Yesus libi nanga diniwroko

Wan prenki fu a ten di e kon fu na Kownukondre glori fu Krestes

Yesus stop na pasi te ai go na Cesarea Filipi èn ai gi wan ipi sma èn en apostel leri. A e taki den ferwondru wortu di e kon now gi den: „Fu tru, mi e taigi unu dati sonwan fu den di de dya, kwetkweti no sa si dede bifo den si na Manpikin fu libisma kan ini en Kownukondre.”

’San Yesus ben kan bedoel?’ De disipel sondro degedege ben sa kan aksi. Sowan wan wiki a baka Petrus, Yakobus nanga Yohannes go nanga en èn makandra den e kren go na wan hei bergi. Kande seiker a de neti fudi den disipel de nanga sribi. Aladi Yesus e begi, a e ondrofeni na fesi na ai fu den wan transfiguratie. En fesi e bigin brenki leki na son èn en krosi e brenki leki na leti.

Dan tu sma e sori densrefi, di den e kon sabi leki „Moses nanga Elia” èn e bigin taki nanga Yesus fu a ’gwe fu en, di mu feni presi ini Yerusalem’. Na gwe fu en a de krin abi fu du nanga a dede fu Yesus èn en opobaka baka dati. A takmakandra disi e buweisi sobun dati a no kan lon komoto fu a syen dede, soleki Petrus ben sa wani sote.

Den disipel, di de now na ai, e luku èn e arki nanga ferwrondru. Ala di disi de wan visioen, toku a de so wan tru sani dati Petrus e teki prati na a tafereel èn e taki: „Masra, a de heri bun dati wi de dyaso. Efu yu wani, dan wi sa meki dyaso dri tenti, wan fu yu èn wan fu Moses èn wan fu Elia”.

Aladi Petrus e taki ete, wan krin wolku e tapu den èn wan sten e taki fu na wolku: „Disi na mi Manpikin, na lobiwan, di mi ben feni bun; arki na en.” Zodra den disipel e yere a sten, den e fadon tapu den fesi. Ma Yesus e taki: „Opo tanapu èn no frede.” Efu den e du disi, den no e si nowan sma, leki Yesus wawan.

Te den e pasa na tra dei na bergi, Yesus e komanderi den: „No ferteri fu na visioen na no wan sma bifo na Manpikin fu libisma opo baka fu dede.” Dati Elia ben kon de fu si ini a visioen, e meki wan aksi kon na ini na ferstan fu den disipel, „Fu san-ede”, a so dan e aksi, „den meister fu wet taki dati Elia musu kon fosi?”

„Elia kon kaba”, Yesus e piki, „èn den no ben herken en”. Ma Yesus e taki fu Yohannes a Dopuman di ben du a rol leki di fu Elia. Yohannes ben sreka na pasi gi kon fu Kristus soleki Elia ben du disi gi Elisa.

Fa na visioen disi ben de wan sani di e gi tranga, na Yesus èn na den disipel! Na visioen e gi te yu luku en bun wan prenki ini a ten di e kon fu na Kownukondre glori fu Kristus. Den disipel futru „ben si na Manpikin fu libisma e kon ini en Kownukondre” precies soleki Yesus ben pramisi wan wiki a fesi, Baka na dede fu Yesus Petrus ben skrifi dati en nanga en kompe apostel ’ben de aikotoigi fu Kristus glori di a ben de nanga den tapu na santa bergi’.

Den Fariseiman ben aksi wan marki fu Yesus sodati a buweisi ben gi dati en ben de a Kownu di Gado ben pramisi ini den Buku. Den no ben kisi a marki disi. Na a tra sei den krosbei disipel fu Yesus ben kisi a okasi fu si Yesus transfiguratie leki wan dyaranti fu den Kownukondre profeititori. Fu dat’ede meki Petrus bakaten ben skrifi: „Fu dat’ede meki na profeiti wortu kon de moro faste gi wi.” Mattéus 16:28—17:13; Markus 9:1-13; Lukas 9:27-37; 2 Petrus 1:16-19.

◆ Fa son sma ben si Kristus e kon ini en Kownukondre bifo den ben si dede?

◆ Fu san Moses nanga Elia ben taki nanga Yesus ini a visioen?

◆ Fu san-ede a visioen disi ben de wan yepi di ben gi tranga na den disipel?

[Wan prenki di e tapoe heri bladzijde 16]