Petrus e go na Kornelius

DISI na a apostel Petrus di tanapu dya. Tu fu en mati tanapu na en baka. Ma fu san ede a man e kindi na fesi Petrus? A mag fu du dati? Yu sabi suma na a man dati?

A man na Kornelius, wan legre ofsiri fu Rome. Kornelius no ben sabi Petrus, ma a ben kisi fu yere taki a ben musu seni kari Petrus kon na en oso. Meki wi go luku fa disi ben du kon.

Den fosi bakaman fu Yesus ben de Dyu, ma Kornelius a no wan Dyu. Ma toku a lobi Gado, a e begi Gado èn a e du furu bun sani gi sma. We, wan bakadina wan engel e sori ensrefi na en èn a e taki: ’Gado e prisiri nanga yu èn a o yere den begi fu yu. Seni kari wan seiker man di nen Petrus. A de na Yope na a oso fu Simon, di e libi na a se.’

We, wantewante Kornelius e seni wan tu man go fu suku Petrus. A tamara fu en, te den man e kon krosibei na Yope, dan Petrus de na tapu a plata daki fu na oso fu Simon. Drape Gado e meki Petrus denki taki a e si wan bigi krosi di e saka komoto na hemel. Ala sortu meti de na ini a krosi. Leki fa Gado wet taki, dan den meti disi no de krin meti fu nyan. Ma toku wan sten e taki: ’Opo, Petrus. Srakti èn nyan.’

’Nôno’, Petrus e piki. ’Noiti ete mi nyan wan sani di no krin.’ Ma a sten e taigi Petrus: ’No taki moro taki den sani di Gado e kari krin now, na sani di no krin.’ Disi e pasa te dri tron. Aladi Petrus e aksi ensrefi san disi wani taki, dan den man di Kornelius ben seni e kon na a oso èn den e aksi pe Petrus de.

Petrus e saka go na ondro èn e taki: ’Mi na a man di unu e suku. Fu san ede unu kon?’ Te den man e fruteri taki wan engel ben taigi Kornelius fu seni kari Petrus fu kon na en oso, dan Petrus e agri fu go nanga den. A tamara fu en, dan Petrus nanga wan tu mati fu en e go na Sesarea fu go na Kornelius.

Kornelius kari en famiri nanga en moro bun mati kon. Te Petrus doro, dan Kornelius e fadon na en futu soleki fa yu e si dya. Ma Petrus e taki: ’Opo tanapu; misrefi na wan libisma nomo.’ Iya, Bijbel e sori taki a no yoisti fu boigi gi wan sma fu anbegi en. Yehovah wawan wi musu anbegi.

Now Petrus e preiki gi ala den sma di kon drape makandra. ’Mi e si taki Gado e teki ala sma di wani dini en’, a e taki. Èn aladi a e taki ete, dan Gado e seni en santa yeye èn den sma e bigin taki na ini difrenti tongo. Disi e fruwondru den Dyu disipel di ben kon nanga Petrus, bika den ben denki taki Gado e bumui soso nanga den Dyu. Ma now den e leri taki Gado no e si sma fu awinsi sortu ras moro bun noso moro prenspari leki sma fu wan tra ras. Wi alamala no musu hori dati bun na prakseri?