Yehovah arki den begi fu mi

WAN FISITI DI KENKI MI LIBI

Mi gebore tapu 22 december 1929 na ini Noville, wan pkin dorpu di ben abi neigi boerderij. A dorpu disi ben de krosbei fu a foto Bastogne di de na ini de Ardennen, wan bergikontren na ini Belgia. Mi ben abi wan koloku libi di mi ben e tan nanga mi p’pa nanga m’ma na a boerderij fu wi. Mi nanga mi pkin brada Raymond ben e merki den kow nanga anu ibri dei èn ibri leisi wi ben e yepi tu nanga a kotiwroko. Na ini a dorpu fu wi, ala sma ben e yepi makandra.

Mi p’pa Emile nanga mi m’ma Alice, ben de fayafaya Lomsusma. Den ben e go na kerki ibri sonde. Ma na a ten fu 1939, wan tu pionier brada fu Ingrisikondre kon na a dorpu fu wi èn den gi mi p’pa wan abonnement gi a Vertroosting tijdschrift (now a nen Ontwaakt!). Heri esi mi p’pa kon si taki den sani na ini a tijdschrift ben de tru tori èn a sani dati meki taki a bigin leisi Bijbel. Di a tapu fu go na kerki, dan den birtisma fu wi di ben gwenti sori swit’fasi gi wi, bigin gens en fayafaya. Den ben e dwengi mi p’pa fu tan wan Lomsusma, èn den ben lobi hartaki nanga en fu a sani dati.

A ben e hati mi trutru fu si san den ben e du nanga mi p’pa. Dati meki mi begi Gado fu yepi mi p’pa, èn dati na a begi di mi ben taki fu en na a bigin fu na artikel. Di den birtisma no ben e gens mi p’pa so furu moro, dan mi ben breiti srefsrefi. A sani disi ben de wan beweisi gi mi taki Yehovah na a „sma di e arki begi”.

A LIBI NA A TEN FU A DI FU TU GRONTAPUFETI

Tapu 10 mei 1940, den Nazi legre fu Doisrikondre broko kon na ini Belgia èn a sani dati meki taki bigi grupu sma gwe libi a kondre. A famiri fu wi lowe go na a zuidsei fu Fransikondre. Di wi ben de na pasi fu go drape, dan wi ben de na presi son leisi pe den legre fu Doisrikondre nanga Fransikondre ben e feti fayafaya nanga makandra. A situwâsi disi no ben makelek srefsrefi.

Di wi drai go baka na a boerderij fu wi, dan wi si taki sma ben f’furu bijna ala den sani fu wi. Na soso Bobbie, a dagu fu wi, wi feni di wi doro drape. Den ondrofenitori disi meki taki mi ben e aksi misrefi ’Fu san ede feti de èn fu san ede so furu sma e pina?’

Na a ten dati wi kisi furu wini fu den fisiti fu Brada Emile Schrantza di ben de wan getrow pionier èn wan owruman. A gebroiki Bijbel fu sori wi krin fu san ede so furu sma e pina èn a piki den tra aksi di mi ben abi fu a libi. A sani disi yepi mi fu kon moro krosbei fu Yehovah èn mi ben de seiker now taki en na wan Gado fu lobi.

Syatu fosi a grontapufeti kon na wan kba, a ben moro makelek gi mi famiri fu miti èn fu taki nanga den tra Kotoigi. Na ini augustus 1943, Brada José-Nicolas Minet kon na a boerderij fu wi fu hori wan lezing. A aksi wi: „Suma wani dopu?” Mi p’pa opo en anu go na loktu èn mi du dati tu. Wi dopu na ini wan pkin liba krosbei fu a boerderij fu wi.

