MWBR18 07 Verwijzing gi Wi Kresten libi nanga a preikiwroko studie-buku

2-8 YULI

GUDU NA INI GADO WORTU | LUKAS 6, 7

„Libi bun nanga trawan”

(Lukas 6:37) Sosrefi, no krutu sma moro, dan Gado no sa krutu unu. No suku fowtu na sma moro, dan Gado no sa suku fowtu na unu. Tan gi sma pardon, dan unu sa kisi pardon tu.

nwtsty ete wan tu sani na Lu 6:37

Tan gi sma pardon, dan unu sa kisi pardon tu: A Griki wortu di vertaal dyaso nanga „gi pardon” wani taki „lusu wan sma, seni wan sma gowe, noso fri wan sma (fu eksempre, wan strafuman)”. Te sma e gebroiki den wortu disi fu sori taki den no o krutu noso strafu wan trawan, soleki fa wi e si na ini a tekst disi, dan dati wani taki dati den gi a sma dati pardon, srefi te trawan ben kan feni taki a sma musu kisi strafu.

(Lukas 6:38) Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e libi nanga trawan, na a fasi dati den sa libi nanga unu tu.”

nwtsty ete wan tu sani na Lu 6:38

Abi a gwenti fu gi sma sani: Noso „tan gi sma sani”. A Griki wortu di den gebroiki dyaso kan vertaal nanga a wortu „gi” èn a wani taki dati wan sma e tan du a sani dati.

(Lukas 6:38) Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e libi nanga trawan, na a fasi dati den sa libi nanga unu tu.”

nwtsty ete wan tu sani na Lu 6:38

a saka fu un krosi: A Griki wortu wani taki „yu borsu”, ma na ini a tekst disi a abi fu du nanga a fow di sma ben e meki na ini a bradi tapusei krosi fu den. Den ben e tai a krosi so taki a ben e tron wan saka di den ben e gebroiki fu tyari sani na ini. Den wortu „kanti en poti na ini a saka fu un krosi”, abi fu du nanga a gwenti di son seriman ben abi fu lai den sani di sma ben bai na den, na ini a saka disi.

Diki moro dipi

(Lukas 7:35) Iya, na den bun sani di wan sma e du, e sori taki a koni.”

nwtsty ete wan tu sani na Lu 7:35

den bun sani di wan sma e du: Den bun sani di Yohanes nanga Yesus ben e du e sori taki den sma no ben abi leti fu krutu den. Te yu luku en bun, Yesus e taki: ’Luku den bun di wi e du èn a fasi fa wi e tyari wisrefi, dan yu o si taki den sani di unu e taki fu wi no tru.’

9-15 YULI

GUDU NA INI GADO WORTU | LUKAS 8, 9

„San wi musu du fu man tron wan bakaman fu Yesus?”

(Lukas 9:57, 58) Di den ben de na pasi, wan sma taigi en: „Mi sa waka na yu baka, awansi pe yu e go.” ⁵⁸ Ne Yesus taigi en: „Krabudagu abi olo pe den e tan èn den fowru di e frei na loktu abi nesi, ma a Manpikin fu libisma no abi nowan presi fu sribi.”

it-2-O 430, 431

Nesi

Di wan fu den leriman fu wet taigi Yesus: „Leriman, mi sa waka na yu baka awansi pe yu e go”, dan Yesus piki en: „Krabudagu abi olo pe den e tan èn den fowru di e frei na loktu abi nesi, ma a Manpikin fu libisma no abi nowan presi fu sribi” (Mt 8:19, 20; Lu 9:57, 58). Dyaso Yesus e sori a man taki efu a ben wani tron wan bakaman fu en, a no ben musu suku moro fu abi a switi libi di furu sma ben abi, èn taki a ben musu frutrow tapu Yehovah nanga en heri ati. Na a prenspari sani disi Yesus leri den bakaman fu en na ini a Wi Tata begi. A ben taki: „Gi wi a brede di wi abi fanowdu gi a dei disi.” A ben taki tu: „Sobun, yu kan sabi taki nowan fu unu kan de wan disipel fu mi efu a no e libi den sani di a abi.”​—Mt 6:11; Lu 14:33.

