MWBR20 03 Verwijzing gi Wi Kresten libi nanga a preikiwroko studie-buku

2-8 MAART

DU MUITI FU TRON WAN MORO BUN PREIKIMAN | GENESIS 22-23

Lezing

it-2-O 698 3

O ten Gado e si wan sma leki wan reti-ati sma

Fa Gado ben kan si Abraham leki wan reti-ati sma aladi Krestes no ben dede ete gi libisma?

Sobun, na fu di Abraham ben abi bribi èn fu di a sori dati tu, meki „Gado ben si en leki wan reti-ati sma” (Ro 4:20-22). Ma disi no wani taki dati en nanga tra reti-ati man di ben e libi fosi a ten fu den Kresten no ben abi sondu. Den sma dati ben e bribi a pramisi fu Gado taki wan „pikin” ben o kon èn den ben e du muiti fu hori densrefi na den wet fu Gado. Dati meki Gado no ben e si den leki den ogri sma na grontapu di no ben abi wan bun nen na en (Ge 3:15; Ps 119:2, 3). Fu di Yehovah ben lobi den, meki a ben e si den leki sma di no abi fowtu te yu ben o teki den gersi nanga den sma fu a grontapu disi di no sabi Gado (Ps 32:1, 2; Ef 2:12). Sobun, fu di den sma disi ben abi bribi, meki Gado poti prakseri na den èn a blesi den. A du dati sondro fu pasa en eigi wet (Ps 36:10). Ma den sma disi ben e frustan taki den ben musu kon fri fu sondu èn den ben e wakti teleki Gado frulusu den.​—Ps 49:7-9; Heb 9:26.

9-15 MAART

WI KRESTEN LIBI | GENESIS 24

„Suma mi o kari?

yb08-O 11 ¶3

Amerkankondre

Jacquelin di ben abi tinasiksi yari ben gi a skoro jufrow fu en wan kari fu kon na a Memrefesa èn a fruteri en san a fesa disi wani taki. A fruwondru di a si taki a jufrow disi kon na Memrefesa. Fu di a programa ben hori na ini wan fu den Kongreshal fu Yehovah Kotoigi, meki di a programa ben kaba, Jacquelin waka lontu nanga en fu sori en a presi. A jufrow ben lobi fa a presi krin èn fa ala sani ben orga so moi. A ben lobi en spesrutu taki den sma di ben bow a presi èn ben e sorgu taki a tan bun, no ben e wroko gi moni. Baka di a jufrow taigi Jacquelin taki a ben lobi a lezing, dan a jufrow aksi en: „Fa mi kan kisi a Bijbelstudie di a brada ben taki fu en?” Jacquelin ben breiti èn a piki en: „Mi kan sorgu gi dati!” Jacquelin bigin studeri Bijbel nanga a skoro jufrow fu en ibri munde baka skoro.

yb08-O 14 ¶1

Australia

Wan yonguman di ben e studeri Bijbel nanga den Kotoigi bigin taki fu a Bijbelstudie fu en nanga sma na a gym pe a ben e wroko. Wan fu den sma dati ben de wan uma di ben teki a kari fu en fu kon na a Memrefesa. Di na uma dati ben de wan yongu meisje, dan a ben e yere fa sma e singi na ini a Kownukondre zaal krosibei pe a ben e tan. A ben aksi en papa nanga mama efu a ben kan go na a zaal, ma den no ben wani taki a moksi nanga den Yehovah Kotoigi. Toku a go na wan tu fu den konmakandra, ma di en nanga en famiri froisi, a no ben man moksi moro nanga den Kotoigi. Di a ben de na a Memrefesa, dan a leri sabi wan sisa di bigin studeri Bijbel nanga en. A bigin go na den gemeente konmakandra èn en masra ben wani sabi moro tu. Na a srefi ten, a yonguman di e wroko na a gym, go na fesi èn a tron wan preikiman di no dopu ete. Now a e du muiti fu kan dopu.

16-22 MAART

GUDU NA INI GADO WORTU | GENESIS 25-26

„Esau e seri a reti di a abi leki fosi pikin”

it-1-O 1191

Yakob

Yakob ben de heri tra fasi leki Esau. Den papa Isak, ben lobi Esau moro Yakob. Esau ben de wan ontiman di ben lobi de na dorosei èn a ben grofugrofu. Ma Bijbel e taki dati Yakob ben de „wan reti-ati man [Hebrewtongo, tam] di ben e libi na ini tenti”, a ben rustig èn a ben lobi kweki skapu. En mama ben lobi en moro Esau, fu di a ben man tyari a frantwortu fu sorgu gi den sani di na osofamiri abi fanowdu (Ge 25:27, 28). Bijbel e gebroiki a srefi Hebrew wortu tam na tra presi tu te a e taki fu sma di Gado feni bun. Fu eksempre, Bijbel e taki dati „man di lobi fu kiri trawan abi bita-ati gi ala sma di e du bun”. Ma toku Yehovah e pramisi taki „na ini a ten di e kon, sani o waka bun gi den sma [di e du bun]” (Odo 29:10; Ps 37:37). A reti-atiman Yob ’ben de wan bun man [Hebrewtongo, tam] di ben lobi retidu’.​—Yob 1:1, 8; 2:3.

it-1-O 579

A fosi pikin

Sensi owruten a fosi manpikin ben e kisi spesrutu frantwortu na ini na osofamiri èn te a papa ben dede, dan na en ben e tron edeman fu na osofamiri. A ben o kisi tu tron moro fu a farmirigudu leki san den tra manpikin ben o kisi (De 21:17). Di den brada fu Yosef ben e sidon na en fesi fu nyan, dan yu ben e kisi Ruben fosi, fu di a ben abi a reti dati leki fosi pikin (Ge 43:33). Ma a no ala ten Bijbel e kari a nen fu a fosi manpikin, fosi a di fu den trawan. Nofo tron na a moro prenspari manpikin noso a wan di e tan gi yesi na Gado e kisi a grani dati.​—Ge 6:10; 1Kr 1:28; luku Ge 11:26, 32; 12:4.