Na ini december 1944, a legre fu Doisrikondre kon feti wan lasti leisi nanga den kondre na a westsei fu Europa. Disi ben de a lasti bigi feti fu den na ini a Di Fu Tu Grontapufeti, èn sma sabi a feti disi leki na Ardennenoffensief. Wi ben e libi krosbei fu pe den legre ben e feti èn wi ben musu tan na ini na ondrogron kamra fu wi bijna wán heri mun. Wan dei di mi go na dorosei fu gi den meti n’nyan, dan wan tu bom fadon tapu a presi pe wi e tan èn a daki fu a maksin frei gwe. Wan Amerkan srudati di ben de na ini a kawpen krosbei fu mi bari gi mi: „D’don plata!” Mi lon go d’don na en sei èn a poti en helm tapu mi ede so taki mi no kisi mankeri.

MI E GRO KON TRON WAN LEPI KRESTEN

Baka a feti, wi ben abi na okasi fu taki nanga den brada fu wan gemeente na ini a foto Liège di ben de sowan 90 kilometer na a noordsei fu wi. A ben e teki wi 56 miniti fu doro drape. Te fu kba wi ben man seti wan pkin studie grupu na ini Bastogne. Mi feni wan wroko na ini a belasting bisnis èn mi ben abi na okasi fu studeri fu tron afkati. Bakaten mi ben e wroko na ini wan lanti kantoro na ini a foto dati. Na ini 1951, wi orga wan pkin kring-konmakandra na ini Bastogne. Sowan wan hondro sma ben de na a konmakandra disi, sosrefi wan fayafaya pionier sisa di nen Elly Reuter. A ben rei 50 kilometer, noso sowan 31 miniti nanga baisigri fu man doro drape. Fosi yu denki wi kon lobi makandra èn wi meki mofo fu trow. Elly ben kisi wan kari fu go na a Gileadskoro na Amerkankondre. A skrifi den brada na a edekantoro fu taigi den fu san ede a ben feni taki a no ben man de na a skoro. Brada Knorr di ben de fesiman fu na edekantoro na a ten dati, taigi en taki kande wan dei a ben o man kon na a skoro makandra nanga a masra fu en. Wi trow na ini februari 1953.

A srefi yari dati, mi nanga Elly go na a Nyun Grontapu kongres di hori na ini Yankee Stadium na New York. Di wi ben de drape, mi miti wan brada di ben wani gi mi wan bun wroko èn a aksi mi fu froisi kon tan na Amerkankondre. Baka di mi begi Yehovah fu a tori disi, dan mi nanga Elly besroiti taki mi no ben o teki a wroko èn wi drai go baka na Belgia fu horbaka gi a pkin grupu na ini Bastogne di ben abi sowan tin preikiman. A yari baka dati, wi ben breiti srefsrefi di Elly kisi wan pkin boi di ben nen Serge. Ma a sari taki seibi mun baka dati, Serge kon siki èn a dede. Mi begi Yehovah fu ferteri en fa wi ben e sari, èn na opobaka howpu ben de wan bigi trowstu gi wi.

FURUTEN DINIWROKO

Na ini oktober 1961, mi ben man feni wroko gi wan tu dei na ini a wiki èn na so mi ben man pionier. Ma a srefi dei dati, a bijkantoro-opziener fu a bijkantoro na ini Belgia bel mi. A aksi mi efu mi ben man dini leki kring dinari (kring-owruman). Mi aksi en: „Wi kan dini fosi leki pionier fosi wi teki a toewijzing disi?” A brada ben feni dati bun. Sobun, baka di wi dini aiti mun leki pionier, wi bigin du kringwroko na ini september 1962.

Di wi ben e du a wroko disi tu yari kba, dan wi kisi a kari fu go dini na Betel na ini Brussel. Wi bigin dini drape na ini oktober 1964. Wi kisi furu blesi na ini a nyun toewijzing disi. Syatu baka di Brada Knorr kon luku a Betel fu wi na ini 1965, mi ferwondru taki mi tron bijkantoro-opziener. Bakaten, mi nanga Elly kisi a kari fu go na a di fu 41 klas fu Gileadskoro. Mi no ben man bribi taki a sani di Brada Knorr ben taki 13 yari na fesi ben kon tru. Baka di wi klari a skoro, wi drai go baka na Betel fu Belgia.

