Te Jesus e kon na ini Kownoekondre glori

„Sonwan foe den sma di e tanapoe dja, kewetikweti no sa tesi dede bifo den e si a Manpikin foe libisma e kon na ini en kownoekondre.” — MATEUS 16:28.

1, 2. San ben pasa sjatoe baka a Pinksterfesa foe 32 G.T., èn san ben de a marki foe a sani di ben pasa?

SJATOE baka a Pinksterfesa foe 32 G.T., dri foe den apostel foe Jesus Krestes ben si wan fisjoen di den no ben sa frigiti. Soleki fa a tori di skrifi ondro a krakti foe a santa jeje, e taki, dan „Jesus ben teki Petrus nanga Jakobus nanga en brada Johanes go nanga en èn a ben tjari den go na tapoe wan hei bergi, pe den ben de den wawan. Èn a ben kisi wan transfigurâsi na fesi foe den.” — Mateus 17:1, 2.

² A transfigurâsi fisjoen ben kon na wan prenspari ten. Jesus ben bigin taigi den bakaman foe en taki a ben o pina èn ben o dede na Jerusalem, ma den ben feni en wan moeilek sani foe froestan den wortoe foe en (Mateus 16:21-23). A fisjoen ben meki a bribi foe den dri apostel foe Jesus kon tranga, foe sreka den gi a dede foe en di de krosibei èn so srefi gi den jari foe tranga wroko nanga tesi di a kresten gemeente ben sa ondrofeni. Wi kan leri wan sani foe a fisjoen na ini a ten disi? Ija, bika te joe loekoe en boen, a sani di a fisjoen ben prenki na fesi, e feni presi na ini a ten foe wi.

3, 4. (a) San Jesus ben taki siksi dei bifo a transfigurâsi? (b) Froeteri san ben pasa na a ten foe a transfigurâsi.

³ Siksi dei bifo a transfigurâsi, Jesus ben taigi den bakaman foe en: „A Manpikin foe libisma sa kon troetroe na ini a glori foe en Tata [makandra] nanga den engel foe en, èn dan a sa pai ibriwan sma akroederi a fasi fa a ben tjari ensrefi.” Den wortoe disi ben sa kon troe na „a bosroiti foe a seti foe sani”. Jesus ben taki moro fara: „Foe troe, mi e taigi oenoe taki sonwan foe den sma di e tanapoe dja, kwetikweti no sa tesi dede bifo den e si a Manpikin foe libisma e kon na ini en kownoekondre” (Mateus 16:27, 28; 24:3; 25:31-34, 41; Danièl 12:4). A transfigurâsi ben feni presi leki wan kontroe foe den wortoe disi.

⁴ San den dri apostel ben si troetroe? San e kon now na a fasi fa Lukas ben taki foe a sani di ben pasa: „Ala di [Jesus] ben e begi, a fasi fa en fesi ben de, ben kon de tra fasi èn en krosi ben kon brenki te a weti. Èn loekoe! toe man ben e taki nanga en, den ben de Moses nanga Elia. Den disi ben kon nanga glori èn ben bigin taki foe a gowe di a moesoe gowe, di ben moesoe meki kon troe na Jerusalem.” Ne „wan wolkoe ben kon èn ben bigin tapoe [den apostel]. Di den ben go na ini a wolkoe, den ben kon frede. Èn wan sten ben komoto na a wolkoe èn ben taki: ’Disi na mi Manpikin, a wan di mi froekisi. Arki na en.’” — Lukas 9:29-31, 34, 35.

