San Bijbel e taki fu Kresneti?

A piki fu Bijbel

Bijbel no e taki sortu dei Yesus gebore èn a no e taigi wi tu taki wi musu memre a dei disi. Wan buku e taki: „Gado no taki dati wi musu hori Kresneti, èn a Nyun Testamenti no e taki fu en tu” (McClintock and Strong’s Cyclopedia).

Te wi e go ondrosuku fu pe Kresneti komopo, dan wi e si taki a abi fu du nanga den kerki gwenti fu sma di ben e anbegi falsi gado. Bijbel e sori taki Gado ati e bron te wi e pruberi fu anbegi en na wan fasi di a no feni bun.​—Eksodes 32:5-7.

Pe furu fu den gwenti fu Kresneti komopo?

1. Te sma e memre a dei di Yesus gebore: „Den fosi Kresten no ben memre a dei di [Yesus] gebore fu di den ben e si friyaridei leki wan gwenti fu sma di ben e anbegi falsi gado.”​—The World Book Encyclopedia.

2. 25 december: Nowan buweisi de taki Yesus gebore na a dei dati. A kan taki kerki fesiman teki a dei disi abra fu di a ben e kruderi nanga den fesa di sma ben e hori gi den falsi gado na a moro kowru pisi ten fu a yari.

3. Te sma e gi makandra kado èn den e meki prisiri: The Encyclopedia Americana e taki: „Saturnalia, na wan fesa di den Romesma ben e hori afu fu december èn furu Kresneti gwenti pe sma e meki prisiri, komopo fu a fesa dati. Na fu a fesa disi, sma teki a gwenti abra fu meki bigi prisiri, fu gi makandra kado èn fu bron kandra.” The Encyclopædia Britannica taki dati na a ten fu Saturnalia, „nowan sma ben e wroko èn ala wenkri ben tapu”.

4. Faya di sma e leti na Kresneti: The Encyclopedia of Religion e taki dati den sma fu Europa ben e moi den oso nanga „faya di den ben e leti èn nanga ala sortu bon di e tan grun ala ten”. Den ben e du en fu memre a moro kowru pisi ten fu a yari èn fu yagi ogri yeye.

5. Kresneti bon: „Sma fu Europa di ben e anbegi falsi gado, ben abi a gwenti fu anbegi bon. Ma baka di den teki a Kresten bribi, den tan hori a gwenti disi.” Wan fasi pe yu kan si taki den no lusu a gwenti disi, na te „den e poti wan [Kresneti] bon ini a birti fu a doro noso inisei fu na oso na a ten fu den fesadei di den e hori na ini a kowru ten fu a yari.”​—Encyclopædia Britannica.