WI E FETI GI DEN RETI FU YEHOVAH EN PIPEL

Na ini den yari di psa, mi ben abi a grani fu gebroiki a sabi di mi ben abi fu yepi feti gi den reti fu a pipel fu Yehovah so taki den ben kan anbegi Gado fri na ini Europa èn na tra presi (Fil. 1:7). Fu di mi ben e du a wroko disi, meki mi ben abi kontakti nanga lantiman fu moro leki 55 kondre pe lanti no ben e gi wi okasi fu anbegi Gado fri, noso pe den ben tapu a wroko fu wi. Mi no ben e taigi den lantiman disi taki mi ben sabi sani fu a afkati wroko, ma na presi fu dati, mi ben e taigi den taki mi na wan „man fu Gado”. Ala ten mi ben e begi Yehovah fu yepi mi, fu di mi sabi taki „Na ati fu wan kownu [noso wan krutuman] de leki liba na ini na anu fu Yehovah. A e tyari en go pe a wani”.​—Odo 21:1.

Mi e memre ete taki wi mi ben musu taki nanga wan sma fu na Europese Parlement. Difrenti leisi mi ben aksi primisi fu taki nanga en, èn te fu kba a besroiti fu miti nanga mi. A lantiman disi taki: „Mi e gi yu feifi miniti nomo.” Mi boigi mi ede èn mi bigin begi. A lantiman bigin senwe èn a aksi mi san mi ben e du. Mi opo mi ede luku en, dan mi taigi en: „Mi ben e taigi Gado tangi fu di yu na wan fu den futuboi fu en.” A aksi mi: „Fa yu e bedoel?” Mi sori en Romesma 13:4. A ben de wan Protestantsma, èn dati meki a tekst disi hari en prakseri. San psa baka dati? A taki nanga mi wan afu yuru langa èn a takimakandra waka heri bun. A taigi mi srefi taki a ben e lespeki a wroko di wi e du.

Na ini den yari di psa, a pipel fu Yehovah ben tyari furu afersi go na krutu na ini Europa. Den ben e feti fu a reti di den abi fu no teki sei na ini politiek, fu kweki den pkin fu den, fu no pai tumsi furu belasting, èn furu tra sani sosrefi. Mi e si en leki wan grani taki mi ben man si nanga mi eigi ai fa Yehovah yepi wi fu wini den krutu-afersi disi. Yehovah Kotoigi wini moro leki 140 krutu-afersi na a Krutubangi fu Europa di e feti gi den reti fu libisma.

A KOWNUKONDRE WROKO E GO NA FESI NA INI CUBA

Na ini den yari baka 1990, mi wroko makandra nanga Brada Philip Brumley fu na edekantoro fu wi èn nanga Brada Valter Farneti fu Italiakondre fu sorgu taki den brada nanga sisa na ini Cuba ben man anbegi Yehovah moro fri. Mi skrifi wan brifi seni go na a ambassade fu Belgia èn baka dati mi miti nanga wan lantiman di ben kisi a frantwortu fu luku a tori fu wi. Den fosi leisi di wi miti, dan wi no ben man feni wan fasi fu lusu a problema di meki taki lanti tapu a wroko fu wi drape.

Baka di wi begi Yehovah fu horbaka gi wi, wi aksi a regering fu Cuba primisi efu wi ben mag seni 5000 Bijbel go gi den brada drape. Wi kisi primisi fu du dati. Den Bijbel doro drape sondro problema èn den brada prati den na ini den gemeente. A sani disi meki wi ferstan taki Yehovah ben e blesi a muiti di wi ben e du. Baka dati, wi aksi primisi fu seni ete 27.500 Bijbel gi den brada nanga sisa drape. Èn disi leisi tu a regering gi wi primisi. Mi ben breiti srefsrefi taki mi ben man yepi den brada nanga sisa na ini Cuba fu kon abi den eigi Bijbel.

