MWBR19 08 Verwijzing gi Wi Kresten libi nanga a preikiwroko studie-buku
12-18 AUGUSTUS
GUDU NA INI GADO WORTU | TITUS 1–FILEIMON
Diki moro dipi
w89-O 15/5 31 ¶5
Aksi fu leisiman
Aladi sma ben e desko den Kreitasma, toku a no de so taki Paulus ben abi a srefi denki dati. Wi kan bribi dati fu di Paulus ben sabi taki tapu Kreita yu ben abi Kresten di Gado ben feni bun èn di a ben salfu nanga en santa yeye (Tori fu den apostel 2:5, 11, 33). Furu reti-ati Kresten ben de na ini den gemeente di ben de „na ini ibri foto”. Aladi den Kresten dati ben abi fowtu, toku a no de so taki den ben lobi lei èn taki den ben de gridi nyanman di no ben wani wroko. Efu dati ben de so, dan Yehovah no ben o feni den bun moro (Filipisma 3:18, 19; Openbaring 21:8). Neleki fa a de now na furu presi, na so reti-ati sma na ini Kreita ben e sari tu taki den sma na den lontu ben e libi wan yayolibi, èn den ben de klariklari fu arki a Kresten boskopu.—Esekièl 9:4; luku Tori fu den apostel 13:48.
19-25 AUGUSTUS
GUDU NA INI GADO WORTU | HEBREWSMA 1-3
Diki moro dipi
it-1-O 250 ¶5
Gersi, noso de leki
A de so taki ala ten Yesus sori a glori fu en Tata na a srefi fasi?
Gado en fosi Manpikin, di tron a man Yesus bakaten, de leki en Tata (2Kor 4:4). Soleki fa a sori, dan na a Manpikin dati Gado ben taigi a sani disi: „Meki wi meki libisma fu gersi wi.” Sobun, a musu fu de so taki a Manpikin ben de leki en Papa, a Mekiman, sensi a bigin di Gado meki en (Ge 1:26; Yoh 1:1-3; Kol 1:15, 16). Di Yesus ben de na grontapu leki wan libisma di no ben abi sondu, a sori den fasi fu en papa na a moro bun fasi leki fa wan libisma ben o man sori dati. Dati meki a ben kan taki: „A sma di si mi, si a Tata tu” (Yoh 14:9; 5:17, 19, 30, 36; 8:28, 38, 42). Ma Yesus kon gersi en Papa moro di a kisi wan opobaka leki wan yeye èn di en Papa, Yehovah Gado, gi en „ala makti na ini hemel èn na grontapu” (1Pe 3:18; Mt 28:18). Ma fu di Gado poti Yesus ’moro hei leki fa a ben de kaba’, meki a e sori a glori fu en Papa na wan moro bigi fasi leki fa a ben du dati fosi a kon na grontapu (Fp 2:9; Heb 2:9). Now „a de soifri leki fa Gado de”.—Heb 1:2-4.
it-1-O 1023 ¶1
Hemel
Den wortu fu Psalm 102:25, 26 abi fu du nanga Yehovah Gado, ma na apostel Paulus gebroiki den fu taki fu Yesus Krestes. A du disi fu di Gado ben gebroiki en wan-enkri Manpikin fu meki hemel nanga grontapu. Paulus e sori taki Yesus en libi noiti no o man kon na wan kaba. Dati de heri tra fasi leki hemel nanga grontapu di Gado kan „domru” poti na wan sei „neleki wan dyakti”.—Heb 1:1, 2, 8, 10-12; luku 1Pe 2:3.
26 AUGUSTUS–1 SEPTEMBER
GUDU NA INI GADO WORTU | HEBREWSMA 4-6
Diki moro dipi
it-1-O 1092 ¶4
Howpu
Den wan di ’kisi a kari fu go na hemel’ (Heb 3:1), abi a howpu fu libi fu têgo èn den o abi wan skin di no man pori. A howpu disi na wan trutru howpu èn den kan frutrow na tapu nanga den heri ati, fu di tu sani de di noiti no o kenki, dati na den pramisi fu Gado nanga den sweri di a meki. Den tu sani dati noiti no e kenki fu di Gado no man lei. A howpu disi abi fu du nanga Krestes di e libi now na hemel leki wan yeye di no man dede moro. Dati meki Bijbel e taki dati a howpu disi na „wan ankra gi wi libi. A tranga èn a e hori wi tanapu. A howpu disi e tyari wi pasa a garden go na inisei [te a granpriester ben e go na ini a Moro Santa Presi na a dei te den Dyu ben e tyari ofrandi fu aksi pardon gi den sondu fu den], pe wan sma ben go na inisei fosi wi, gi a bun fu wi. A sma dati na Yesus di tron wan granpriester fu têgo, neleki Melkiseidek.”—Heb 6:17-20.