MWBR18 12 Verwijzing gi Wi Kresten libi nanga a preikiwroko studie-buku
3-9 DECEMBER
GUDU NA INI GADO WORTU | TORI FU DEN APOSTEL 9-11
Diki moro dipi
nwtsty ete wan tu sani na Tor 10:6
Simon, wan man di e meki leer nanga a buba fu meti: Wan sma di ben e du a wroko disi ben e gebroiki metibuba. A ben e moksi watra nanga karki fu puru ala meti, fatu nanga wiwiri di ben de ete na a buba. Baka dati a ben e sreka a metibuba moro fara nanga wan watra di den ben puru fu spesrutu bon. A watra disi ben tranga nofo fu meki a metibuba tron leer. Baka dati sma ben e gebroiki a leer disi fu meki sani. A wroko di a ben e du ben e meki a presi tingi èn furu watra ben de fanowdu fu du a wroko disi. A sani disi e yepi wi fu frustan fu san ede Simon ben e libi krosibei fu a se. A kan taki a ben e libi dorosei fu a foto Yope. Soleki fa a Wet fu Moses ben e sori, dan wan sma di ben e wroko nanga dedeskin fu meti no ben krin (Le 5:2; 11:39). Dati meki furu Dyu ben e wisiwasi sma di ben e meki leer èn den no ben o tan na a oso fu so wan sma makriki. A Talmud ben skrifi bakaten taki a wroko fu wan sma di ben e meki leer, ben lagi moro leki a wroko di sma ben abi fu puru a pupe fu meti na wan presi. Ma Petrus no ben meki den sortu denki disi tapu en fu go tan na a oso fu Simon. Fu di Petrus ben e denki tra fasi meki a no ben muilek gi en fu go na a oso fu wan trakondre sma. Son sabiman e bribi taki fosi, a Griki wortu birseus ben de wan nen fu Simon. Den ben e gebroiki a wortu disi gi ’sma di ben e meki leer nanga a buba fu meti’.
10-16 DECEMBER
GUDU NA INI GADO WORTU | TORI FU DEN APOSTEL 12-14
Diki moro dipi
nwtsty ete wan tu sani na Tor 13:9
Saulus di sma sabi tu leki Paulus: Bigin nanga a vers disi, Bijbel e bigin kari Saulus, Paulus. Na apostel Paulus ben gebore leki wan Hebrewsma, ma a ben de wan borgu fu Rome tu (Tor 22:27, 28; Fp 3:5). Dati meki a kan taki a ben abi a Hebrew nen Saulus nanga a Rome nen Paulus sensi di a ben pikin. Furu Dyu fu a ten dati, spesrutu den wan di ben e libi dorosei fu Yerusalem, ben abi tu nen (Tor 12:12; 13:1). Sonwan fu den famiri fu Paulus ben abi Rome nen nanga Griki nen tu (Ro 16:7, 21). Leki „wan apostel gi den trakondre sma”, Paulus kisi a wroko fu preiki a bun nyunsu gi sma di no ben de Dyu (Ro 11:13). Soleki fa a sori, dan a bosroiti fu gebroiki en Rome nen. Kande a ben feni taki den sma fu tra kondre no ben o abi muiti fu kari en na a nen dati (Tor 9:15; Ga 2:7, 8). Son sma feni taki a teki a Rome nen fu gi grani na Sergiyus Paulus, ma dati no kan, fu di Paulus tan hori a nen dati srefi baka di a gowe libi Siprus. Tra sma e bribi taki Paulus no ben wani gebroiki a Hebrew nen fu en, fu di te sma e taki a nen dati, dan a gersi wan Griki wortu di abi fu du nanga wan sma (noso wan meti) di e waka na wan fasi di e sori taki a abi heimemre.
Paulus: A nen Paulos, di komoto fu a Latijntongo Paulus, wani taki „pikin noso pikinwan”. Na ini a Sranantongo vertaling fu den Kresten Griki Buku fu Bijbel, den gebroiki a nen disi 214 tron fu taki fu na apostel Paulus èn tu leisi fu taki fu Sergiyus Paulus, a granman fu Siprus.—Tor 13:7.
