Den firi a lobi fu a gemeente

YOMARA nanga den brada fu en di nen Marcelo nanga Hiver, e libi na ini wan pikin dorpu na ini Gwatemala. Yomara bigin studeri Bijbel nanga den Yehovah Kotoigi èn te fu kaba den brada fu en bigin studeri tu. Ma den ben abi wan problema. Den ala dri breni èn den no ben man leisi Braille (wan spesrutu fasi fu skrifi sani so taki brenisma man leisi en nanga den finga). Dati meki a brada di ben e studeri nanga den ben e leisi den paragraaf nanga den Bijbeltekst fu a les gi den.

A ben muilek tu gi den fu go na den konmakandra. A ben e teki 40 miniti fu go na a moro krosibei Kownukondre zaal èn den wawan no ben man go. Ma den brada na ini a gemeente seti sani fu tyari den go na ala den konmakandra. Èn di Yomara nanga den brada fu en bigin kisi toewijzing na den mindriwiki konmakandra, dan den brada nanga sisa yepi den fu leri a lezing fu den na ede.

Na ini mei 2019, gemeente konmakandra bigin hori na ini a dorpu fu den. Na a ten dati, wan pionier trowpaar ben froisi go tan drape. Den no ben sabi fa fu leisi noso skrifi Braille, ma den ben wani leri Yomara nanga den brada fu en fa fu du dati. Dati meki den go na wan bibliotheek fu leni buku di e leri sma fa fu yepi trawan fu gebroiki Braille.

Wan tu mun baka dati, Yomara nanga den brada fu en ben man leisi Braille heri bun èn dati yepi den fu go na fesi na ini a gemeente. Now Yomara, Marcelo, nanga Hiver e dini leki gewoon pionier. Marcelo na wan dinari ini a diniwroko. Heri wiki den e wroko tranga gi Yehovah. Den e dini Yehovah so fayafaya taki trawan e kisi deki-ati fu du a srefi.

Yomara nanga den brada fu en breiti nanga a yepi di den e kisi fu a gemeente. Yomara taki: „Sensi a fosi leisi di mi miti den Kotoigi, den sori trutru Kresten lobi gi wi.” Marcelo taki: „Wi feni bun mati na ini a gemeente fu wi èn now wi abi brada nanga sisa na heri grontapu di lobi makandra.” Yomara nanga den brada fu en e angri gi a dei te den o si taki heri grontapu tron wan paradijs.​—Ps. 37:10, 11; Yes. 35:5.