MWBR20 12 Verwijzing gi Wi Kresten libi nanga a preikiwroko studie-buku

7-13 DECEMBER

GUDU NA INI GADO WORTU | LEFITIKUS 10-11

„Lobi Yehovah moro leki yu famiri”

it-2-O 489

Sondro fu kisi primisi

Bron switismeri sondro fu kisi primisi. Lefitikus 10:1 gebroiki a Hebrew wortu di vertaal nanga zar (noso za·rahʹ; san wani taki: wan sani di sma no sabi) gi a faya di den manpikin fu Aron, Nadab nanga Abihu, ’ben bron na fesi Yehovah aladi a no ben gi den primisi fu du dati.’ Dati meki Yehovah kiri den nanga faya (Le 10:2; Nu 3:4; 26:61). Bakaten Yehovah taigi Aron: „Te yu nanga den manpikin fu yu kon na ini a konmakandra-tenti, un no musu dringi win noso tra sani di abi sopi na ini, noso unu o dede. A de wan wèt di unu nanga den bakapikin fu unu musu hori ala ten. Dan unu o sabi krin san na wan santa sani èn san na wan sani di no santa, sosrefi san krin èn san no krin. Boiti dati, unu o man leri den Israelsma ala den wet di Yehovah gi den nanga yepi fu Moses” (Le 10:8-11). A sani disi e sori taki a kan taki na sopi Nadab nanga Abihu ben dringi, meki den go bron switismeri aladi Yehovah no ben gi den primisi fu du dati. Yehovah no ben feni a sani disi bun fu di den no ben du en na a ten di a ben wani, na a presi pe a ben wani èn na a fasi di a ben feni bun. A kan tu taki den ben bron wan switismeri di ben meki tra fasi leki san skrifi na ini Eksodes 30:34, 35. A sani disi ben de wan seryusu sondu, aladi den no ben de nanga krin frustan.

Diki moro dipi

it-1-O 504 ¶2

Meti

Den wet disi di e taki sortu meti sma no ben mag nyan, ben de soso gi sma di ben de na ondro a wet fu Moses. Lefitikus 11:8 e taki: „Gi unu, den meti disi no krin”, sobun gi den Israelsma. Baka di Yesus Krestes pai a lusu-paiman gi wi, dan den wet disi no ben e teri moro. Sobun wi no abi fu hori wisrefi moro na den wet disi. Now ala libisma kan hori densrefi na san Yehovah ben taigi Noa baka a frudu.​—Kol 2:13-17; Ge 9:3, 4.

14-20 DECEMBER

GUDU NA INI GADO WORTU | LEFITIKUS 12-13

„San wi e leri fu den wet di e taki fu gwasi”

it-2-O 285 ¶9

Gwasi

Na krosi nanga oso. Gwasi ben kan kon tapu linnen krosi nanga krosi di meki fu metibuba. Son leisi a ben kan wasi puru, èn sma ben kan poti a sani dati aparti. Ma efu a flaka disi di ben abi wan geri-grun kloru noso wan rediredi kloru no ben komopo, dan na ben wan takru sortu gwasi. Den ben musu bron a sani di kisi a gwasi disi (Le 13:47-59). Efu den srefi sortu flaka disi ben de na wan oso, dan sma no ben mag go na ini na oso dati. A kan taki den ben musu krabu a muur pe den flaka ben de noso den ben musu broko den ston puru. Den ben musu tyari den sani disi go trowe na dorosei fu a foto, na wan presi di no krin. Efu a siki ben kon baka na a oso, dan na oso no ben krin moro. Den ben musu broko a heri oso èn den ben musu tyari ala sani go trowe na wan presi di no krin. Ma efu na oso no ben kisi den flaka moro, dan den ben musu du wan tu sani fu meki a kon krin (Le 14:33-57). Sma e taki dati a gwasi di ben e kisi krosi noso oso ben de wan sortu buku, ma den no de seiker fu a sani disi.

21-27 DECEMBER

GUDU NA INI GADO WORTU | LEFITIKUS 14-15

„Wi musu de krin fu man teki prati na a soifri anbegi”

it-1-O 223

Wasi

Difrenti reide de fu san ede den Israelsma ben musu wasi densrefi fu kon krin. Iniwan sma di ben kon betre fu gwasi, ibri sma di ben hori wan sani fu wan sma di en syenpresi ben e puru wan „watrawatra sani”, ibri mansma di ben puru skiti, ibri umasma di ben kisi en munsiki noso di ben lasi brudu fu wan langa pisiten noso ibri sma di ben abi seks, ’no ben krin’. Den ben musu wasi fu kon krin (Le 14:8, 9; 15:4-27). Wan sma di ben fasi wan dedeskin noso di ben go na ini a tenti pe wan dedeskin ben de, ’no ben krin.’ A ben musu krin ensrefi nanga a watra di e meki sma kon krin. Ibri sma di no ben wani hori ensrefi na a wet disi, ’ben musu kiri puru na mindri a pipel, fu di a du wan sani di meki taki a santa presi fu Yehovah no krin moro’ (Nu 19:20). Te Bijbel e taki fu wasi na wan agersi fasi, dan disi fiti fu di a e sori taki wi abi fu de krin fu man kon na fesi Yehovah (Ps 26:6; 73:13; Yes 1:16; Ese 16:9). Wi kan agersi Gado Wortu nanga watra di e wasi wi kon krin.​—Ef 5:26.