A bribi foe wi e meki kon tranga

5. Sortoe krakti a transfigurâsi ben abi na tapoe na apostel Petrus?

⁵ Na apostel Petrus ben sori kaba taki Jesus na „Krestes, a Manpikin foe a libi Gado” (Mateus 16:16). Den wortoe foe Jehovah di ben komoto na hemel, ben sori dati den wortoe foe Petrus di ben sori soema na Jesus, ben de troe, èn a fisjoen foe a transfigurâsi foe Jesus ben e sori na fesi a kon di Krestes ben o kon na ini Kownoekondre makti nanga glori, foe kroetoe a libisma famiri te foe kaba. Moro leki 30 jari baka a transfigurâsi, Petrus ben skrifi: „Di wi ben meki oenoe kon sabi a krakti nanga a denoja foe wi Masra Jesus Krestes, wi no ben waka baka leitori di sma froeteri na wan koni fasi, ma foe di wi ben si en bigi glori nanga wi eigi ai. Bika Gado, a Tata, ben gi en grani nanga glori, di a ben taigi en wortoe leki den wan disi nanga bigi glori: ’Disi na mi manpikin, mi lobiwan, di misrefi feni boen.’ Ija, wi ben jere den wortoe disi komoto na hemel di wi ben de nanga en na tapoe a santa bergi.” — 2 Petrus 1:16-18; 1 Petrus 4:17.

6. Fa sani ben waka baka a transfigurâsi?

⁶ Na ini a ten disi, a bribi foe wi e meki kon tranga toe nanga den sani di den dri apostel ben si. A no de foe taki, dati sani ben feni presi moro nanga moro sensi 32 G.T. A jari na baka, Jesus dede èn ben kisi wan opobaka, èn ben opo go na a reti-anoe foe en Tata (Tori foe den Apostel 2:29-36). Na a Pinksterfesa foe a jari dati, a njoen „Israèl foe Gado” ben meki, èn den ben bigin nanga wan preikiwroko, di den ben bigin doe na ini Jerusalem èn baka ten a ben panja go na ala oekoe foe grontapoe (Galasiasma 6:16; Tori foe den Apostel 1:8). Pikinmoro wantewante a bribi foe den bakaman foe Jesus ben kisi tesi. Den ben kisi den apostel èn den ben fon den na wan ogri fasi bika den ben weigri foe tapoe nanga a preikiwroko. No langa baka dati den ben kiri Stefanus. Baka dati den ben kiri Jakobus, wan sma di ben si a transfigurâsi (Tori foe den Apostel 5:17-40; 6:8–7:60; 12:1, 2). Ma Petrus nanga Johanes ben tan na libi foe dini Jehovah na wan getrow fasi foeroe jari moro. Foe taki en leti, krosibei na a kaba foe a fosi jarihondro G.T., Johanes ben skrifi tra fisjoen pe Jesus de foe si ini hemel glori. — Openbaring 1:12-20; 14:14; 19:11-16.

7. (a) O ten a transfigurâsi fisjoen ben bigin kon troe? (b) O ten Jesus ben pai son sma akroederi a fasi fa den ben tjari densrefi?

⁷ Foeroe foe den fisjoen di Johanes ben si, kon troe sensi a bigin foe „a dei foe Masra” na ini 1914 (Openbaring 1:10). Fa a de nanga ’a kon di [Jesus] e kon na ini a glori foe en Tata’, soleki fa a transfigurâsi ben prenki dati na fesi? A fisjoen disi ben bigin kon troe di Gado en hemel Kownoekondre ben gebore na ini 1914. Di Jesus, leki wan deistari, ben opo ini na universum leki wan Kownoe di no so langa ete poti na tapoe a kownoestoeroe, dan dati ben de, foe taki en so, a bigin foe wan njoen dei (2 Petrus 1:19; Openbaring 11:15; 22:16). Na a ten dati, Jesus ben pai son sma akroederi a fasi fa den ben tjari densrefi? Ija. Krakti boeweisi de taki sjatoe baka dati, na opobaka foe salfoe kresten foe go na hemel ben bigin. — 2 Timoteus 4:8; Openbaring 14:13.