Mi go na Cuba difrenti leisi fu yepi feti gi den reti fu wi leki Kotoigi. Na a srefi ten, mi leri sabi furu fu den lantiman èn wi ben man feni en bun nanga makandra.

MI E YEPI DEN BRADA NANGA SISA FU WI NA INI RWANDA

Na ini 1994, moro leki 1.000.000 sma dede na wan ogr’ati fasi na ini Rwanda fu di sma ben e suku fu kiri den sma fu a Tutsi lo. A sari taki wan tu fu wi brada nanga sisa lasi den libi tu. Heri esi wan grupu brada kisi a frantwortu fu sorgu taki den brada nanga sisa drape ben e kisi n’nyan nanga tra sani di den ben abi fanowdu.

Di a grupu fu wi doro na ini Kigali, a mamafoto, dan wi si taki a vertaal-kantoro nanga a presi pe den brada ben e kibri den buku fu wi ben lai nanga kugru-olo. Wi yere furu sari tori fu brada nanga sisa di sma ben kiri nanga owru. Ma wi yere tu fa den Kresten brada nanga sisa ben sori lobi gi makandra. Wi miti wan brada fu a Tutsi lo di ben kibri 28 dei langa na ini wan olo na ondro gron. Wan Kotoigi famiri di ben de fu a Hutu lo ben kibri a brada disi. Di wi ben de na wan konmakandra na ini Kigali, dan wi du ala san wi man fu trowstu moro leki 900 brada nanga sisa èn fu gi den dek’ati.

Baka dati, wi abra a grens go na ini Zaire (now a nen Demokrasia Republiek Kongo) fu go suku den someni Kotoigi fu Rwanda di ben go suku kibri na ini den loweman kampu krosbei fu Goma. Wi no ben man feni den, sobun wi aksi Yehovah fu tyari wi go na den. Ne wi si wan sma e waka kon miti wi èn wi aksi en efu a ben sabi Yehovah Kotoigi. A piki: „Iya, mi na wan Kotoigi. Meki mi tyari yu go na den brada di e sorgu taki wi e kisi yepi.” Baka di wi ben abi wan moi takimakandra nanga den brada dati, dan wi miti sowan 1600 brada nanga sisa di ben lowe gwe libi Rwanda. Wi trowstu den èn wi gi den dek’ati. Wi leisi a brifi fu a Tiri Skin tu gi den. Den brada nanga sisa ben breiti so te di den yere den wortu disi: „Wi e begi doronomo gi unu. Wi sabi taki Yehovah no o fergiti unu.” Den sani di a Tiri Skin ben taki ben tru. Tide na dei, moro leki 30.000 Kotoigi de na ini Rwanda.

MI BESROITI FU TAN GI YESI NA GADO

Baka di mi ben trow sowan 58 yari, dan mi lobi Elly dede na ini 2011. Yehovah trowstu mi di mi ferteri en fa mi ben e sari. Mi kisi trowstu tu fu di mi ben e preiki a bun nyunsu gi den birtisma fu mi.

Now mi psa 90 yari, ma ibri wiki mi e teki prati ete na a preikiwroko. Mi breiti tu taki mi man yepi nanga a wroko na a Kantoro gi krutu-afersi dyaso na a bijkantoro fu Belgia. Mi breiti tu taki mi man ferteri trawan den ondrofeni fu mi èn taki mi man de wan dek’ati gi den yonguwan na ini a Betel famiri.

Sowan 84 yari psa, mi bigi Yehovah fu a fosi leisi. Dati ben de a bigin fu wan moi libi èn dei fu dei mi ben e kon moro krosbei na Yehovah. Mi de nanga tangi taki Yehovah arki den begi fu mi, mi heri libi langa.​—Ps. 66:19.b