Yepi brenisma fu kon sabi Yehovah
1. Fa Yesus sori taki a abi sari-ati nanga brenisma?
1 A ben de wan tu dei fosi Yesus dede. Di a ben e komoto fu a foto Yerikow, tu breniman di ben e begi sma sani, bari gi en: „Masra, . . . abi sari-ati nanga wi!” Aladi Yesus ben sabi taki hebi tesi ben o miti en, toku a tan tanapu, a kari den breniman kon èn a meki den si baka (Mat. 20:29-34). Fa wi kan sori taki wi abi sari-ati nanga brenisma neleki Yesus?
2. Fa wi kan preiki gi wan brenisma di wi miti?
2 Yepi den: Te yu miti wan brenisma, kande na tapu strati, dan taigi en fa yu nen èn aksi efu yu kan yepi en. Fu di nofo tron sma no e sori lespeki gi brenisma, meki a kan taki a sma no frutrow yu. Ma te yu e sori switifasi gi en èn a frustan taki yu wani yepi en trutru, dan dati kan meki taki a no o frede yu moro. Hori na prakseri tu taki son sma breni èn taki trawan man si pikinso ete. Te yu sabi disi, dan yu o sabi fa yu musu yepi en. Baka te yu yepi a sma, dan yu kan taigi en taki yu e leri sma sani fu Bijbel. Aksi efu yu kan leisi wan Bijbeltekst gi en soleki Psalm 146:8 noso Yesaya 35:5, 6. Efu a man leisi Braille, den letter di brenisma e leisi nanga den finga, dan aksi en efu a wani wan buku na ini Braille di o yepi en fu leri moro fu Bijbel. Yepi en tu fu download den buku nanga brochure di sma kan arki tapu jw.org. Efu a abi wan programa tapu en computer di man leisi sani gi en, dan kande a kan arki wan tu artikel na jw.org.—Luku a faki di nen „Te yu e yepi wan brenisma . . . ”
3. Fa wi kan suku den brenisma na ini wi kontren?
3 Suku brenisma: Nofo tron wi no e miti brenisma te wi e preiki oso fu oso, fu di furu fu den e frede fu taki nanga wan sma di den no sabi èn di kon na den mofodoro. Dati meki wi musu „suku” den sma disi so taki wi kan preiki gi den (Mat. 10:11). Yu sabi wan sma na yu wrokope noso na skoro di breni? Meki muiti fu go taki nanga en. Efu wan skoro gi brenisma de na ini a kontren pe yu e preiki, dan aksi den efu den wani buku na ini Braille gi a bibliotheek fu a skoro. Yu sabi wan sma di abi wan famiriman di breni? Organisâsi de na ini a kontren fu yu di e yepi brenisma noso spesrutu presi de pe brenisma e tan? Fruteri a famiriman, a secretaresse noso a driktoro fu a presi taki Yehovah Kotoigi wani yepi brenisma trutru èn aksi efu yu mag tyari buku na ini Braille noso buku tapu CD gi den. Sori en a pramisi na ini Bijbel taki Gado o sorgu taki nowan sma no o breni moro. Yu kan sori en a video tu fu jw.org di nen „Zonder zou ik me verloren voelen”. Na ini a video disi wan breniman e fruteri fa a kisi wini fu di a man leisi Bijbel na ini Braille. Te yu e fruteri fu san ede yu kon drape, dan disi kan opo a pasi gi yu fu miti brenisma.
4. San wi e leri fu na ondrofenitori fu Janet?
4 Wan breni sisa di nen Janet go na wan presi pe brenisma e tan. Drape a bigin taki nanga wan yongu uma. Janet taigi en: „Yesus dresi brenisma fu sori san a o du gi ala sma di breni.” Den taki fu Openbaring 21:3, 4 èn Janet fruteri fa Gado Kownukondre o meki a pramisi disi kon tru. Na uma tan tiri, dan a taki: „Noiti mi yere wan brenisma srefi taki a sani disi. Furu sma di man si, abi a denki taki sma kon breni fu di den, noso den bigisma fu den du wan sani di no bun.” Janet e-mail na uma wan link fu a Bijbel leri-buku èn now den e studeri tu leisi wan wiki.
5. Wi no man dresi brenisma neleki Yesus, ma sortu blesi wi o kisi te wi e broko wi ede nanga den?
5 A tru taki wi no man dresi brenisma neleki fa Yesus du dati. Ma fu di wi sabi taki a gado fu a grontapu disi breni a frustan fu sma, meki wi wani yepi ala den sma disi di breni na agersifasi èn sosrefi den sma di breni trutru. Wi wani taki den sma disi kon frustan den tru tori na ini Gado Wortu tu (2 Kor. 4:4). Yesus dresi den tu breniman krosibei fu Yerikow fu di a „ben sari” den (Mat. 20:34). Efu wi e sari den brenisma tu, dan wi kan kisi a grani fu yepi wan tu fu den fu kon sabi Yehovah, a Gado di o meki ala brenisma si baka.