(Lukas 9:59, 60) Baka dati, a taigi wan tra sma: „Tron wan bakaman fu mi.” A man taki: „Gi mi na okasi fosi fu go beri mi papa.” ⁶⁰ Ma a taigi a man: „Meki den dedewan beri den dedewan fu den, ma yu musu go fruteri sma fu Gado Kownukondre na ala sei.”

nwtsty ete wan tu sani na Lu 9:59, 60

beri mi papa: Soleki fa a sori, den wortu disi no wani taki dati a man en papa ben dede èn taki a ben e aksi Yesus fu gi en na okasi fu go seti sani fu beri en. Efu a man en papa ben dede trutru, dan a no ben o de drape fu taki nanga Yesus. Na ini owruten den sma fu den kondre na ini a kontren pe Israel de, ben abi a gwenti fu beri wan sma esi-esi baka te a ben dede. Nofo tron den ben e du dati na a srefi dei. Sobun, a kan taki a papa fu a man disi ben e siki, noso kande a ben kon owru kaba. Ma a no ben dede ete. Boiti dati, Yesus no ben o taigi a man fu gowe libi en siki papa di ben abi yepi fanowdu. Dati meki, a ben musu fu de so taki a ben abi tra famiriman di ben o man sorgu gi a papa (Mr 7:9-13). Te yu luku en bun a man ben taki: ’Mi no o man waka na yu baka, solanga mi papa de na libi. Wakti teleki mi papa dede èn mi beri en.’ Ma Yesus ben feni taki a man disi no ben e teki na okasi fu poti den afersi fu Gado Kownukondre na a fosi presi na ini en libi.​—Lu 9:60, 62.

Meki den dedewan beri den dedewan fu den: Soleki fa wi si na „ete wan tu sani” na Lu 9:59, dan a kan taki a papa fu a man di Yesus ben e taki nanga en ben e siki noso kande a ben owru kaba, ma a no ben dede ete. Soleki fa a sori, Yesus ben wani taigi en: ’Meki den wan di no de mati fu Gado, beri den dedewan fu den.’ Sobun, a man no ben musu draidrai fu teki a bosroiti fu waka baka Yesus, fu di a kan taki a ben abi famiriman di ben kan sorgu gi en papa teleki a dede. Te a man disi ben o waka baka Yesus, dan a ben o de tapu a pasi di e tyari sma go na têgo libi. A no ben o de wan sma di ben o dede te fu kaba, fu di a no de wan mati fu Gado. A piki fu Yesus e sori taki efu wan sma wani tan abi wan bun matifasi nanga Gado, a musu poti Gado Kownukondre na a fosi presi na ini en libi èn a musu preiki fu en na ala sei.

(Lukas 9:61, 62) Wan tra sma taigi en: „Masra, mi o waka na yu baka, ma gi mi na okasi fosi fu taki den sma na ini mi oso adyosi.” ⁶² Yesus taigi en: „Efu wan sma e bigin plugu a gron èn a e luku go na den sani di de na en baka, dan a sma dati no fiti gi a Kownukondre fu Gado.”

nwtsty fowtow

Plugu a gron

Furu sma ben e plugu gron na a pisi ten fu a yari te alen ben e bigin fadon baka. Den alen disi ben e safu a gron di ben kon tranga fu di a son ben skèin so faya na ini den mun na fesi. (Luku sgd Pisi 19.) Sonwan fu den plugu disi ben abi wan srapu pisi udu di ben abi wan isri penti son leisi. A pisi udu disi ben fasi na wan postu di wán noso moro meti ben e hari. Baka te sma ben plugu a gron, dan den ben e sai siri. Den Hebrew buku fu Bijbel abi furu agersitori di e taki fu a gwenti di sma ben abi fu plugu gron (Kru 14:18; Yes 2:4; Yer 4:3; Mik 4:3). Yesus ben gwenti gebroiki agersitori di ben abi fu du nanga gronwroko, fu leri sma prenspari sani. Fu eksempre, a ben taki fu a tranga wroko di sma ben musu du te den ben e plugu a gron, fu sori o prenspari a de taki wan disipel e du en wroko nanga en heri ati (Lu 9:62). Efu wan sani ben hari a prakseri fu a sma di ben e plugu a gron, dan a ben kan meki gotro di kron. Na so a de tu taki wan bakaman fu Krestes di e meki sani puru en prakseri na den frantwortu di a abi, kan lasi a grani fu libi na ondro a tiri fu Gado Kownukondre.

