MWBR20 05 Verwijzing gi Wi Kresten libi nanga a preikiwroko studie-buku

4-10 MEI

GUDU NA INI GADO WORTU | GENESIS 36-37

Diki moro dipi

it-1-O 568

Edom

(Edom) [san wani taki redi], Edomsma.

Edom ben de wan tra nen di Esau, a twelengi brada fu Yakob, ben kisi tu (Ge 36:1). A ben kisi a nen dati fu di a ben seri a reti di a ben abi leki fosi manpikin gi wan preti fu a redi pesi di en brada ben bori (Ge 25:30-34). A moi fu sabi tu taki di Esau gebore, a ben redi srefisrefi (Ge 25:25). Boiti dati, a gron nanga den ston na son presi fu a kondre di den afo fu en kisi bakaten, ben abi a srefi kloru dati.

it-2-O 1133

A frantwortu fu luku wan sma, noso wan sani

Te wan sma ben taki dati a ben o kweki noso luku skapu noso kaw gi wan trawan, dan nanga dati a ben e sori taki a teki a frantwortu fu den meti dati na en tapu. A sani disi ben e kruderi nanga a wet. A sma di ben teki a frantwortu disi na en tapu ben e gi a wan di abi den meti a dyaranti taki a ben o sorgu taki den meti kisi nyan èn taki sma no fufuru den, noso na en ben o pai gi dati. Ma dati no ben wani taki dati na en ben musu tyari a frantwortu fu ala sani di ben kan pasa nanga den meti. A wet ben e sori taki te ogri meti ben kiri wan skapu, dan a sma dati no ben abi fu tyari a frantwortu fu dati, fu di a no ben man yepi taki a sani disi pasa. Ma fu man sori taki a no en ben abi a fowtu, a ben musu tyari buweisi kon, fu eksempre, a dedeskin fu a meti di ogri meti ben kiri. Te a sma di ben abi den meti ben si a buweisi dati, dan a ben musu taki krin taki a trawan no fowtu.

Sma ben musu hori densrefi na den wet disi, awinsi sortu sani den ben musu luku gi trawan. Den ben musu du dati srefi te den ben abi a frantwortu fu luku famiriman. Fu eksempre, a moro bigi brada ben abi a frantwortu fu luku den pikin brada nanga sisa fu en. Dati meki wi kan frustan fu san ede Ruben di ben de a moro bigi brada, ben e broko en ede nanga Yosef di den tra brada taki dati den ben o kiri en. Wi kan leisi dati na Genesis 37:18-30. „Dati meki [Ruben] taki: ’Meki wi no kiri en.’ . . . ’No meki brudu lon. . . . No du ogri nanga en.’ A ben abi na prakseri fu puru Yosef na den anu, so taki a ben kan tyari en go baka na en papa.” Di Ruben kon si taki Yosef no ben de drape moro pe den ben libi en, dan „a priti en krosi, fu di a ben e sari”. A bari: „A boi no drape moro! San mi o du now?” A ben sabi taki en papa ben o taki dati na en ben musu sorgu taki noti no pasa nanga Yosef. Fu di den brada fu Yosef ben o abi fu gi frantwortu fu san pasa nanga Yosef, meki den bosroiti fu kori a papa fu den taki wan ogri meti kiri en. Fu sori taki na dati ben pasa, den dopu a langa krosi fu Yosef na ini a brudu fu wan krabita. Baka dati den tyari a krosi disi gi Yakob, a papa fu den di ben abi a frantwortu fu krutu sani leki osofamiri-edeman. Di Yakob si a krosi fu Yosef di ben flaka nanga brudu, dan a kon frustan taki na wan ogri meti kiri Yosef. Dati meki a no gi Ruben a fowtu fu a sani di pasa.​—Ge 37:31-33.

WI KRESTEN LIBI

„Yu de srekasreka?”

g17.5-O 6

Yu abi ala sani di de fanowdu?

Organisâsi di e yepi sma te rampu pasa, e gi osofamiri deki-ati fu poti sani na wan sei di den o abi fanowdu wantewante te rampu pasa èn ibri yari den musu luku efu den musu kenki wan tu fu den sani dati. A no de fu taki dati a no ala sma o abi den srefi sani fanowdu fu di a no ala sma e tan na a srefi presi èn a situwâsi fu sma e difrenti tu. Dati meki yu musu luku sortu rai den organisâsi na ini a kontren fu yu e gi.

A rai di den e gi nofotron, na taki yu musu abi awinsi 11 liter watra gi ibri sma èn taki yu musu abi nyanyan sani gi dri dei. Den nyanyan sani disi musu man tan bun, so taki yu no abi fu bori den fosi yu nyan den.

