MWBR19 07 Verwijzing gi Wi Kresten libi nanga a preikiwroko studie-buku

1-7 YULI

GUDU NA INI GADO WORTU | KOLOSESMA 1-4

Diki moro dipi

it-2-O 98 ¶3-5

A Kownukondre fu Gado

„A Kownukondre fu en lobi Manpikin.” Tin dei baka di Yesus opo go na hemel, na a ten fu a Pinksterfesa fu a yari 33, den disipel fu en ben abi buweisi taki „a go sidon na Gado en reti-anusei” fu di Yesus meki santa yeye kon na den tapu (Tor 1:8, 9; 2:1-4, 29-33). Na so a „nyun frubontu” bigin wroko gi den èn na so den tron den fosiwan fu a „santa pipel”, noso na Israel fu Gado.​—Heb 12:22-24; 1Pe 2:9, 10; Ga 6:16.

Sensi a ten dati Krestes e sidon na a reti-anusei fu en Tata èn a tron na Ede fu a gemeente disi (Ef 5:23; Heb 1:3; Fp 2:9-11). Bijbel e sori taki sensi a Pinksterfesa fu a yari 33, wan kownukondre seti na hemel di bigin tiri den disipel fu Yesus. Di na apostel Paulus skrifi den fosi Kresten na ini Kolose, a taki dati Yesus Krestes ben seti wan kownukondre kaba. A ben skrifi: „[Gado] puru wi na ini a makti fu dungru èn a poti wi na ini a Kownukondre fu en lobi Manpikin.”​—Kol 1:13; luku Tor 17:6, 7.

Sensi a Pinksterfesa fu a yari 33, a Kownukondre fu Krestes e tiri na Israel fu Gado, noso den Kresten di gebore baka. Gado santa yeye meki taki den Kresten dati tron yeye pikin fu Gado (Yoh 3:3, 5, 6). Te den salfu Kresten disi de na grontapu, dan den na borgu fu a Kownukondre fu Krestes. Ma te den kisi den pai na hemel, dan den o tiri leki kownu makandra nanga Krestes.​—Opb 5:9, 10.

8-14 YULI

GUDU NA INI GADO WORTU | 1 TESALONIKASMA 1-5

Diki moro dipi

it-1-O 1065

Hurudu

Te wan sma du hurudu, dan den brada kan puru en fu a Kresten gemeente (1Kor 5:9-13; Heb 12:15, 16). Na apostel Paulus e sori taki wan Kresten di du hurudu e sondu teige en eigi skin fu di a e gebroiki en syenpresi fu du wan sani di no fiti kwetikweti. A sma disi e pori a matifasi di a abi nanga Gado, a e doti a gemeente fu Gado èn a kan kisi wan seryusu siki (1Kor 6:18, 19). A sma disi e du en Kresten brada ogri (1Te 4:3-7) fu di a e (1) gi a gemeente porinen èn a e pori a santafasi fu a gemeente (Heb 12:15, 16), (2) a e meki taki a sma nanga suma a du hurudu lasi en bun nen èn efu a sma dati no trow, a no o man trow leki wan sma di krin, (3) a e pori a nen fu en eigi famiri èn (4) a e du wan hati sani nanga a papa nanga a mama fu a sma nanga suma a du hurudu, nanga a masra fu a sma dati, noso nanga a sma nanga suma na uma dati o trow. Te wan sma e du den sani disi, dan a no den wet fu libisma a e wisiwasi, ma na den wet fu Gado, fu di son leisi libisma wet no e krutu hurudu. Dati meki na Gado o strafu en fu a sondu di a du.​—1Te 4:8.

15-21 YULI

GUDU NA INI GADO WORTU | 2 TESALONIKASMA 1-3

„A o kon na krin suma na a sma di e du kruktudu”

it-1-O 866-867

Dini Gado fayafaya

Wan tra kibritori de, di de wan heri tra sani leki a „santa kibritori” fu Yehovah. A „kibritori” disi abi fu du nanga a „sma di e du kruktudu”. Disi ben de wan kibritori gi den tru Kresten, fu di na ini a ten fu na apostel Paulus a no ben kon na krin ete suma na a „sma di e du kruktudu”. Srefi baka di a „sma” dati ben o bigin du kruktudu, furu sma no ben o sabi ete suma na en, fu di a ben o du den ogri fu en na ini a nen fu Gado èn a ben o du neleki a ben e dini Gado fayafaya. Te yu luku en bun, dan a sma disi ben fadon komoto na bribi fu di a no ben e dini a tru Gado. Paulus ben taki dati aladi a ben de wan kibritori ete suma na „a sma di e du kruktudu”, toku a kruktudu fu en ben de fu si kaba te yu luku den ogri di sma ben e du na ini a gemeente. A sani disi ben o meki taki te fu kaba, wan grupu sma ben o opo kon di fadon komoto na bribi. Te Yesus Krestes ben o kon baka te fu kaba, a ben o pori „a sma di e du kruktudu”. A „sma” disi di Satan e tiri, ben o „si ensrefi moro hei leki ala den wan di sma e kari ’gado’, noso di sma e anbegi” (Grikitongo, sebasma). A sma disi di de wan bigi gensman fu Gado èn di Satan e gebroiki, kori furu sma èn a o tyari pori kon gi den wan di e du den ogri fu en. A „sma di e du kruktudu” ben o man kori sma fu di a ben o du neleki a e dini Gado fayafaya, aladi a e du soso ogri.​—2Te 2:3-12; luku Mt 7:15, 21-23.