Diki moro dipi

(Lukas 8:3) Sosrefi Yohana, a wefi fu Kusa di ben de a fesiman fu Herodes oso, nanga Susana, èn furu tra uma di gebroiki den sani fu den fu sorgu Yesus nanga den disipel fu en.

nwtsty ete wan tu sani na Lu 8:3

fu sorgu Yesus nanga den disipel fu en: Noso „fu horibaka gi den”. A Griki wortu diakoneo kan abi fu du nanga a sorgu di wan sma e sorgu gi wan trawan. Kande a sma e bori gi en, kande a e gi en nyanyan, nanga den sortu sani dati. Dati na san a wortu disi wani taki tu na Lu 10:40 („du ala sani”), Lu 12:37 (’gi nyanyan’), Lu 17:8 („tyari sani kon”), nanga Tor 6:2 („prati nyanyan”). Ma a kan abi fu du tu nanga ala tra sani di wan sma e du fu yepi wan trawan. Na ini vers 2 nanga 3 a wortu diakoneo e sori fa den uma di kari drape ben e horibaka gi Yesus nanga den bakaman fu en, so taki den ben man klari a wroko di Gado ben gi den. Na so den uma disi gi Gado glori èn Gado ben breiti nanga den. Dati meki a sorgu taki sma skrifi na ini Bijbel fa den uma disi ben lobi du bun gi trawan so taki ala sma di ben o libi bakaten ben kan leisi fu den (Odo 19:17; Heb 6:10). Bijbel e gebroiki a srefi Griki wortu disi te a e taki fu umasma na Mt 27:55 nanga Mr 15:41.

16-22 YULI

GUDU NA INI GADO WORTU | LUKAS 10, 11

„Na agersitori fu a Samaria man di ben du bun gi wan trawan”

(Lukas 10:29-32) Ma fu di a man ben wani sori taki a bun, meki a taigi Yesus: „Suma na den tra sma di mi musu lobi?” ³⁰ Yesus piki en: „Wan man ben saka komoto fu Yerusalem go na Yerikow, di fufuruman ròs en. Den puru en krosi na en skin èn den fon en te fu dede, dan den gowe libi en drape. ³¹ We, na so a pasa now taki wan priester ben e waka a pasi dati, ma di a si a man, a waka pasa na abrasei. ³² A srefi sani wan Leifisma du tu. Di a doro drape èn a si a man, dan a waka pasa na abrasei.

nwtsty felem

A pasi fu Yerusalem go na Yerikow

A pasi (1) di yu e si na ini a syatu felem disi na wan srefi sortu pasi leki a wan di ben e saka fu Yerusalem go na Yerikow na ini owruten. A pasi ben langa moro leki 20 kilometer èn Yerusalem ben hei 1 kilometer moro Yerikow. Fufuruman ben gwenti ròs sma na ini a kontren drape pe sma no ben e kon makriki. Dati meki a ben de fanowdu taki den poti wan grupu srudati drape fu kibri den sma di ben e waka pasa na ini a kontren dati. A foto Yerikow fu den Romesma (2) ben de te na a lanki fu Yudea-sabana. A moro owru foto Yerikow (3) ben de sowan 2 kilometer moro fara fu a foto Yerikow fu den Romesma.

(Lukas 10:33-35) Ma wan Samariasma di ben waka a pasi dati, kon si a man èn a firi sari gi en. ³⁴ Dati meki a go na a man, a tai den soro fu en, dan a kanti oli nanga win na tapu den soro. Baka dati, a poti a man na tapu en eigi buriki èn a tyari en go na wan presi pe sma e yuru kamra èn a sorgu a man. ³⁵ A tamara fu en a teki tu solfru moni, dan a gi dati na a sma di ben abi a presi èn a taigi en: ’Sorgu gi a man èn efu yu gebroiki moro moni leki san mi gi yu, dan mi o pai yu dati te mi drai kon baka.’

