Kapitel 60
Krestes Kownoekondre glori e prenki na fesi
JESUS doro na den kontren foe Cesarea Filipi, èn a e gi leri na wan ipi sma, èn den apostel foe en de na ini toe. A e meki a sani disi bekènti di e meki den sma froewondroe: „Foe troe mi e taigi oenoe, taki sonwan foe den sma di de dja, kwetikweti no sa tesi dede bifo den si a Manpikin foe libisma e kon na ini en kownoekondre.”
’San Jesus ben kan abi na prakseri?’, den disipel ben sa moesoe aksi densrefi. So wan wán wiki na baka, Jesus e teki Petrus, Jakobus nanga Johanes go nanga en, èn den e kren wan hei bergi. Kande a de neti-ten, foe di sribi e kiri den disipel. Ala di Jesus e begi, a e kisi wan transfiguratie leti na den fesi. En fesi e bigin brenki neleki son, èn den krosi foe en e brenki neleki leti.
Ne toe sma e sori densrefi, di den e kon sabi leki „Moses nanga Elia” èn den e bigin taki nanga Jesus foe a ’gowe di a o gowe, san moesoe feni presi na Jerusalem’. A de krin, taki a gowe di a o gowe abi foe doe nanga a dede foe Jesus èn na opobaka di a sa kisi baka dati. So boen, a takimakandra disi e boeweisi taki a no kan wai pasi gi a dede di a sa dede na wan sjen fasi, soleki fa Petrus ben sa wani.
Den disipel, di de na ai now, e loekoe èn e arki nanga froewondroe. Ala di disi na wan fisjoen, tokoe a gersi so wan troe sani, taki Petrus e teki prati na a sani disi di e pasa. A e taki: „Masra, a boen taki wi djaso. Efoe joe wani, dan mi sa meki dri tenti djaso, wán gi joe èn wán gi Moses èn wán gi Elia.”
Ala di Petrus e taki ete, wan krin wolkoe e tapoe den, èn wan sten komoto na ini a wolkoe e taki: „Disi na mi Manpikin, a lobiwan, di mi feni boen; arki en.” Te den disipel e jere a sten, dan den e saka kindi fadon na gron. Ma Jesus e taki: „Oen opo èn no frede.” Te den e doe disi, dan den no e si no wan sma moro leki Jesus wawan.
Te den e saka a bergi a tra dei, Jesus e komanderi den: „No froeteri no wan sma foe a fisjoen, te leki a Manpikin foe libisma opo baka na dede.” Taki Elia ben de foe si na ini a fisjoen, e meki wan aksi kon na ini a prakseri foe den disipel. „Foe san ede”, na so den e aksi „den leriman foe Wet e taki dati Elia moesoe kon fosi?”
„Elia kon kaba”, Jesus e taki, „èn den no ben kon sabi en.” Ma Jesus e taki foe Johanes a Dopoeman di ben abi a srefi ròl leki di foe Elia. Johanes ben sreka a pasi gi Krestes, neleki fa Elia ben doe disi gi Elisa.
A fisjoen disi ben de troetroe wan sani di e tranga Jesus nanga den disipel! Te joe loekoe en boen, dan a fisjoen na wan prenki na fesi, foe Krestes Kownoekondre glori. Den disipel troetroe ben si „a Manpikin foe libisma e kon na ini en kownoekondre”, neleki fa Jesus ben pramisi disi wan wiki bifo. Baka a dede foe Jesus, Petrus ben skrifi taki ’nanga den eigi ai den ben si a glori foe Krestes, di den ben de nanga en na tapoe a santa bergi’.
Den Fariseiman ben aksi Jesus wan marki foe boeweisi taki a ben de a Kownoe di Gado ben froekisi èn di ben pramisi na ini den Boekoe foe bijbel. Den no ben kisi so wan marki. Na a tra sei, den krosibei disipel foe Jesus e kisi na okasi foe si a transfiguratie foe Jesus leki wan djaranti taki den Kownoekondre profeititori troe. Foe dati ede Petrus ben skrifi baka ten: „Dati meki a profeiti wortoe kon de moro faste gi wi.” Mateus 16:13, 28–17:13; Markus 9:1-13; Lukas 9:27-37; 2 Petrus 1:16-19.
▪ Fa son sma e si Krestes e kon na ini en Kownoekondre, fosi den e tesi dede?
▪ Foe san Moses nanga Elia e taki nanga Jesus na ini a fisjoen?
▪ Foe san ede a fisjoen disi na wan jepi di e tranga den disipel?