8. Sortoe sani di o pasa sa marki a heimarki foe a kontroe foe a transfigurâsi fisjoen?

⁸ Ma heri esi Jesus sa doro „na ini en glori, èn ala den engel makandra nanga en” foe kroetoe a heri libisma famiri (Mateus 25:31). Na a ten dati, a sa tjari ensrefi kon na krin na ini ala en bigi glori èn sa pai „ibriwan sma” akroederi a fasi fa a ben tjari ensrefi. Sma di joe kan teki gersi skapoe sa kisi têgo libi na ini a Kownoekondre di ben sreka gi den, èn sma di joe kan teki gersi bokoboko sa go na ini a „têgo koti poeroe”. Fa dati sa de wan toemoesi moi bosroiti foe a kontroe foe a transfigurâsi fisjoen! — Mateus 25:34, 41, 46; Markus 8:38; 2 Tesalonikasma 1:6-10.

Den kompe foe Jesus di kisi glori

9. Wi moesoe froewakti taki Moses nanga Elia sa de nanga Jesus na ini a kontroe foe a transfigurâsi fisjoen? Tjari dati kon na krin.

⁹ Jesus no ben de en wawan na ini a transfigurâsi. Den ben si Moses nanga Elia makandra nanga en (Mateus 17:2, 3). Den ben de troetroe drape? Nôno, bika ala toe man dede langa ten kaba èn ben e sribi na ini a grebi ala di den e wakti foe kisi wan opobaka (Preikiman 9:5, 10; Hebrewsma 11:35). Den sa sori densrefi makandra nanga Jesus te a e kon na ini hemel glori? Nôno, bika Moses nanga Elia ben libi bifo a hemel howpoe ben opo gi libisma. Den sa de wan pisi foe na „opobaka . . . foe den regtfardikiwan” na grontapoe (Tori foe den Apostel 24:15). Dati meki a sori di den ben sori densrefi na ini a transfigurâsi fisjoen e agersi wan sani. San a e agersi?

10, 11. Soema Elia nanga Moses e prenki na ini difrenti situwâsi?

¹⁰ Na ini tra situwâsi, Moses nanga Elia na profeiti sma. Leki mindriman foe a Wetfroebontoe, Moses ben prenki Jesus, a Mindriman foe a njoen froebontoe (Deuteronomium 18:18; Galasiasma 3:19; Hebrewsma 8:6). Elia ben prenki Johanes a Dopoeman, wan sma di ben waka na fesi a Mesias (Mateus 17:11-13). Moro fara, na ini den tekst foe Openbaring kapitel 11, Moses nanga Elia e prenki a salfoe fikapisi na ini a ten foe a kaba. Fa wi doe sabi dati?

¹¹ We, opo Openbaring 11:1-6. Na ini vers 3 wi e leisi: „Mi sa meki den toe kotoigi foe mi taki profeititori wán doesoen toe hondro nanga siksitenti dei, ala di den e weri saka leki krosi.” A profeititori disi ben kon troe ini a fikapisi foe salfoe kresten na ini a ten foe a Fosi Grontapoefeti.a Foe san ede toe kotoigi? Bika a salfoe fikapisi e doe wroko di, na jejefasi, de leki den wroko foe Moses nanga Elia. Vers 5 nanga 6 e go doro foe taki: „Efoe wan sma wani doe [den toe kotoigi] ogri, dan faja e komoto na a mofo foe den èn e swari den feanti foe den; èn efoe wan sma ben sa wani doe den ogri, dan na a fasi disi [den] moesoe kiri en. Den disi abi a makti foe sroto hemel, so taki alen no sa fadon na ini den dei di den e taki profeititori, èn den abi a makti tapoe den watra, foe meki den kon tron broedoe èn foe naki grontapoe nanga ala sortoe plaag so foeroetron leki den e winsi [dati].” So boen, den e memre wi foe den wondroe di Elia nanga Moses ben doe. — Numeri 16:31-34; 1 Kownoe 17:1; 2 Kownoe 1:9-12.

12. Soema Moses nanga Elia e prenki na ini a transfigurâsi?

¹² Dan soema Moses nanga Elia e prenki na ini a transfigurâsi? Lukas e taki dati den ben sori densrefi makandra nanga Jesus „nanga glori” (Lukas 9:31). A de krin taki den e prenki kresten di kisi salfoe nanga santa jeje leki „kompe erfgenaam” nanga Jesus èn di foe dati ede ben kisi a moi howpoe foe kisi „glori makandra” nanga en (Romesma 8:17). Salfoewan di kisi wan opobaka sa de nanga Jesus te a e kon na ini a glori foe en Tata foe „pai ibriwan sma akroederi a fasi fa a ben tjari ensrefi”. — Mateus 16:27.