nwtsty ete wan tu sani na Lu 10:33, 34

wan Samariasma: Den Dyu ben gwenti wisiwasi den Samariasma èn den no ben wani bumui nanga den srefisrefi (Yoh 4:9). Son Dyu ben e gebroiki a wortu „Samariasma” srefi fu sori fa den ben e tegu gi wan sma noso gi wan sani (Yoh 8:48). Na ini a Misjna, wan Dyu leriman e taki: „Wan sma di e nyan brede fu den Samariasma, na a srefi leki wan sma di e nyan agu meti” (Shebith 8:10). Te Samariasma ben e fruteri wan sani di ben pasa, dan furu Dyu no ben e bribi den èn den no ben wani taki den du wan bun gi den. Yesus ben sabi fa den Dyu ben e teige den Samariasma. Dati meki a gebroiki na agersitori fu a Samaria man di ben du bun gi wan trawan, fu leri den wan prenspari sani.

tai den soro fu en, kanti oli nanga win na tapu den soro: Dyaso Lukas di ben de wan datra, skrifi finifini san Yesus ben taki na ini na agersitori fu en. Lukas e fruteri fa sma fu a ten dati ben e dresi soro. Den ben gwenti gebroiki oli nanga win gi soro. Den ben e poti oli gi den soro fu dresi den soro (luku Yes 1:6), èn den ben e gebroiki win fu krin den. Lukas e futeri tu fa den ben e tai den soro fu sorgu taki den no ben e kon moro bigi.

wan presi pe sma e yuru kamra: A Griki wortu wani taki „wan presi pe den e teki ala sma noso pe ala sma kan go tan”. Sma di ben e teki waka go na wan presi makandra nanga den meti fu den ben kan tan sribi na den sortu presi disi. A sma di ben abi a presi ben e sorgu gi den moro prenspari sani di den fisitiman ben abi fanowdu. Ma den fisitiman ben kan pai en tu fu sorgu gi wan sma di den ben libi drape.

Diki moro dipi

(Lukas 10:18) Dan a taigi den: „Mi si fa Satan fadon kaba neleki faya di e koti na hemel.

nwtsty ete wan tu sani na Lu 10:18

Mi si fa Satan fadon kaba neleki faya di e koti na hemel: Yesus ben taki a sani disi fu di a ben man si kaba san ben o pasa nanga Satan. Gi en, a ben de leki den ben fringi en komoto na hemel kaba. Opb 12:7-9 e taki dati di a Mesias Kownukondre seti, wan feti broko na hemel èn taki Satan lasi a feti dati. Na ini Lukas 10:18 Yesus sori taki a ben de seiker taki Satan nanga den ogri yeye fu en ben o lasi a feti di ben o feti bakaten, fu di Gado ben gi den 70 disipel fu Yesus a makti fu puru ogri yeye na sma tapu, aladi den ben de sondusma.​—Lu 10:17.

(Lukas 11:5-9) A taigi den sosrefi: „Kon meki wi taki dati wan fu unu abi wan mati èn a go na en na mindrineti, dan a taigi en: ’Mati, leni mi dri brede, ⁶ bika didyonsro wan mati fu mi komoto na wan presi kon na mi èn mi no abi noti fu gi en.’ ⁷ Dan a sma di de na inisei piki en: ’No trobi mi. A doro sroto kaba, èn mi nanga den yongu pikin fu mi e sribi. Mi no man opo fu gi yu wan sani.’ ⁸ Mi e taigi unu: Srefi efu a sma no wani opo fu gi en wan sani fu di na en mati, toku a o gi en san a abi fanowdu fu di a e tan aksi en nomonomo. ⁹ Fu dati ede mi e taigi unu: Tan aksi, dan unu sa kisi. Tan suku, dan unu sa feni. Tan naki na tapu a doro, dan a doro sa opo gi unu.

nwtsty ete wan tu sani na Lu 11:5-9

Mati, leni mi dri brede: Na ini den kondre na ini a kontren fu Israel, sma ben gwenti du ala san den man fu sori switifasi gi trawan, soleki fa na agersitori disi e sori. Den ben e si a sani dati leki wan plekti. Aladi a fisitiman doro mindrineti, toku na ososma ben e si en leki en plekti fu gi a fisitiman wan sani fu nyanyan. Taki a sma doro mindrineti, e sori taki furu tron sma no ben sabi na fesi o lati den ben o doro na wan presi. Dati meki na ososma ben kan feni en fanowdu srefi fu wiki en mati na a yuru dati fu suku nyanyan gi a fisitiman fu en.

