MWBR20 06 Verwijzing gi Wi Kresten libi nanga a preikiwroko studie-buku

8-14 YUNI

Diki moro dipi

it-1-O 1108 ¶1

Sani di sma ben gwenti du

Tapu den ai fu wan dedesma. Di Yehovah taigi Yakob taki ’Yosef o de a sma di o tapu en ai’ (Ge 46:4), dan disi ben de wan fasi fu taki dati Yosef ben o tapu den ai fu Yakob baka te a dede. A ben de a frantwortu fu a fosi geborewan fu du dati. Na so wan fasi Yehovah sori Yakob taki na Yosef ben musu kisi a reti fu a fosi geborewan.​—1Kr 5:2.

nwtsty ete wan tu sani na Tor 7:14

Ala nanga ala na 75 sma: Stefanus no ben taki fu wan spesrutu tekst na ini den Hebrew buku fu Bijbel, di a taki dati 75 sma ben go nanga Yakob na Egepte. A nomru disi no de fu feni na ini den pisi fu Bijbel di den Masoreetsma ben skrifi abra. Ge 46:26 e taki: „Ala nanga ala, den sma di komoto fu Yakob èn di go nanga en na Egepte, boiti den wefi fu den manpikin fu Yakob, ben de siksitenti nanga siksi sma.” Vers 27 e taki tu: „Ala nanga ala seibitenti sma fu na osofamiri fu Yakob ben kon na Egepte.” Dyaso den teri den sma na tu difrenti fasi. A kan taki a fosiwan abi fu du nanga den bakapikin fu Yakob wawan èn a di fu tu e taki fu ala den sma di ben go na Egepte. Eks 1:5 nanga Deut 10:22 e taki sosrefi dati na „70” bakapikin fu Yakob ben go na Egepte. A gersi leki Stefanus e kari ete wan nomru di e sori taki moro sma ben go nanga Yakob. Son sma e taki dati disi na den manpikin nanga granpikin fu Manase nanga Efrayim. Den nen disi de fu feni na ini a Septuaginta Vertaling fu Gen 46:20. Tra sma e taki dati disi na den wefi fu den manpikin fu Yakob di kari ini Gen 46:26. Sobun ala nanga ala, a ben kan de „75” sma. A kan tu taki a nomru disi ben de na ini den Hebrew buku fu Bijbel na a ten fu a fosi yarihondro baka Krestes. Furu yari langa, sabiman ben taki dati a nomru „75” ben skrifi na ini Ge 46:27 nanga Eks 1:5 fu a Griki Septuaginta. Boiti dati, den tu Dede Se Lolo di e taki fu Eks 1:5, di sma feni na ini a di fu twenti yarihondro, abi a srefi nomru disi tu. A kan taki na wan fu den owru dokumenti disi Stefanus ben gebroiki fu kon sabi omeni sma ben go na Egepte. A sani disi e sori taki difrenti fasi de fu teri omeni bakapikin ben go nanga Yakob na Egepte.

15-21 YUNI

GUDU NA INI GADO WORTU | GENESIS 48-50

it-1-O 1195 ¶6

Yakob

Syatu fosi Yakob dede, a blesi den granpikin fu en. Nanga yepi fu a santa yeye a blesi Efrayim fosi, na presi fu Manase di ben de a moro owru manpikin fu Yosef. A taigi Yosef di ben o kisi a reti fu a fosi geborewan, den wortu disi: ’Mi o gi yu wán pisi kontren moro leki san mi o gi den brada fu yu. A pisi disi mi puru na a anu fu den Amorietsma, fu di mi feti nanga den nanga mi feti-owru èn nanga mi bo’ (Ge 48:1-22; 1Kr 5:1). Yakob ben bai a pisi gron fu den manpikin fu Heimor, di ben de a papa fu Sikem (Ge 33:19, 20). Sobun wi kan taki dati Yakob ben e bribi taki den bakapikin fu en ben o tan na ini a kondre Kanan. A ben taki a profeiti tori disi leki a ben pasa kaba èn leki na ensrefi ben feti nanga den Amorietsma. (Luku AMORIET.) Den tu pisi gron di Yosef ben kisi ben o de fu den lo Efrayim nanga Manase.

it-2-O 140 ¶2

Lasti dei

A profeititori di Yakob taki syatu fosi a dede. Di Yakob taigi den manpikin fu en: „Un kon na wán, so taki mi kan fruteri unu san o pasa nanga unu na ini a ten di e kon”, dan a ben sori go na a ten te den sani di a ben taki o kon tru. (Ge 49:1) Tu hondro yari na fesi Yehovah ben taigi Abram (Abraham), a granpapa fu Yakob, taki den bakapikin fu en ben o nyan pina 400 yari langa. (Ge 15:13) Fu dati ede di Yakob ben taki fu „a ten di e kon,” dan a ben taki fu a ten baka den 400 yari. (Fu kon sabi moro fu Genesis 49, dan luku den pisi di e taki fu den manpikin fu Yakob. Luku na den nen fu den.) A profeititori disi di ben abi fu du tu nanga na „Israel fu Gado” ben o kon tru bakaten.​—Ga 6:16; Ro 9:6.

22-28 YUNI

Diki moro dipi

g04-O 8/4 6 ¶5

Moses ben de wan trutru sma?

Fu san ede wi kan bribi taki na umapikin fu a kownu fu Egepte ben o teki so wan pikin? Den Egeptesma ben e bribi taki den ben musu du bun gi trawan fu kan go na hemel. Joyce Tyldesley di de wan sabiman fu owruten sani e taki: „Den umasma fu Egepte ben abi den srefi reti leki den mansma. Den ben man du bisnis nanga tra sani èn . . . densrefi ben kan bosroiti fu kweki tra sma pikin tu.” Disi e kon na krin na ini wan owru dokumenti di e taki fu wan Egepte uma di teki den srafu fu en leki en pikin. Na Anchor Bible Dictionary e taki: „Moses mama ben e kisi pai fu gi en bobi èn fu sorgu gi en. . . . A sani disi e kruderi nanga owruten kontrakti di e taki fu a kweki di sma ben e kweki tra sma pikin.”

29 YUNI–5 YULI

Diki moro dipi

it-1-O 1222 ¶1

Yehovah

Fu „sabi” wan sma noso wan sani, no wani taki dati yu sabi en bun èn taki yu e frutrow en. A don man Nabal ben sabi David, ma toku a ben aksi, „Suma na David?” Nanga tra wortu a ben aksi „Suma na David taki mi musu poti prakseri na en?” (1Sa 25:9-11; luku 2Sa 8:13.) Na a srefi fasi a Kownu fu Egepte ben taigi Moses: „Suma na Yehovah taki mi musu gi yesi na en, èn seni Israel gowe? Mi no sabi Yehovah kwetikweti, èn boiti dati, mi no sa seni Israel gowe.”(Eks 5:1, 2) Na so a Kownu ben sori taki a no sabi Yehovah leki a tru Gado, taki Yehovah no abi makti tapu Egepte èn taki Yehovah no man kon taigi en noti nanga yepi fu Moses nanga Aron. Ma now a kownu, ala den Egeptesma, nanga den Israelsma ben o kon sabi suma na Yehovah èn san a nen fu en wani taki trutru. Soleki fa Yehovah ben taigi Moses dan disi ben o abi leki bakapisi taki den Israelsma ben o kon fri. Boiti dati, a ben o gi den a pramisi kondre neleki fa a ben pramisi den afo fu den. Na so a sani di Gado ben taki feni presi: „Unu sa sabi taki mi na Yehovah, un Gado”​—Eks 6:4-8.; luku ALMACHTIGE.