it-2-O 179 ¶1

Lei

Yehovah Gado „e gi pasi taki trawan e bedrigi” den sma di lobi leitori, so taki „den kan bribi lei” na presi fu bribi a bun nyunsu fu Yesus Krestes (2Te 2:9-12). Na a sani disi ben pasa wan tu hondro yari na fesi nanga Kownu Akab fu Israel. Profeiti ben lei gi Akab taki a ben o wini a feti teige Ramot-Gilead, aladi Mikaya, a profeiti fu Yehovah, ben warskow den taki sani no ben o waka bun. Na ini a fisyun di Mikaya ben kisi, Yehovah gi pasi taki wan engel meki den profeiti fu Akab „taki soso lei”. Dati wani taki dati na engel disi ben abi krakti na den tapu so taki den no fruteri san tru, ma den fruteri san den srefi ben wani èn san Akab ben wani yere. Aladi Mikaya ben warskow Akab gi a sani disi, toku Akab bribi den lei dati èn dati meki a dede.​—1Kw 22:1-38; 2Kr 18.

Diki moro dipi

it-2-O 1218 ¶7

Faya

Petrus ben taki dati Gado „libi den hemel nanga a grontapu fu now fu bron den nanga faya”. Te wi e leisi moro fara èn te wi e luku tra tekst sosrefi, dan a de krin taki disi no abi fu du nanga trutru faya, ma nanga têgo pori. Na ini den dei fu Noa, a Frudu no pori den trutru hemel nanga grontapu, ma soso den ogri sma. Na so a o de tu te Yesus Krestes o sori ensrefi nanga den makti engel fu en na ini wan bigi faya. Te disi pasa, dan den o pori den ogri sma nanga na ogri grontapu disi.​—2Pe 3:5-7, 10-13; 2Te 1:6-10; luku Yes 66:15, 16, 22, 24.

it-1-O 1151 ¶2

Boskopu di komoto fu Gado

Den wortu fu Paulus e sori krin taki boskopu de di e „komoto fu Gado” nanga falsi boskopu di no komoto fu Gado. A e taki fu den tu sortu boskopu disi na 1 Timoteyus 4:1, pe skrifi: „A yeye fu Gado e taki krin taki na ini a ten di e kon son sma o gowe libi a bribi, fu di den o arki te sma e fruteri den boskopu di gersi leki den komoto fu Gado. Den o poti prakseri na den leri fu ogri yeye.” Disi e sori taki den boskopu di gersi leki den komoto fu Gado, e komoto fu ogri yeye. A sani disi tru te wi e luku a fisyun di na apostel Yohanes kisi fu „dri tegu boskopu” di ben gersi bigi todo di ben e komoto na ini a mofo fu a bigi kaiman, na ini a mofo fu na ogri meti èn na ini a mofo fu a falsi profeiti. Paulus e sori krin taki „na den ogri yeye e taki den boskopu” disi fu tyari den kownu fu grontapu kon na wán fu feti na Harmagedon.​—Opb 16:13-16.

22-28 YULI

GUDU NA INI GADO WORTU | 1 TIMOTEYUS 1-3

„Suku fu du wan tumusi bun wroko”

km-O 10/78 3 ¶7

Den wan di e „kisi wan bun nen na trawan”

⁷ Dati meki wi kan frustan fu san ede Paulus ben taki dati den man disi e „kisi wan bun nen na trawan”. Disi a no a srefi leki te sma e suku fu kisi wan hei posisi na ini wan kerki, soleki fa son sma e denki. Na presi fu dati, dinari ini a diniwroko di e „du a wroko fu den na wan bun fasi” kan de seiker taki Yehovah nanga Yesus o blesi den èn taki a heri gemeente o lespeki èn horibaka gi den. Dati meki „den man taki fri fu a bribi di abi fu du nanga Krestes Yesus”. Fu di den e du a wroko fu den bun, meki sma e warderi den. Boiti dati, den abi wan tranga bribi èn den no frede fu kisi syen te den e fruteri trawan fu a bribi fu den.