Kotoigi leki Moses nanga Elia

13. Sortoe sani e sori taki Moses nanga Elia de joisti profeiti prenki foe den salfoe kompe erfgenaam foe Jesus di kisi glori makandra nanga en?

¹³ Spesroetoe sani de di e sori taki Moses nanga Elia de joisti profeiti prenki foe den salfoe kompe erfgenaam foe Jesus. Ala toe, Moses nanga Elia ben dini leki takiman foe Jehovah foeroe jari langa. Ala toe ben ondrofeni na atibron foe wan tiriman. Na ini wan ten di den ben de ini nowtoe, ibriwan ben kisi jepi foe wan osofamiri di ben de foe tra kondre. Ala toe ben taki profeititori gi kownoe sondro frede èn ben tanapoe kánkan teige falsi profeiti. Ala toe, Moses nanga Elia ben si fa Jehovah ben sori en krakti na tapoe a bergi Sinai (di den kari so srefi Horeb). Ala toe ben poti sma di ben o kon baka den, na wroko, na a owstoesei foe a Jordan. Na ini den dei foe ala toe, Moses (nanga Josua) èn Elia (nanga Elisa), moro foeroe foe den wondroe ben doe, boiti den wan di ben feni presi na ini a libi foe Jesus.b

14. Fa den salfoewan dini leki takiman foe Jehovah, neleki Moses nanga Elia?

¹⁴ Ala den sani dati no e memre wi na a Israèl foe Gado? Ija, foe troe. Jesus ben taigi den getrow bakaman foe en: „Go foe dati ede, èn meki disipel foe sma foe ala nâsi, èn dopoe den na ini a nen foe a Tata èn foe a Manpikin èn foe a santa jeje, èn leri den foe doe ala den sani di mi komanderi oenoe. Èn, loekoe! mi de nanga oenoe ala den dei te na a kaba foe a seti foe sani” (Mateus 28:19, 20). Foe di den gi jesi na den wortoe disi, meki salfoe kresten dini leki takiman foe Jehovah foe sensi a Pinksterfesa foe 33 G.T. te leki now. Neleki Moses nanga Elia, den ondrofeni na atibron foe tiriman èn den gi den tiriman kotoigi. Jesus ben taigi den 12 apostel foe en: „Den sa srepi oenoe go na fesi tiriman nanga kownoe, foe oenoe de leki wan kotoigi gi den èn gi den nâsi” (Mateus 10:18). Ibri tron baka den wortoe foe en ben kon troe na ini a historia foe a kresten gemeente. — Tori foe den Apostel 25:6, 11, 12, 24-27; 26:3.

15, 16. Sortoe sani de a srefi na mindri den salfoewan na a wan sei èn Moses nanga Elia na a tra sei ini a tori foe (a) a teki di den e teki sei gi waarheid sondro frede? (b) a kisi di den e kisi jepi foe sma di no de Israèlsma?

¹⁵ Boiti dati, salfoe kresten de sondro frede neleki Moses nanga Elia, di den e teki sei gi a waarheid teige relisi lei. Prakseri fa Paulus ben kroetoe a djoe falsi profeiti Bar-Jesus èn nanga takt, ma tokoe na wan krakti fasi, ben poeroe a falsifasi foe den gado foe den Athenesma kon na doro (Tori foe den Apostel 13:6-12; 17:16, 22-31). Prakseri toe, taki na ini a ten disi a salfoe fikapisi sondro frede poeroe kon na doro soema na krestenhèit èn so wan fasi foe gi kotoigi, pina krestenhèit. — Openbaring 8:7-12.c