17-23 DECEMBER
GUDU NA INI GADO WORTU | TORI FU DEN APOSTEL 15, 16
Diki moro dipi
nwtsty ete wan tu sani na Tor 16:37
wi na Romesma: Dati na borgu fu Rome. Soleki fa a sori, dan Paulus nanga Silas ben de borgu fu Rome. A wet fu Rome ben taki dati ala ten wan borgu fu Rome ben abi a reti fu kisi krutu na wan reti fasi. Noiti den ben mag strafu en na fesi ala sma efu a no ben go na fesi krutu fosi. Wan borgu fu Rome ben abi reti nanga grani na ini ala den kondre di Rome ben e tiri. Sowan sma ben musu hori ensrefi na den wet fu Rome, ma a no ben abi fu hori ensrefi na den wet fu den foto di Rome ben e tiri. Te a ben musu go na fesi krutu, dan a ben kan meki a krutubangi fu a kondre krutu en, ma a ben abi a reti tu fu meki wan krutubangi fu Rome luku a tori fu en. Efu a ben kisi dedestrafu, dan a ben abi a reti fu meki a grankownu fu Rome krutu en. Na apostel Paulus ben e preiki fayafaya na ala sei fu a Gran Kownukondre Rome. Na dri okasi a gebroiki a reti di a ben abi leki Romesma. A fosi leisi na di a taigi den tiriman fu Filipi taki den sma ben pasa den wet fu Rome di den fon en.—Fu leisi fu den tra okasi, dan luku w15 1/3 12 3.
24-30 DECEMBER
GUDU NA INI GADO WORTU | TORI FU DEN APOSTEL 17, 18
„Preiki èn gi sma leri neleki na apostel Paulus”
nwtsty ete wan tu sani na Tor 17:2, 3
taki-go-taki-kon: Paulus no ben e fruteri sma a bun nyunsu nomo, ma a ben e fruklari en gi den. A ben e gebroiki Gado Buku, noso den Hebrew Buku fu Bijbel, fu sori sma taki den sani di a ben e taki tru. A no ben e leisi Gado Wortu nomo, ma a ben e taki-go-taki-kon nanga sma fu den sani di ben skrifi na ini, èn a ben e hori na prakseri nanga suma a ben e taki. A Griki wortu dialegomai wani taki „fu taki nanga sma, fu taki tori nanga sma”. Bijbel e gebroiki a Griki wortu disi tu na Tor 17:17; 18:4, 19; 19:8, 9; 20:7, 9.
A gebroiki den sani di skrifi na ini Gado Buku fu buweisi: A Griki wortu wani taki „fu poti wan sani sei wan trawan”. Kande Paulus ben luku bun fa den profeititori di abi fu du nanga a Mesias na ini den Hebrew Buku fu Bijbel ben e kruderi nanga den sani di pasa na ini Yesus en libi. Na so a sori taki Yesus ben meki den profeititori dati kon tru.
nwtsty ete wan tu sani na Tor 17:17
wowoyo: A wowoyo (Grikitongo, agora) fu Ateine ben de na a noordwest-sei fu na Akropolis èn a ben bigi sowan feifi hectare. Boiti taki sma ben e bai èn seri sani drape, a presi disi ben de a moro prenspari presi fu a foto pe sma ben e du bisnis, pe den ben e taki fu politiek èn fu sani di ben abi fu du nanga a kulturu fu den. Den Ateinesma ben lobi fu kon makandra drape fu taki fu dipi tori.
nwtsty ete wan tu sani na Tor 17:22, 23
Gi wan gado di wi no sabi: Den Griki wortu Agnostoi teyoi ben skrifi na tapu wan altari na ini Ateine. Den Ateinesma ben bow furu tempel nanga altari fu sori lespeki gi den gado fu den. Den ben meki tempel srefi gi sani soleki Biginen, Sakafasi, Krakti, nanga Sari-ati, fu di den ben e si den sani disi leki gado tu. Den ben meki wan altari tu ’gi wan gado di den no ben sabi’. Kande den ben du disi fu di den ben frede taki den ben frigiti wan gado èn taki a gado dati ben o atibron nanga den. Na altari disi ben e sori taki den sma ben e bribi taki wan Gado de di den no ben sabi srefisrefi. Na wan koni fasi Paulus poti prakseri na a altari disi fu meki den sma kon sabi a gado disi di ben de a tru Gado di den no ben sabi ete.
Diki moro dipi
nwtsty ete wan tu sani na Tor 18:21
Efu Yehovah wani: A Griki wortu disi e sori taki ala ten wi musu hori a wani fu Gado na prakseri te wi e bosroiti fu du sani. Na apostel Paulus hori a sani disi bun na prakseri (1Kor 4:19; 16:7; Heb 6:3). A disipel Yakobus ben gi sma deki-ati tu fu taki: „Efu Yehovah wani, dan wi o de na libi èn wi o du disi noso dati” (Yak 4:15). Wi no musu taki den sani disi somaar. Te wan sma e taki „efu Yehovah wani”, dan a musu du ala muiti tu fu du sani soleki fa Yehovah wani. Wan sma no abi fu taki den wortu disi ala ten meki tra sma yere, ma nofo tron den e taki den na ini den ati.—Luku „Moro sani” 2.