Diki moro dipi

it-1-O 808

Famiri nanga afo

A muiti di sma ben e meki fu ondrosuku suma na den afo fu den èn fu taki fu den tori dati ben de lasi ten, spesrutu na a pisi ten di Paulus skrifi a brifi gi Timoteyus. A no ben de wan tumusi prenspari sani moro taki sma skrifi finifini na ini lantibuku suma na den afo fu den, fu di Dyu nanga trakondre sma na ini a Kresten gemeente ben de a srefi gi Gado (Ga 3:28). Den buku dati ben sori kaba taki Krestes ben de wan bakapikin fu David. A no langa baka di Paulus ben gi a gemeente a rai disi, Yerusalem kisi pori makandra nanga den lantibuku pe den nen fu den Dyu famiri ben skrifi. Gado no kibri den buku dati. Dati meki Paulus no ben wani taki Timoteyus nanga den gemeente lasi ten fu ondrosuku suma na den afo fu den èn fu krutu nanga trawan fu den sani dati, fu di dati no ben o tranga a bribi fu den Kresten. Bijbel e sori krin fu sortu famiri a Mesias ben o komoto. Den buweisi dati nofo fu sori taki Krestes na a Mesias trutru èn dati na a moro prenspari sani gi Kresten. Den nen fu den tra famiri na ini Bijbel skrifi fu sori taki den tori na ini Bijbel pasa trutru.

29 YULI–4 AUGUSTUS

GUDU NA INI GADO WORTU | 1 TIMOTEYUS 4-6

„Yu o dini Gado fayafaya noso yu o feti fu kon gudu?”

g-O 6/07 6 ¶2

Sortu krakti a kan abi na yu tapu te yu e feti fu kon gudu?

A tru taki furu sma no o dede te den e feti fu kon gudu. Toku den e misi furu na ini a libi. Boiti dati, den no o de koloku efu den abi problema na wroko noso moni problema. Den sani disi kan gi den broko-ede, ede-hati, problema na den maag noso kande den no man sribi. Ala den problema disi kan meki den dede moro esi. Awinsi wan sma e kon si te fu kaba taki a musu tyari kenki kon, toku a kan lati gi en. Kande en trowpatna no e frutrow en moro, kande en pikin firi leki a no lobi den moro, èn kande en gosontu no bun moro. A sma disi kan meki son sani kon bun baka, ma a o abi fu du tranga muiti. A de krin taki sma di e feti fu kon gudu „gi densrefi furu pen, neleki na dyuku den dyuku densrefi”.​—1 Timoteyus 6:10.

g-O 11/08 6 ¶4-6

Siksi prenspari sani di kan yepi wi fu abi wan bun libi

Soleki fa wi si na ini a fosi artikel, sma di denki taki den musu feti fu kon gudu fu kan abi wan bun libi, e feti fu grabu winti. Boiti taki sani no e waka soleki fa den fruwakti, den e kisi furu problema tu. Fu eksempre, furu sma di e feti fu kon gudu no e broko den ede so furu moro nanga famiri nanga mati. Trawan no e sribi nofo, kande na fu di den e wroko ala yuru, noso fu di den lai broko-ede. Preikiman 5:12 e taki: „Wan sma di de wan futuboi e sribi switi, awansi a e nyan pikinso noso awansi a e nyan furu. Ma wan gudu sma no man sribi bun, fu di a abi furu sani.”

Boiti taki moni na wan ogri-ati basi, a e kori sma tu. Yesus Krestes ben taki fu „a bedrigifasi fu gudu” (Markus 4:19). Sobun, aladi sma e bribi taki den o de koloku te den kon gudu, toku dati no de so. O moro den e kon gudu, o moro sani den wani. Preikiman 5:10 e taki: „Efu wan sma lobi gudu, dan a moni di a e meki no o sari en.”

Sobun, wan sma di lobi moni e kori ensrefi èn te fu kaba sani no e go leki fa a ben fruwakti, a e kisi soso broko-ede èn kande a e go du ogri srefi (Odo 28:20). Wan sma di de koloku èn di abi wan bun libi lobi gi tra sma sani, a lobi gi trawan pardon, a e libi wan krin libi, a e sori lobi gi trawan èn a e sori taki a lobi Gado.

Diki moro dipi

it-2-O 1194 ¶1-2

Leisi gi sma

Na ini a Kresten gemeente. Na ini a ten fu den fosi Kresten, wan tu sma nomo ben abi den eigi kopi fu den bukulolo fu Bijbel. Dati meki a ben prenspari taki sma ben e leisi den buku disi gi trawan. Na apostel Paulus ben taigi den brada fu leisi den brifi fu en na den konmakandra fu den Kresten gemeente. Den ben musu gi den tra gemeente den brifi disi tu, so taki den ben kan leisi den na ini den eigi gemeente èn den tra gemeente ben musu du a srefi nanga den brifi di den ben kisi (Kol 4:16; 1Te 5:27). Paulus ben taigi a yongu Kresten opziener Timoteyus fu du muiti „fu leisi gi sma, fu gi sma deki-ati èn fu gi leri”.​—1Ti 4:13.

Sma di e leisi gi trawan musu man leisi grati (Hab 2:2). Fu di sma musu leisi gi trawan fu man gi den leri, meki a sma di e leisi musu frustan bun san a e leisi èn san a skrifiman ben abi na prakseri. A musu luku bun tu taki den arkiman no kisi wan fowtu denki. Soleki fa Openbaring 1:3 e sori, dan den wan di e leisi a profeititori dati nanga wan tranga sten, sosrefi den wan di e yere a profeititori èn e du san skrifi na ini, o de koloku.