ben waka lontu na oso èn taki den ben e singi „Breng het Woord” (Preiki a wortu), wan fu den singi fu „Tron wan mati fu Yehovah”.

A bun fu kon sabi a faki disi fu jw.org èn fu download wan fu den felem, singi noso tra sani tapu yu cel noso tablet. Te yu du dati, dan yu o de srekasreka fu gebroiki a faki disi fu jw.org na ini a preikiwroko. A jw. org website e yepi wi trutru fu wroko leki srafu gi Masra.​—Tori 20:19