Kapitel 65

Den go na Jerusalem na wan kibri fasi

A DE a herfst foe 32 G.T. èn a Wiwirikampoe-fesa no fara moro. Sensi a Paska foe 31 G.T., di den djoe ben soekoe foe kiri Jesus, a ben doe en wroko moro foeroe na Galilea. Baka dati Jesus ben go na Jerusalem kande soso foe de na den dri alajari fesa foe den djoe.

Now den brada foe Jesus e gi en tranga: „Gowe foe dja èn go na Judea.” Jerusalem na a moro prenspari foto foe Judea èn a de a moro prenspari presi toe foe a heri kondre, pe sma e go foe anbegi. Den brada foe en e taki: „No wan sma e doe wan sani na wan kibri fasi, ala di ensrefi e soekoe foe ala sma sabi en.”

Ala di Jakobus, Simon, Josef nanga Judas no e bribi taki a bigi brada foe den, Jesus, troetroe na a Mesias, tokoe den wani, taki Jesus moesoe sori na ala den sma di kon makandra na a fesa, taki a abi a makti foe doe wondroe. Ma Jesus sabi foe a kefar. „Grontapoe no abi no wan reide foe no wani si oenoe na ai,” a e taki, „ ma a no wani si mi na ai, foe di mi e gi kotoigi foe en taki den wroko foe en na ogri wroko.” Foe dati ede Jesus e taigi den brada foe en: „Oen go na a fesa; mi no e go ete na a fesa disi.”

A Wiwirikampoe-fesa na wan fesa foe seibi dei. Na a di foe aiti dei a fesa e kon na wan kaba foe di den e doe serjoesoe afersi. A fesa na a marki taki a pranigron-jari kon na wan kaba èn a de wan ten foe bigi prisiri èn foe a taki di sma e taki tangi. Wan toe dei baka di Jesus brada gowe makandra nanga a moro bigi pisi foe a groepoe sma di ben e teki a waka foe de na a fesa, en nanga den disipel foe en e teki a waka na wan kibri fasi, sondro foe den sori densrefi na poebliki. Den e teki a pasi di e waka pasa na ini Samaria, na presi foe teki a pasi di moro foeroe foe den sma e teki seisei foe Jordan liba.

Foe di Jesus nanga den sma di de na en, sa moesoe tan na ini wan dorpoe foe Samaria na neti, meki a e seni boskopoeman go na fesi foe sreka sani foe dati. Ma so esi leki den sma e jere taki Jesus de na pasi foe go na Jerusalem, den e weigri foe doe wan sani gi en. Nanga atibron Jakobus nanga Johanes e aksi en: „Masra, joe wani, taki wi e kari faja foe hemel kon na den tapoe foe pori den?” Jesus e piri-ai gi den, foe di den tjari so wan prakseri kon na fesi, èn den e teki waka go na wan tra dorpoe.

Ala di den de na pasi, wan leriman foe Wet e taigi Jesus: „Leriman, mi sa waka na joe baka, awinsi pe joe e go.”

„Den kraboedagoe abi olo èn den fowroe foe hemel abi sribipresi,” Jesus e piki, „ ma a Manpikin foe libisma no abi no wan presi srefi foe poti en ede.” Jesus e tjari kon na krin, taki a leriman foe Wet sa kisi foe doe nanga problema efoe a tron En bakaman. A gersi leki a leriman foe Wet abi toemoesi bigimemre foe teki a sortoe fasi disi foe libi.

Jesus e taigi wan tra man: „Kon tron mi bakaman.”

„Gi mi pasi foe gowe fosi, foe beri mi papa”, a man e piki.

„Meki den dedewan beri den dedewan foe den,” Jesus e piki, „ma joe, waka joe pasi èn meki a kownoekondre foe Gado bekènti na alape.” A de krin, taki a papa foe a man no dede ete, bika efoe dati ben de so, dan a no ben sa kan, taki a manpikin foe en ben sa de djaso foe arki Jesus. Soleki fa a sori, dan a manpikin e aksi efoe a kan kisi ten foe wakti a dede foe en papa. A no wani poti a Kownoekondre foe Gado na tapoe a fosi presi ini en libi.

Ala di den de na pasi e go na Jerusalem, wan tra man e taigi Jesus: „Mi sa waka na joe baka, Masra; ma gi mi pasi fosi foe bari adjosi na den ososma foe mi.”

Leki piki Jesus e taki: „No wan sma di e go ploegoe a gron èn e loekoe na den sani di de na en baka, fiti a kownoekondre foe Gado.” Den sma di sa de disipel foe Jesus, moesoe poti den ai soifri tapoe a Kownoekondre diniwroko. Neleki fa wan gotro sa kan waka kronkron, efoe a sma di e ploegoe en no e loekoe langalanga go na en fesi, na so a de toe te wan sma di e loekoe go na baka na a owroe seti foe sani disi, makriki kan naki foetoe èn komoto na a pasi di e go na têgo libi. Johanes 7:2-10; Lukas 9:51-62; Mateus 8:19-22.

▪ Soema na den brada foe Jesus, èn fa den e denki foe en?

▪ Foe san ede den Samariasma no de nanga switifasi, èn san Jakobus nanga Johanes wani doe?

▪ Sortoe dri takimakandra Jesus abi na pasi, èn fa a e poti krakti na tapoe taki a de fanowdoe foe doe a diniwroko nanga wan jeje foe òfer joesrefi?