¹⁶ Di Moses ben lowe gi na atibron foe Farao, a ben feni kibri na ini na oso foe Rehuèl, di den ben kari Jetro toe, èn di no ben de wan Israèlsma. Baka ten, Moses ben kisi warti rai foe orga sani foe Rehuèl, di en manpikin Hobab ben tjari Israèl na ini a sabanad (Exodus 2:15-22; 18:5-27; Numeri 10:29). Sma di no de salfoe memre foe na Israèl foe Gado, jepi den memre foe na Israèl foe Gado na a srefi fasi? Ija, den kisi jepi foe a „bigi ipi” noso „tra skapoe”, di kon de foe si na ini den lasti dei disi (Openbaring 7:9; Johanes 10:16; Jesaja 61:5). Leki wan fasi foe taki na fesi foe a waran èn lobi-ati jepi di den „skapoe” disi ben o gi den salfoe brada foe en, Jesus ben taigi den na wan profeiti fasi: „Angri ben kiri mi èn oenoe ben gi mi wan sani foe njan; watra ben kiri mi èn oenoe ben gi mi wan sani foe dringi. Mi ben de wan freimdesma èn oenoe ben ontfanga mi nanga switifasi; nanga soso skin, èn oenoe ben weri krosi gi mi. Mi ben kon siki èn oenoe ben sorgoe mi. Mi ben de na doengroe-oso èn oenoe ben kon loekoe mi. . . . Foe troe, mi e taigi oenoe: Na a fasi fa oenoe ben doe disi gi wán foe den moro mendriwan foe den brada disi foe mi, oenoe ben doe disi gi mi.” — Mateus 25:35-40.

17. Fa den salfoewan ben ondrofeni wan sani di ben de a srefi leki di foe Elia na tapoe a bergi Horeb?

¹⁷ Moro fara, na Israèl foe Gado ben ondrofeni wan sani di ben de a srefi leki di foe Elia na tapoe a bergi Horeb.e A salfoe fikapisi di ben abi frede, ben denki taki a wroko foe den ben klari na a kaba foe a Fosi Grontapoefeti, neleki Elia na a ten di a ben e lon gi oema-kownoe Iseibel. Baka dati, so srefi neleki Elia, den ben kon tanapoe na fesi Jehovah, di ben kon foe kroetoe den organisâsi dati di ben e taki dati den de ’na oso foe Gado’ (1 Petrus 4:17; Maleaki 3:1-3). Ala di den ben feni taki krestenhèit no ben doro den markitiki, tokoe a salfoe fikapisi ben erken leki „a getrow èn koni srafoe” èn ben poti na wroko foe loekoe ala den goedoe foe Jesus na grontapoe (Mateus 24:45-47). Na Horeb, Elia ben jere „wan tiri, safoe sten” di ben sori foe de a sten foe Jehovah, di ben gi en moro wroko foe doe. Na ini a tiri pisi ten foe den jari baka a feti, getrow salfoe foetoeboi foe Jehovah ben jere en sten komoto na bijbel. Den so srefi ben kon si, taki den ben abi wan wroko foe doe. — 1 Kownoe 19:4, 9-18; Openbaring 11:7-13.

18. Fa Jehovah gebroiki na Israèl foe Gado foe sori a krakti foe en na wan toemoesi aparti fasi?

¹⁸ Leki lasti, Jehovah gebroiki na Israèl foe Gado foe sori a krakti foe En na wan toemoesi aparti fasi? Baka di Jesus dede, den apostel ben doe foeroe wondroe, ma safrisafri den wondroe disi ben tapoe (1 Korentesma 13:8-13). Na ini a ten disi, wi no e si wondroe na skinfasi. Na a tra sei, Jesus ben taigi den bakaman foe en: „Foe troe mi e taigi oenoe: A sma di e sori bribi na ini mi, a sma dati sa doe so srefi den wroko di mi e doe; èn a sa doe wroko di bigi moro leki den disi” (Johanes 14:12). Disi ben abi en fosi kontroe di den disipel foe Jesus ben preiki a boen njoensoe na ini a heri Grontapoemakti Rome na ini a fosi jarihondro (Romesma 10:18). Srefi moro bigi wroko doe na ini a ten disi, foe di a salfoe fikapisi teki fesi na ini a preiki foe a boen njoensoe „na heri grontapoe pe sma e libi, leki wan kotoigi gi ala nâsi” (Mateus 24:14). San na a bakapisi? Na ini a di foe twenti jarihondro, sma si a moro bigi nomroe foe getrow foetoeboi foe Jehovah di gi densrefi abra, di tjari kon makandra na ini a historia (Openbaring 5:9, 10; 7:9, 10). Fa disi e sori a krakti foe Jehovah na wan kefalek moi fasi! — Jesaja 60:22.