it-2-O 296 ¶4

Munsiki

Wan uma no ben krin tu efu a ben e lasi brudu aladi a no de a ten fu en munsiki, noso efu a e „lasi brudu moro langa leki te a kisi en munsiki.” Efu a ben sidon noso didon tapu wan sani, dan a sani disi no ben krin. Ibri sma di ben fasi den sani disi, no ben krin tu. Baka te a no ben lasi brudu moro, a ben musu wakti ete seibi dei fosi a ben kan kon krin. Tapu a di fu aiti dei, a ben musu tyari tu stondoifi noso tu osodoifi gi a priester, fu a ben kan aksi pardon gi en. A ben o gi wan leki sondu-ofrandi èn a trawan leki bron-ofrandi.​—Le 15:19-30; Luku REIN, REINHEID.

it-1-O 1002

Santa presi

2. A konmakandra-tenti èn bakaten, a tempel. Dati ben de a heri dyari di ben skotu lontu a tabernakel noso a tempel. Den dyari disi ben de wan santa presi (Eks 38:24; 2Kr 29:5; Tori 21:28). Den moro prenspari sani na ini a dyari ben de na altari nanga a kopro beki. Den sani disi ben santa. Na soso den sma di ben meki kon krin ben kan go na ini a dyari fu a tabernakel noso a tempel. Sma di no ben krin no ben mag go drape. Fu eksempre, wan uma di no ben krin no ben mag fasi nowan santa sani èn a no ben musu go na a santa presi tu (Le 12:2-4). Soleki fa a sori, dan a tabernakel no ben o de krin tu te den Israelsma ben tan du sani fu doti densrefi (Le 15:31). Sma di ben musu tyari ofrandi fu kan kon krin fu gwasi, ben e tyari na ofrandi gi den priester na a mofodoro fu a konmakandra-tenti (Le 14:11). Nowan sma di no ben krin ben musu nyan fu wan freide-ofrandi na a tabernakel noso a tempel. Efu wan sma ben du dati, a ben musu dede.​—Le 7:20, 21.

Diki moro dipi

it-2-O 496 ¶5

Yesi

Di den priester ben poti na wroko na ini Israel, Moses ben kisi a komando fu poti pikinso fu a brudu fu a manskapu na a retisei yesibuba fu Aron, na tapu a doin fu en reti-anu èn na tapu a bigidoin fu en retisei futu. A ben musu du disi nanga den manpikin fu Aron tu. Disi ben o sori taki den sani di den ben o yere, a fasi fa den ben o du a wroko fu den nanga a fasi fa den ben o waka, ben o kruderi nanga den sani di ben pasa drape (Le 8:22-24). Na so a priester ben musu du tu nanga wan sma di ben abi gwasi èn di ben musu meki kon krin. Soleki fa a wet ben taki, dan a ben musu teki pikinso fu a brudu fu a manskapu di ben tyari leki sondu-ofrandi èn a ben musu poti dati na a retisei yesibuba fu a sma. Baka dati a ben musu du disi tu nanga na oli di a sma ben tyari leki ofrandi (Le 14:14, 17, 25, 28). Den ben du den srefi sani disi tu te wan srafu ben bosroiti taki a o tan wroko en heri libi langa gi en basi. Den ben musu tyari en go na wan doropostu pe a basi ben musu boro a yesi fu a srafu nanga wan prin. A marki disi ben o sori taki a srafu o tan gi yesi na a basi fu en.​—Eks 21:5, 6.

g-O 1/06 14, a faki

Buku​—A bun noso a ogri!

BIJBEL E TAKI FU BUKU?

Bijbel e taki dati ’gwasi ben kan kon na ini wan oso’ sobun a ben kan kisi den muur fu na oso (Lefitikus 14:34-48). Sma e taki dati a gwasi disi ben de wan takru sortu gwasi. Den e taki dati a ben de wan sortu buku, aladi den no de seiker fu dati. Gado ben taigi den Israelsma taki efu na oso fu den ben kisi a gwasi disi, dan den ben musu puru den ston di abi den flaka. Den ben musu krabu ala a tokotoko di plèister na den muur èn den ben musu trowe dati na dorosei fu a foto na wan presi ’di no krin.’ Efu a gwasi ben kon baka, dan na oso no ben krin. Den ben musu broko en puru èn trowe den sani disi. Den wet di Yehovah ben gi en pipel ben sori taki a lobi den trutru èn a ben wani taki den de gosontu.

28 DECEMBER–3 YANUARI

GUDU NA INI GADO WORTU | LEFITIKUS 16-17

Diki moro dipi

it-1-O 205 ¶6

Asasèl-bokoboko

Na apostel Paulus ben taki dati, fu di Yesus ben gi en volmaakti libi leki wan ofrandi fu den sondu fu libisma, meki a du moro leki san ’a brudu fu mankaw nanga bokoboko’ ben man du (Heb 10:4, 11, 12). Di a du disi a teki den sondu fu wi na en tapu. Na en „tyari den siki fu wi” èn den „dyuku en fu wi sondu ede” (Yes 53:4, 5; Mt 8:17; 1Pe 2:24). A tyari den sondu fu ala den wan di poti bribi na ini a frulusu ofrandi fu en. Na so a sori krin taki Gado seti sani fu sorgu taki te fu kaba wi no o sabi moro san na sondu. Na so na „Asasèl-bokoboko” e prenki na ofrandi fu Yesus Krestes.