Gebroiki a website fu wi na ini a preikiwroko fu gi piki tapu aksi fu Bijbel

Tapu jw.org yu abi wan pisi di nen „Buku nanga tra sani”. Drape yu kan feni a brochure Gado abi bun nyunsu gi wi! Ibri les na ini a brochure disi abi wan tu aksi di e kisi piki na ini a paragraaf na en ondro. Efu wi man memre wan tu fu den aksi disi di sma gwenti poti èn di de fu feni tapu a website, dan wi kan gebroiki den fu bigin wan takimakandra na ini a preikiwroko. Fa wi kan du dati? Poti wan fu den aksi di kan hari a prakseri fu a sma. Gi en na okasi fu taki fa a e denki fu a tori èn taigi en san Bijbel e taki. Baka dati wi kan taigi en pe wi feni a piki, noso wi kan sori en dati na tapu a website. Wan tra sani di wi kan du, na fu meki na ososma leisi a piki langalanga fu a website. Kande yu kan taki: „Furu sma e aksi densrefi efu Gado e arki ala begi. Yu wani sabi efu dati de so? Mi wani sori yu dati na ini wán miniti nomo.” Baka dati yu kan meki a sma leisi a piki na ini les 12, paragraaf 1 fu a Bun nyunsu-brochure di yu kan download na tapu yu cel noso tablet. Na a kaba fu a takimakandra yu kan sori a sma kapitel 17 fu a Bijbel leri-buku.