Son osofamiri sreka tas di den kan teki tyari gowe wantewante èn a tas abi den sortu sani disi na ini:

• Deken, drei krosi (fu weri), bun susu

• Flashlight, radio (di yu kan charge sondro stroom, noso di e drai tapu batterij), nanga moro batterij

• Sani soleki pleister nanga verband èn wan froiti fu hari sma prakseri te yu de na nowtu

• Sani soleki spun, preti, nanga nefi, wan opener, pikin nefi di yu kan fow poti na ini yu saka, swarfu di kan nati noso kandra

• Stofmasker, waterproof tape, nanga tapolin

• Tifibosro, sopo, wasduku, nanga toilet papira

• Sani fu sorgu yu pikin nanga spesrutu sani di owrusma noso sma di malengri abi fanowdu

• Wan blik noso baki nanga dresi di yu abi fanowdu (watra no musu man go na ini), kopi fu datra recept, nanga tra prenspari papira

• Wan lijst nanga nomru di yu kan bel te nowtu de, wan lijst fu konmakandra presi, èn wan karta fu a kontren pe yu de

• Credit karta nanga moni

• Extra sroto fu yu oso èn fu yu wagi

• Papira, potlood, buku, nanga preisani gi pikin

• Bijbel

11-17 MEI

GUDU NA INI GADO WORTU | GENESIS 38-39

„Noiti Yehovah gowe libi Yosef”

Diki moro dipi

it-2-O 468

Onan

(Onan) [wan nen di komoto fu wan wortu di wani taki „bigi krakti”].

Wan manpikin fu Yuda. A ben de a di fu tu pikin di a ben kisi nanga na umapikin fu Sua, di ben de fu Kanan (Ge 38:2-4; 1Kr 2:3). Yehovah ben kiri Onan en bigi brada Er, fu di a ben du wan sani di Yehovah no feni bun. Fu di Er no ben abi pikin, meki Yuda taigi Onan fu teki en frantwortu leki swagri na en tapu fu trow nanga Tamar, a wefi fu Er. Efu den ben o kisi wan manpikin, dan a no ben o sorgu taki a nen fu Onan en famiri no lasi gowe. Na a manpikin disi ben o kisi a famirigudu leki fosi geborewan fu Er. Ma efu den no ben o kisi wan pikin, dan na Onan ben o kisi a famirigudu dati. Te Onan ben e abi seks nanga Tamar, „a ben e lusu en skiti na gron”, na presi fu lusu en na ini Tamar. Disi no wani taki dati Onan ben e prei nanga en syenpresi, fu di Bijbel e sori taki „a ben e didon nanga a wefi fu en brada”. Yehovah no ben kiri Onan fu di a ben prei nanga en syenpresi. Ma a kiri en fu di a ben trangayesi en papa, fu di a ben gridi, èn fu di a no ben lespeki a trowlibi di de wan seti fu Gado. Yehovah kiri Onan sondro taki a ben meki pikin.​—Ge 38:6-10; 46:12; Nu 26:19.

25-31 MEI

GUDU NA INI GADO WORTU | GENESIS 42-43

„Yosef e hori ensrefi”

it-1-O 1343 ¶5

Yosef

Fu di den sani disi ben pasa, meki den afubrada fu Yosef kon si taki Gado ben e strafu den fu di den ben seri a brada fu den leki srafu wan tu yari na fesi. Di den ben e tanapu na fesi a brada fu den, aladi den no ben sabi taki na en, dan den taki fu a fowtu di den ben meki. Den sani di den ben e taki, meki Yosef kon si taki den ben abi berow. Fu di a no ben man hori ensrefi moro, meki a gowe fu drape èn a bigin krei. Di a drai go baka na den, a meki sma tai Simeon èn a no ben o lusu en teleki den ben drai kon baka nanga a pikin brada fu den.​—Ge 42:21-24.

Diki moro dipi

it-2-O 758

Ruben

A ben de krin taki Ruben ben abi bun fasi di a taigi den neigi brada fu en fu no kiri Yosef, ma fu trowe en go na ini wan drei watrapeti. Ruben du dati fu di a ben abi na prakseri fu drai go baka fu puru Yosef na ini a peti, sondro fu den brada sabi (Ge 37:18-30). Moro leki 20 yari baka dati, sma krutu den srefi brada disi taki den ben kon luku a kondre Egepte na wan kibri fasi. A sani dati meki den denki taki na Gado ben e strafu den fu di den ben du ogri nanga Yosef. Ne Ruben memre den taki a ben warskow den fu no du ogri nanga Yosef (Ge 42:9-14, 21, 22). Di den brada ben musu go na Egepte fu a di fu tu leisi, dan Yakob no ben wani meki Benyamin go nanga den. Ma na Ruben ben wani gi Yakob den tu manpikin fu en leki dyaranti. A taki: „Yu kan kiri den tu manpikin fu mi efu mi no tyari Benyamin kon baka gi yu.”​—Ge 42:37.