Kornelius e kisi santa yeye

Na ini Sesareya wan prenspari legre-ofsiri fu Rome ben de di nen Kornelius. Aladi a no ben de wan Dyu, a ben e lespeki den. A ben lobi yepi den pôti sma èn den sma di ben de na nowtu. Kornelius ben e bribi na ini Yehovah èn a ben e begi en doronomo. Wan dei wan engel kon na Kornelius èn a taki: ’Gado yere den begi fu yu. Seni wan tu man go na a foto Yope, pe Petrus e tan èn aksi en fu kon na yu.’ Wantewante Kornelius seni dri man go na Yope, di ben de sowan 50 kilometer na a zuidsei.

Na a srefi ten Petrus, di ben de na ini Yope, kisi wan fisyun. A si meti di den Dyu no ben mag nyan èn a yere wan sten taigi en fu nyan. Ma Petrus no ben wani. A taki: ’Noiti ini mi libi mi nyan meti di no krin.’ A sten taigi en: ’No taki dati den meti disi no krin. Gado meki den kon krin.’ A sten taigi Petrus tu: ’Dri man de na yu mofodoro. Go nanga den.’ Petrus go na a doro, dan a aksi den man fu san ede den kon dyaso. Den piki en: ’Kornelius, a legre-ofsiri fu Rome, seni wi kon. Yu musu kon na en oso na ini Sesareya.’ Petrus meki den man tan na ini en oso a neti dati. A tra dei a gowe nanga den na Sesareya, makandra nanga wan tu tra brada fu Yope.

Di Kornelius si Petrus, a saka na tapu en kindi. Ma Petrus taigi en: ’Opo tanapu! Mi na wan libisma neleki yu. Gado taigi mi fu kon na yu oso aladi Dyu no e go na ini oso fu sma di no abi a Dyu bribi. Taigi mi fu san ede yu seni kari mi.’

Kornelius taigi Petrus: ’Fo dei pasa, mi ben e begi Gado èn wan engel taigi mi fu seni kari yu. Grantangi, leri wi a wortu fu Yehovah.’ Petrus taki: ’Mi si taki Gado no lobi a wan sma moro a trawan. Iniwan sma di wani dini en, a feni bun.’ Petrus leri den furu sani fu Yesus. Ne santa yeye kon na tapu Kornelius nanga den sma di ben de nanga en. Dan den alamala dopu.