No trobi mi: A sma na ini na agersitori disi no ben wani yepi a mati fu en. A no fu di a no ben abi switifasi, ma na fu di a ben go didon kaba. Na ini a ten dati furu oso, spesrutu den wan fu den pôtisma, ben abi soso wán bigi kamra. Efu a man ben o opo, dan a ben kan wiki a heri osofamiri, sosrefi den pikin.

tan aksi en nomonomo: A Griki wortu di gebroiki dyaso wani taki „sondro syen”. Ma na ini den tekst disi den e sori taki a sma no ben frede fu tan aksi a trawan fu yepi en. A man na ini na agersitori fu Yesus no e syen èn a no e frede fu tan aksi en mati fu gi en san a abi fanowdu. Yesus e taigi den bakaman fu en taki na so den musu tan begi.​—Lu 11:9, 10.

23-29 YULI

GUDU NA INI GADO WORTU | LUKAS 12, 13

„Unu warti moro leki furu pikin fowru”

(Lukas 12:6) A no de so, taki sma e seri feifi pikin fowru gi tu sensi di no warti furu? Toku Gado no e frigiti nowan fu den.

nwtsty ete wan tu sani na Lu 12:6

pikin fowru: A Griki wortu strowtion wani taki „iniwan pikin fowru”. Ma nofo tro a abi fu du nanga a fowru di sma e kari huismus. A ben de a moro bunkopu fowru di sma ben kan bai fu nyan.

(Lukas 12:7) Srefi ala den wiwiri na un ede a teri. No frede, unu warti moro leki furu pikin fowru.

nwtsty ete wan tu sani na Lu 12:7

srefi ala den wiwiri na un ede a teri: Soleki fa a sori, dan wan libisma abi moro leki 100.000 wiwiri na tapu en ede. Efu Yehovah sabi srefi den pikinpikin sani dati, dan wi kan de seiker taki a e broko en ede nanga ibriwan fu den bakaman fu Krestes.

Diki moro dipi

(Lukas 13:24) „Du ala muiti fu pasa a smara doro go na inisei, bika mi e taigi unu taki furu sma o pruberi fu go na inisei, ma den no sa man go.

nwtsty ete wan tu sani na Lu 13:24

Du ala muiti: Noso „tan feti”. A rai di Yesus e gi dyaso e sori taki a prenspari fu du ala san wi man fu pasa a smara doro go na inisei. Difrenti buku e vertaal den wortu disi nanga „du tranga muiti, du ala san yu man”. A Griki wortu agonisomai abi fu du nanga wan tra Griki wortu agon, di sma ben gebroiki furu tron te den ben e taki fu sportman di ben e strei nanga makandra. Heb 12:1 e gebroiki a wortu disi gi a „streilon” di Kresten e lon fu man kisi têgo libi. A wortu disi abi fu du tu nanga wan „strei” (Kol 2:1) noso wan „feti” (1Ti 6:12; 2Ti 4:7). Tra Griki wortu di komoto fu a wortu agonisomai, vertaal nanga „teki prati na wan strei” (1Kor 9:25), „meki ala muiti” (Kol 1:29), „du bun furu muiti” (1Ti 4:10), nanga „feti” (1Ti 6:12). Fu di sma ben gwenti gebroiki den wortu disi te den ben e taki fu sportman di ben e strei nanga makandra, meki son sma e denki taki Yesus e gi wi deki-ati fu du tranga muiti, neleki fa sportman e du ala muiti fu man wini a prijs.

