Sortoe howpoe de gi den breniwan?
JOHN MILTON ben skrifi en poewematori, Paradise Lost and Paradise Regained (Paradijs di lasi èn Paradijs di wini baka), di e taki foe tranga barinenman, ala di a ben breni dorodoro. Dati Helen Keller ben breni èn dofoe, no ben hori en na baka ini den moeiti di a ben doe foe leri denwan di malengri na skinfasi èn foe jepi den. Ija, foeroe breni sma man libi boen nanga den problema di e kon foe di den breni. Ma fa a ben sa de wan toemoesi boen sani efoe ala sma ben kan prisiri, foe di den kan si boen! Joe sa agri spesroetoe nanga dati efoe joe abi wan sma di joe lobi noso wan mati di breni noso di no man si so boen moro.
A troe, taki ini wan toe kondre, programa di e jepi sma foe kon boen baka noso jepi den foe man doe wroko baka, e leri sma di no man si boen, den wroko di moesoe doe ini na aladei libi. Braille èn dagoe di kisi leri foe tjari wan breni sma, e jepi den brenisma foe sorgoe gi foeroe foe den sani di den abi fanowdoe. Ma tokoe, foeroe sma e si a brenisiki, leki a moro frede siki di wan malengri sma kan abi. Wán skrifiman ben froeklari: „Foe breni, wani taki dati joe e lasi na okasi foe si a moro prenspari pisi foe wi libimakandra di gron tapoe a si di wi man si sani.” Na a srefi ten, foeroe breni sma moesoe bow moro nanga moro tapoe trawan.
Joe e aksi kande, foe san ede so foeroe brenisiki de? We, joe ben jere foe trachoom? A de frantiwortoe gi so wan neigi miljoen kefal foe a brenisiki. The New Encyclopædia Britannica e taki foe trachoom: „A siki kan panja ensrefi foe a wan sma go na a trawan èn a e gro esi-esi pe groepoe sma e libi toemoesi krosibei foe makandra ini pôti libikontren pe sani no krin nofo. A mankeri di sma e mankeri watra foe wasi sani, nanga den doesoendoesoen freifrei di e kon foe di a koenkoen foe libisma e hari den, e jepi foe panja a siki. Ini son kefal, trachoom na wan sociaal problema moro leki wan problema na datra sei; efoe a fasi fa sma e libi kan kon moro boen, a libi di sma e libi ini bigi groepoe toemoesi krosibei foe makandra kan kon moro mendri, den e tapoe freifrei foe kon, èn den e gi a djaranti taki nofo watra sa de, dan esi-esi a nomroe foe a trachoom siki sa saka.” Wan sani foe wán miljoen sma e pina foe onchocerciasis, noso „a brenisiki foe liba”. Noso, fa foe xerofthalmia? Ala di a nen moeilek, na troetori de, taki a de wan sani di e breni foeroe sma. Soekroesiki, difteri, mazel, rode hond, nanga siki di sma e kisi nanga jepi foe seks, kan breni sma toe.
Te wi e kon moro owroe, dan a si di wi man si, e go na baka, kande leki wan bakapisi foe den sortoe siki leki glaucoom èn a siki di e meki taki wan sma no man si boen moro, foe di a geri flaka na ini na ai foe en no boen moro, èn wi no kan frigiti toe taki katarakt kan meki taki wi no man si boen moro. The New Encyclopædia Britannica e skrifi: „Te now ete katarakt na wan siki di e breni foeroe sma ini foeroe kondre na grontapoe, èn san e meki a tori disi moro sari, na taki a de so makriki foe dresi nanga jepi foe operâsi.”
Ala di sma kon sabi moro sani foe oftalmologie, tokoe a gersi taki a ten dati den man poeroe a brenisiki, de boen fara ete. A srefi encyclopedia e taki: „A go di den go na fesi foe kibri sma gi brenisiki, èn a jepi di den e jepi sma nanga dresi èn nanga operâsi, kan abi wini soso gi wan groepoe sma di man kisi sorgoe na datra sei. Foeroe kefal foe brenisiki, di sma ben kan tapoe, sa tan, efoe den markitiki foe njanjan èn a krin di sani moesoe hori krin foe wan bigi pisi foe sma na grontapoe, no e kon moro boen.”
Ala di antibiotica nanga operâsi boen foe gebroiki ini a feti nanga a brenisiki, a howpoe foe kon betre foe ala ten, abi foe doe nanga wan sani di ben pasa so wan toe doesoen jari pasa.
A betre di den breniman ben kon betre ini den dei foe Jesus
Proeberi foe si a situwâsi pe wan man di owroe pikinso moro leki 30 jari e waka tapoe wan foegoefoegoe pasi. Te toe breniman na sei pasi e jere taki a e waka pasa, dan den e bari tranga: „Abi sari-ati nanga wi!” Ala di sma di e tanapoe e loekoe, e taigi den toe breniman foe tapoe den mofo, tokoe den breniman e bari tranga: „Abi sari-ati nanga wi!” Na wan switifasi a man e aksi den: „San oenoe wani meki mi doe gi oenoe?” Nanga faja den e piki: „Meki wi ai kon opo.” Prakseri now: A man e fasi den ai foe den, èn wantewante den e si baka! — Mateus 20:29-34.
Fa disi ben de wan prisiri gi den man disi di ben breni fosi! Tokoe, a brenisiki de na ala sei. Disi ben de wán kefal nomo. Foe san ede a sani disi warti foe abi a prakseri foe joe? Bika a ben de Jesus foe Nasaret di na wan boen-atifasi ben meki den breniman si baka. Te joe loekoe en boen, dan boiti taki den ben ’salfoe en foe meki a boen njoensoe bekènti gi den pôtiwan’, den ben ’seni Jesus go foe meki den brenisma si baka’. — Lukas 4:18.
Sma ben froewondroe foe den sortoe wondroe disi foe meki sma kon betre baka, di ben doe nanga jepi foe a krakti santa jeje foe Gado. Wi e leisi: „Den sma ben froewondroe di den ben si taki den babaw-wan ben taki èn den malengriwan ben waka èn den breniwan ben si, èn den ben prèise a Gado foe Israèl” (Mateus 15:31). Jesus ben poti krakti na tapoe a lobi èn na tapoe a sari-atifasi foe Jehovah Gado, sondro taki a ben kisi wan pai noso foe sori sma den sani di a ben man doe, noso foe soekoe en eigi glori te a ben meki sma kon betre baka na a fasi dati. Ma, Jesus ben abi sari-ati toe gi den sma di breni na jeje fasi èn di abi jepi fanowdoe, foe di sma ben „foefoeroe den èn ben panja den leki skapoe sondro skapoeman”. — Mateus 9:36.
Ala di kande a historia disi de wan sani di abi a belangstelling foe sma, joe e aksi joesrefi kande: Fa a de nanga a ten disi? Foe di ini a ten disi no wan sma e meki sma kon betre baka na a fasi fa Jesus ben doe, a meki di Jesus ben meki sma kon betre wani taki wan sani gi wi? Wan howpoe de gi den brenisma? Grantangi leisi na artikel di e kon now.
[Prenspari pisi na tapoe bladzijde 4]
„Foeroe kefal foe brenisiki, di sma ben kan tapoe foe de, sa tan, efoe den markitiki foe njanjan èn a krin di sani moesoe hori krin foe wan bigi pisi foe sma na grontapoe, no e kon moro boen.” — The New Encyclopædia Britannica