Den brada foe Jesus e kon na ini glori

19. O ten den e si den salfoe brada foe Jesus makandra nanga en na ini glori?

¹⁹ Te a fikapisi foe den salfoe brada foe Jesus e kaba a libi foe den na grontapoe, dan den e kisi glori nanga en (Romesma 2:6, 7; 1 Korentesma 15:53; 1 Tesalonikasma 4:14, 17). Dati meki den e tron kownoe nanga priester di no kan dede, na ini a hemel Kownoekondre. Dan makandra nanga Jesus, den sa „wei den sma nanga wan isri tiki, so taki den sa broko den na pisipisi leki tokotoko patoe” (Openbaring 2:27; 20:4-6; Psalm 110:2, 5, 6). Makandra nanga Jesus, den sa sidon na tapoe kownoestoeroe èn kroetoe „den twarfoe lo foe Israèl” (Mateus 19:28). A kriatoeroe di e geme, wakti nanga faja tapoe den sani disi di o pasa, di de wan pisi foe ’a tjari kon na krin foe den manpikin foe Gado’. — Romesma 8:19-21; 2 Tesalonikasma 1:6-8.

20. (a) Ini a tori foe sortoe froewakti, a transfigurâsi ben meki a bribi foe Petrus kon tranga? (b) Fa a transfigurâsi e gi kresten tranga na ini a ten disi?

²⁰ Paulus ben taki foe a tjari kon na krin foe Jesus na a ten foe a „bigi banawtoe” di a ben skrifi: „A e kon foe kisi glori ini a tori foe den santawan foe en èn foe den si en nanga froewondroe na a dei dati ini a tori foe ala den wan di ben sori bribi” (Mateus 24:21; 2 Tesalonikasma 1:10). Dati na troetroe wan kefalek moi froewakti di Petrus, Jakobus, Johanes, nanga ala kresten di salfoe nanga santa jeje abi! A transfigurâsi ben meki a bribi foe Petrus kon tranga. Ija, te wi e leisi foe dati, dan a e meki a bribi foe wi kon tranga toe èn e tranga a froetrow di wi abi taki heri esi Jesus sa „pai ibriwan sma akroederi a fasi fa a ben tjari ensrefi”. Getrow salfoe kresten di tan na libi te na a dei foe tide, e si taki a froetrow di den abi taki den sa kisi glori makandra nanga Jesus, de troe. A bribi foe den tra skapoe kon tranga foe di den sabi taki a sa froeloesoe den foe pasa a kaba foe a godelowsoe seti foe sani disi, foe go na ini a glori njoen grontapoe (Openbaring 7:14). Fa disi e gi deki-ati foe tanapoe kánkan te na a kaba! Èn a fisjoen disi kan leri wi foeroe sani ete, soleki fa wi sa si na ini a tra artikel.

[Foetoewortoe]

Joe e memre disi ete?

◻ Soema ben sori densrefi nanga Jesus na ini a transfigurâsi?

◻ Fa a transfigurâsi ben meki a bribi foe den apostel kon tranga?

◻ Di Moses nanga Elia ben sori densrefi „nanga glori” makandra nanga Jesus na ini a transfigurâsi, soema den ben prenki?

◻ Sortoe sani de a srefi na mindri Moses nanga Elia na a wan sei èn na Israèl foe Gado na a tra sei?

[Prenki na tapoe bladzijde 10]

A transfigurâsi ben meki a bribi foe kresten na ini a fosi jarihondro kon tranga, soleki fa a e gi wi tranga toe na ini a ten disi