(Lukas 13:33) Ma tide, tamara, nanga tra tamara mi musu go moro fara, bika a no fiti fu kiri wan profeiti dorosei fu Yerusalem.

nwtsty ete wan tu sani na Lu 13:33

a no fiti: Noso „a no kan”. Aladi nowan Bijbel profeititori e sori krin taki a Mesisas ben o dede na Yerusalem, toku na dati wi e frustan te wi leisi san skrifi na Da 9:24-26. Boiti dati, efu den Dyu ben o kiri wan profeiti, spesrutu a Mesias, dan a no de fu taki dati den ben o du en na ini Yerusalem. Den 71 memre fu a Sanhedrin, a Grankrutu fu den Dyu, ben e kon makandra na Yerusalem. Sobun, na drape den ben o krutu den sma di trawan ben e si leki falsi profeiti. Kande Yesus ben hori na prakseri tu taki sma ben e tyari ofrandi gi Gado na Yerusalem èn taki na drape den ben e srakti a Paska-ofrandi. Awinsi fa a no fa, den wortu fu Yesus kon tru. Sma tyari en go na fesi a Sanhedrin na ini Yerusalem èn den krutu en. Èn a dede na ini Yerusalem leki a „Paska-ofrandi”, leti na dorosei fu a foto.​—1Kor 5:7.

30 YULI–5 AUGUSTUS

GUDU NA INI GADO WORTU | LUKAS 14-16

„Na agersitori fu a lasi manpikin”

(Lukas 15:11-16) Baka dati a taki: „Wan man ben abi tu manpikin. ¹² A moro yonguwan fu den taigi en papa: ’Mi papa, gi mi a pisi fu a gudu di mi musu kisi.’ Ne a papa prati a gudu fu en gi den manpikin. ¹³ Wan tu dei baka dati, a moro yonguwan teki ala en sani, dan a go na wan farawe kondre èn drape a frumorsu en gudu, fu di a ben libi wan yayolibi. ¹⁴ Di a frumorsu ala sani, wan hebi angriten kon na ini a heri kondre dati èn a bigin pina. ¹⁵ A go wroko srefi gi wan sma fu a kondre dati. A sma seni en go luku agu na ini den gron fu en. ¹⁶ Angri ben kiri en so te, taki a ben lostu a nyanyan fu den agu srefi, ma nowan sma ben gi en wan sani.

nwtsty ete wan tu sani na Lu 15:11-16

Wan man ben abi tu manpikin: Na ini na agersitori fu a lasi manpikin, Yesus e taki fu wan tu sani di wi no e si na ini tra agersitori. Disi na wan fu den moro langa agersitori di a fruteri. Na ini na agersitori disi Yesus e taki fu a libi fu sma na ini wan osofamiri. Na ini tra agersitori Yesus e taki furu tron fu sani soleki difrenti sortu siri noso gron, noso fu a fasi fa wan basi e libi nanga den srafu fu en (Mt 13:18-30; 25:14-30; Lu 19:12-27). Ma na ini na agersitori disi, Yesus e poti prakseri na a lobi di wan papa abi gi den manpikin fu en. Kande furu sma di e yere a tori disi no ben abi so wan lobi-ati papa. Na agersitori disi e sori o furu lobi nanga sari-ati wi hemel Tata abi gi den pikin fu en na grontapu, gi den wan di tan na en èn gi den wan di ben gowe libi en, ma di drai kon baka na en.

a moro yonguwan: A wet di Gado ben gi Moses ben e taki dati a fosi manpikin ben musu kisi tu tron moro furu fu a famirigudu leki san den tra manpikin ben o kisi (De 21:17). Sobun, efu a moro owru manpikin na ini na agersitori ben de a fosi manpikin, dan dati wani taki dati a moro yongu manpikin ben o kisi afu fu san en bigi brada ben o kisi.

frumorsu: A Griki wortu di gebroiki dyaso wani taki „fu panya go na ala sei” (Lu 1:51; Tor 5:37). Na Mt 25:24, 26, a vertaal nanga „wai (aleisi)”. Ma dyaso na Lukas 15, a wani taki dati wan sma e frumorsu sani noso taki a e gebroiki sani na wan don fasi.

wan yayolibi: Noso „wan (bruya) libi pe sma e frumorsu sani”. Na Ef 5:18 wi e feni wan Griki wortu di wani taki a srefi sani.

luku agu: A Wet ben taki dati den meti disi no ben krin. Dati meki a ben de wan syen taki wan Dyu ben musu du so wan lagi wroko.​—Le 11:7, 8.

a nyanyan fu den agu: A nyanyan fu den agu ben de bonki di ben abi wan tai dungru redi buba. A Griki nen fu den bonki disi na keration, san wani taki „pikin tutu”. A nen disi fiti fu di den bonki disi gersi tutu. Te na a dei fu tide sma e gebroiki den bonki disi leki nyanyan gi asi, kaw nanga agu. Te yu e luku taki a lasi manpikin ben e angri fu nyan a nyanyan fu den agu, dan yu kan frustan taki a ben saka gowe bun dipi.​—Luku ete wan tu sani na Lu 15:15.

