MWBR19 06 Verwijzing gi Wi Kresten libi nanga a preikiwroko studie-buku
3-9 YUNI
GUDU NA INI GADO WORTU | GALASIASMA 4-6
„’Wan agersitori’ di e leri wi wan prenspari sani”
it-1-O 914 ¶2
Hagar
Na apostel Paulus ben gebroiki Hagar na ini wan agersitori fu prenki a pipel fu Israel di ben pramisi Yehovah fu hori densrefi na a Wetfrubontu di a ben seti na Sinai-bergi. A frubontu disi ben meki taki a pipel tron pikin di ben de „srafu”. Ma fu di a pipel ben e du sondu, meki den no ben man hori densrefi finifini na a frubontu dati. A Wetfrubontu no ben meki a pipel kon fri, ma a ben e sori taki den na sondusma di ben musu dede. Na a fasi dati den ben de srafu (Yoh 8:34; Ro 8:1-3). Yerusalem fu a ten fu Paulus ben e prenki Hagar, fu di a mamafoto Yerusalem, di abi fu du nanga a fasi fa a pipel Israel ben orga, ben de na ini katibo makandra nanga den pikin fu en. Ma den salfu Kresten na pikin fu „a Yerusalem di de na tapusei”, noso na agersi wefi fu Gado. Neleki Sara, a fri uma, a Yerusalem disi noiti ben de wan srafu. Soleki fa wi sabi, dan Ismael ben frufolgu Isak. Na so den pikin fu a Yerusalem di ben de na ini katibo frufolgu den pikin fu a „Yerusalem di de na tapusei” èn di a Manpikin ben meki kon fri. Ma den ben yagi Hagar nanga en manpikin. A sani disi e prenki a drai di Yehovah ben drai baka gi a pipel fu Israel.—Ga 4:21-31; luku sosrefi Yoh 8:31-40.
Diki moro dipi
w09-O 1/4 13
Yu ben sabi a sani disi?
Fu san ede Yesus kari Yehovah „Abba, Tata” di a ben e begi?
Na Arameisi wortu ʼabbaʼ wani taki „a tata” noso „mi tata”. Ibriwan fu den dri leisi di den wortu disi skrifi na ini Bijbel, den ben de na ini wan begi èn den abi fu du nanga wi hemel Tata, Yehovah. O ten sma ben e gebroiki a wortu „abba”?
Wan buku e taki: „Te pikin na a ini a ten fu Yesus ben e gebroiki a wortu ’abbaʼ gi a papa fu den, dan disi ben e sori taki den ben lobi en èn taki den ben lespeki en” (The International Standard Bible Encyclopedia). A wortu disi ben de wan fu den fosi sani di a pikin ben e leri taki èn den papa ben lobi en te den pikin ben e kari den so. Yesus ben e gebroiki a wortu disi di a ben e begi en Papa fayafaya. Di a ben de na ini a dyari fu Getseimanei, dan syatu fosi a dede, a begi Yehovah èn a kari en „Abba, Tata”.—Markus 14:36.
A srefi buku e taki: „Na ini den buku fu den Dyu di skrifi na a ten fu den Grikisma nanga den Romesma, den no ben gwenti gebroiki a wortu ʼabbaʼ gi Gado.” Ma di „Yesus . . . gebroiki a wortu disi na ini begi, dan dati sori taki en nanga Gado ben lobi makandra trutru.” Den tu tra presi na ini Bijbel pe a wortu „Abba” skrifi, de na ini brifi fu na apostel Paulus. Disi e sori taki den fosi Kresten ben e gebroiki a wortu tu na ini den begi fu den.—Romesma 8:15; Galasiasma 4:6.
w10-O 1/11 15
Yu ben sabi a sani disi?
San na apostel Paulus ben abi na prakseri di a taki: „Mi abi bronmarki na mi skin di e sori taki mi na wan srafu fu Yesus”?—Galasiasma 6:17.
▪ Gi den sma fu a ten dati den wortu fu Paulus ben kan abi fu du nanga difrenti sani. Fu eksempre, na ini owruten sma ben e gebroiki faya isri fu bron wan marki tapu a skin fu sma di den ben teki tyari gowe baka wan feti, fu sma di ben fufuru sani na ini tempel, noso fu srafu di ben lowe gowe. Te den ben e bron wan marki na tapu libisma, dan dati ben de fu gi a sma syen.
Ma a no ala ten den bronmarki disi ben de fu gi sma syen. Furu pipel na ini owruten ben e gebroiki bronmarki fu sori taki de ben de fu wan spesrutu lo noso fu wan spesrutu bribi. Soleki fa wan buku e taki, dan „den Siriasma ben e meki bronmarki tapu den anu nanga den neki fu sori taki den ben gi densrefi abra na den gado Hadad nanga Atargatis . . . Den ben e bron wan marki di ben gersi a blad fu wan ivy bon na tapu a skin fu sma di ben e anbegi a gado Dionisus” (Theological Dictionary of the New Testament).