Diki moro dipi

it-2-O 178 ¶8

Lei

Aladi Bijbel e krutu sma di e fruteri ogri-ati lei, toku disi no wani taki dati wan sma musu fruteri trawan sani te den no abi a reti fu kon sabi den sani dati. Yesus Krestes ben gi wi a rai disi: „No gi den dagu santa sani èn no trowe un peri gi den agu, noso den o masi den peri nanga den futu èn den o drai kon baka fu priti unu na pisipisi” (Mt 7:6). Na fu dati ede Yesus no ben gi son sma krin piki tapu den aksi fu den te a ben sabi taki a sani dati ben o tyari problema kon fu soso (Mt 15:1-6; 21:23-27; Yoh 7:3-10). A de krin taki na a srefi sani disi meki taki Abraham, Isak, Rakab, nanga Elisa kori trawan noso den no fruteri den ala sani finifini, fu di den sma dati no ben e anbegi Yehovah.​—Ge 12:10-19; kap 20; 26:1-10; Yos 2:1-6; Yak 2:25; 2Kow 6:11-23.

23-29 MAART

GUDU NA INI GADO WORTU | GENESIS 27-28

„Yakob e kisi a blesi di a abi reti na tapu”

it-2-O 1333 ¶3

Blesi

Na ini den libimakandra pe famiri-edeman ben e teki fesi, a gwenti ben de taki wan papa ben e blesi en manpikin syatu fosi a dede. A sani disi ben prenspari srefisrefi èn sma ben e si en leki wan bigi grani. Na so Isak blesi Yakob fu di a ben denki taki Yakob ben de en fosi manpikin Esau. Fosi Esau doro, Isak blesi Yakob fu di a ben wani taki sani waka bun gi en. A no de fu taki dati Isak di ben owru èn breni, begi Yehovah fu meki a blesi disi kon tru (Ge 27:1-4, 23-29; 28:1, 6; Heb 11:20; 12:16, 17). Bakaten di Isak kon yere san ben pasa, a taigi Yakob ete wan leisi sortu blesi a ben o kisi èn a fruteri en moro fini san a blesi wani taki (Ge 28:1-4). Fosi Yakob dede, a blesi den tu manpikin fu Yosef èn baka dati a blesi den manpikin fu en (Ge 48:9, 20; 49:1-28; Heb 11:21). Na so a de tu taki fosi Moses dede, a blesi a heri pipel Israel (De 33:1). Te wi e luku fa sani waka bakaten, dan wi e si taki den blesi disi ben de profeititori. Son leisi te sma ben e gi trawan den sortu blesi disi, dan a sma di ben e gi a blesi ben e poti en anu na tapu na ede fu a sma di ben e kisi a blesi.​—Ge 48:13, 14.

30 MAART–5 APRIL

GUDU NA INI GADO WORTU | GENESIS 29-30

„Yakob e trow”

it-1-O 1120 ¶3

Trowlibi

Trowfesa. Te tu sma na ini Israel ben e trow, sma no ben e du spesrutu sani fu trow den. Toku den ben e hori wan fesa fu meki prisiri. Na a dei fu a trowfesa, a trowmisi ben de na oso èn a ben e teki en ten fu sreka ensrefi. A ben e wasi fosi èn a ben e lobi switismeri-oli gi en skin. (Luku Ru 3:3; Ese 23:40.) Dan a ben e weri wan berebanti nanga wan weti krosi. Son leisi tra uma ben e yepi en fu du dati. Efu a ben de fu wan gudu famiri, dan nofo tron moimoi sani ben nai na tapu a krosi disi (Yer 2:32; Opb 19:7, 8; Ps 45:13, 14). A ben e weri gowtu nanga ala sortu moimoi sani efu a ben abi den sani dati (Yes 49:18; 61:10; Opb 21:2). Baka dati a ben e poti wan moi duku tapu en ede, èn a duku dati ben e fadon te na en futu (Yes 3:19, 23). Disi e yepi wi fu frustan fa a du kon taki Laban ben man kori Yakob so makriki fu trow nanga Lea na presi fu Rakel (Ge 29:23, 25). Rebeka ben tapu en ede nanga wan duku di a waka go miti Isak (Ge 24:65). A sani disi ben e prenki taki a trowmisi ben e saka ensrefi na ondro a trowmasra fu en.​—1Kor 11:5, 10.

Diki moro dipi

it-1-O 13

Te wan sma e teki wan tra sma pikin leki en eigi pikin

Rakel nanga Lea ben e si den pikin di den umasrafu fu den ben kisi nanga Yakob leki ’den eigi pikin’ (Ge 30:3-8, 12, 13, 24). Neleki den pikin fu den tu wefi fu Yakob, den boi disi ben o kisi wan pisi tu fu a famirigudu, fu di Yakob ben de a papa fu den. Fu di den umasrafu ben de fu Rakel nanga Lea, meki Rakel nanga Lea ben abi a reti fu si den pikin fu den umasrafu leki den eigi pikin.