(Lukas 15:17-24) Di a kisi ensrefi, a taki: ’Den wrokoman fu mi papa abi brede pasa marki, dan mi e dede dyaso fu angri! ¹⁸ Mi o go na mi papa èn mi o taigi en: „Mi papa, mi sondu teige hemel èn teige yu. ¹⁹ Mi no warti moro fu yu kari mi yu manpikin. Meki mi tron leki wan fu den wrokoman fu yu.”’ ²⁰ Dati meki a opo go na en papa. A ben de fara fu oso ete, di en papa si en. Ne a papa firi sari, a lon go brasa en boi èn a gi en wan switi bosi. ²¹ Dan a manpikin taigi en: ’Mi papa, mi sondu teige hemel èn teige yu. Mi no warti moro fu yu kari mi yu manpikin. Meki mi tron leki wan fu den wrokoman fu yu.’ ²² Ma a papa taigi den srafu fu en: ’Esi-esi, go teki wan langa krosi, a moro bunwan, dan un weri disi gi en. Poti wan linga na en finga èn susu na en futu. ²³ Tyari a fatu yongu mankaw kon èn srakti en. Meki wi nyan èn meki prisiri, ²⁴ bika a boi fu mi disi ben dede, ma a kon na libi baka. A ben lasi, ma mi feni en baka.’ Ne den bigin meki prisiri.

nwtsty ete wan tu sani na Lu 15:17-24

teige yu: A Griki wortu enopion, di gebroiki dyaso wani taki „na yu fesi, leti na yu fesi”.

den wrokoman: A moro yongu manpikin ben prakseri fu drai go baka na oso fu aksi en papa fu teki en baka leki wan wrokoman. A no ben abi fu teki en baka leki en manpikin. Wan wrokoman no ben de leki den srafu di ben e tan nanga na osofamiri fu a basi fu den. Sma ben e yuru wrokoman èn den ben e pai den gi a wroko di den ben du na ini wán dei.​—Mt 20:1, 2, 8.

a gi en wan switi bosi: A Griki wortu di gebroiki dyaso komoto fu a wortu fileo, di sma e vertaal tu nanga „bosi” (Mt 26:48; Mr 14:44; Lu 22:47). Ma moro furu a wortu disi wani taki „fu lobi wan sma” (Yoh 5:20; 11:3; 16:27). Te wi e luku fa a papa na ini na agersitori taki a manpikin fu en odi na so wan switi fasi, dan dati e sori taki a ben de klariklari fu teki a manpikin fu en baka di ben sori berow.

kari mi yu manpikin: Son owru Bijbel dokumenti e taki tu: „Teki mi leki wan fu den wrokoman fu yu”, aladi tra moro owru Bijbel dokumenti e sori taki den wortu disi no skrifi na ini a tekst dati. Son sabiman e taki dati sma poti den tra wortu na ini a tekst so taki a e kruderi nanga san skrifi na Lu 15:19. Dati meki na Ingrisitongo Nyun-grontapuvertaling fu 2013 no abi a pisi dati na Lu 15:21.

langa krosi . . . linga . . . susu: A langa krosi disi no ben de wan lawlaw krosi, ma a ben de a moro bunwan. Kande a ben de leki a moi krosi di sma ben e gi wan lespeki fisitiman. Di a papa poti a linga na a finga fu en manpikin, dan dati e sori taki a papa ben lobi en manpikin, taki a ben e lespeki en, taki a ben gi en grani, èn taki a ben teki en baka leki en manpikin. Nofo tron srafu no ben e weri wan linga èn den no ben e weri susu. Sobun, a papa ben e sori sma krin taki a ben teki en manpikin baka leki wan memre fu na osofamiri.