Furu sabiman fu a ten disi feni taki Paulus ben e taki fu den marki di a ben kisi di sma ben fon en na a ten di a ben e dini leki zendeling (2 Korentesma 11:23-27). Ma kande Paulus ben wani sori taki a no den marki na en skin ben e sori taki en na wan Kresten, ma taki na a fasi fa a ben e libi ben e sori dati.
10-16 YUNI
GUDU NA INI GADO WORTU | EFEISESMA 1-3
„A seti fu Yehovah èn a fasi fa a e wroko”
it-1-O 1005 ¶3
Santa kibritori
A Mesias Kownukondre. Paulus e fruteri finifini na ini den brifi fu en fa a santa kibritori fu Krestes kon na krin. Na Efeisesma 1:9-11 a e fruteri fa Gado meki wi kon sabi san na a „santa kibritori” di abi fu du nanga a wani fu en. A e taki: „Fu di a e plisi en èn fu di a feni en bun meki a bosroiti fu seti sani na a kaba fu a ten di a poti. Na so ala sani o kon makandra baka na ondro Krestes. Dati na den sani di de na ini hemel nanga den sani di de na grontapu. Iya, na ondro en ala sani o kon makandra. Wi de wán nanga en èn wi o kisi wan gudu makandra nanga en, fu di Gado bosroiti disi na fesi kaba. En na a sma di e du ala sani soleki fa a wani.” A „santa kibritori” disi abi fu du nanga wan regering di Bijbel e kari a Mesias Kownukondre fu Gado. „Den sani di de na ini hemel”, di Paulus e kari dyaso, na den sma di abi a howpu fu tiri leki kownu fu a hemel Kownukondre dati makandra nanga Krestes. „Den sani di de na grontapu” na den sma di o libi na grontapu. Yesus ben sori den disipel fu en taki a santa kibritori ben abi fu du nanga a Kownukondre di a taigi den: „Na unu kisi a grani fu kon frustan a santa kibritori fu Gado Kownukondre.”—Mr 4:11.
17-23 YUNI
GUDU NA INI GADO WORTU | EFEISESMA 4-6
Diki moro dipi
it-1-O 1007 ¶3
Santafasi
Santa yeye. Disi na a krakti noso a yeye fu Yehovah. Ala ten a e gebroiki a krakti disi fu du a wani fu en. A yeye disi krin, a soifri, a santa èn ala ten Yehovah e gebroiki en fu du san a abi na prakseri. Dati meki Bijbel e kari en a „santa yeye” (Ps 51:11; Lu 11:13; Ro 1:4; Ef 1:13). Te a santa yeye e wroko tapu wan sma, dan a e yepi a sma fu de santa noso fu de krin. Te wan sma e du wan sani di no krin noso di ogri, dan a e kakafutu gi a santa yeye noso a e meki a yeye „sari” (Ef 4:30). A santa yeye a no wan sma. Ma fu di a e tyari kon na krin san na den fasi fu Gado di santa, meki sma kan meki a santa yeye firi „sari”. Iniwan ogri di wan sma e du kan „tapu a yeye fu Gado fu a wroko” na ini a sma dati (1Te 5:19). Efu wan sma e tan du ogri, dan fu taki en leti a o meki a santa yeye fu Gado „firi sari” èn disi kan meki taki Gado tron wan feanti fu a sma disi di e opo ensrefi teige en (Yes 63:10). Wan sma di e meki a santa yeye sari, kan taki ogri fu a santa yeye srefi. Soleki fa Yesus taki, dan wan sma no o kisi pardon fu a sondu dati na ini a sistema disi noso na ini a wan di e kon.—Mt 12:31, 32; Mr 3:28-30; luku YEYE.
24-30 YUNI
GUDU NA INI GADO WORTU | Filipisma 1-4
Diki moro dipi
it-2-O 458 ¶7
Ofrandi
Dringi-ofrandi. Sma ben gwenti tyari dringi-ofrandi makandra nanga furu fu den tra ofrandi. Disi ben de so spesrutu na a ten di den Israelsma ben e tan na ini a Pramisi Kondre (Nu 15:2, 5, 8-10). A dringi-ofrandi ben de win èn sma ben e kanti en na tapu na altari (Nu 28:7, 14; luku Eks 30:9; Nu 15:10). Na apostel Paulus ben skrifi den Kresten na ini Filipi: „Srefi te mi e gi misrefi leki wan dringi-ofrandi di kanti trowe na tapu na ofrandi fu yu, toku mi breiti.” Dyaso a e gebroiki a dringi-ofrandi na wan agersi fasi fu sori taki a ben de klariklari fu gi ensrefi fu a bun fu en Kresten brada nanga sisa (Fp 2:17). Syatu fosi a dede, a skrifi Timoteyus: „Den kanti mi trowe kaba leki wan dringi-ofrandi èn a ten di mi o kon fri de krosibei kaba.”—2Ti 4:6.