Meki na kownoekondre foe Gado bekenti na alasé
„Meki den dedewan beri den dedewan foe den, ma oen go èn meki na Kownoekondre foe Gado bekenti na alasé.” — LUKAS 9:60.
1. Sortoe prenspari aksi e kon a fesi foe den wortoe foe Jezus na ini Lukas 9:60?
NA KOWNOEKONDRE foe Gado — dati ben teki na ini a libi foe Jezus na moro prenspari presi! Gi alamala foe wi di de troe bakaman foe en, dati de ooktoe so nanga wi. Leki kristensma wi e feti foe waka soifri na ini den foetoemarki foe Jezus, foe di wi e libi akroederi na bijbel (1 Petrus 2:21). Ma a ben sa kan de dati wi, now di wi doro na ini na jari 1986, ben sa go loekoe den sani njoennjoen baka di wi poti na a fosi presi ini wi libi? Fa joe ben sa kan ferklari foe eksempre dati Jezus ben taigi wan sma dati a „ben moe meki den dedewan beri den dedewan foe den”? Foe san-ede joe denki dati Jezus moro fara ben poti krakti na tapoe na meki bekenti na tapoe na kownoekondre boskopoe kontrari a doe foe famiri afersi di ben gersi dati a fiti foe doe? San na a prakseri foe joe?
2. Oten Jehovah soevereiniteit ben bigin, èn olanga dati o tan?
2 Langaten bifo Jezus ben gebroiki den wortoe disi „a kownoekondre foe Gado”, na psalmsingiman David ben skrifi na ondro krakti foe santa jeje: „Jehovah srefi ben poti en troon na ini hemel stéfi; èn tapoe ala sani a ben meki en égi kownoe wroko tiri a tapoe” (Psalm 103:19). Na soevereiniteit foe Jehovah ben abi wan bigin di a ben bigin nanga en mekiwroko. Na fundamenti foe en troon no kan poeroe noiti foe en faste presi. A reti foe en tapoe na universele soevereiniteit noiti kan hari poeroe foe en. A no de wan wondroe dati na psalmsingiman e gi dek’ati: „Meki a mindri den naatsi en glori bekenti . . . bika Jehovah bigi èn a de foe prijse sref’srefi”! — Psalm 96:3, 4; 109:21; Daniël 4:34, 35.
3. (a) Sortoe sani di ben psa meki dati sma ben feti a tirimakti foe Jehovah? (b) Fa Jehovah ben abi na prakseri foe loesoe na stré-aksi di abi foe doe nanga na universele soevereiniteit?
3 Ma a no ala sma ben tan prijse Jehovah. Satan, na fosiwan di fadon komoto foe bribi ben bigin feni fowtoe na a fasi tapoe fa Jehovah ben sori en soevereiniteit tapoe en mekisani na grontapoe (Genesis 3:1-5; Job 1:6-12; 2:1-5). Disi ben abi leki bakapisi dati tapoe grontapoe, èn bakaten ooktoe na ini den hemel, dati son mekisani ben flaka densrefi nanga na opo di Satan ben opo ensrefi tége Gado. Ondro na krakti foe Satan den sma ben tjari go so fara foe opo wan lo libisma kownoekondre. Den dati a ben gebroiki foe feti na reti di Gado ben abi foe tiri (Openbaring 13:1-6). Foe tjari wan loesoe kon na ini na stré-aksi foe na universele soevereiniteit, meki Jehovah ben abi wan ongewoon sani a prakseri, soleki ben taki a fesi a ini Daniël 2:44: „Na ini den dé foe den kownoe dati na Gado foe hemel sa opo wan kownoekondre di noiti sa go na ondro . . . a sa masi ala den kownoekondre dati èn meki wan kaba kon na den èn ensrefi sa tan foe ten di no abi marki.”
Jehovah e tron kownoe tapoe Israël
4. Na sortoe fasi David ben kan taki:„Jehovah srefi ben tron kownoe”, èn foe doe san na sani disi di ben psa e gi okasi?
4 A e kon de now foe dat’ede krin, dati Jehovah, aladi en soevereiniteit de kaba foe sensi bigin foe en mekiwroko, ben abi na prakseri foe tjari wan loesoe kon na ini a retifasi foe en soevereiniteit foe ala ten, foe di a o tjari en tirimakti kon a fesi tapoe wan spesroetoe fasi, namkoe nanga jepi foe na hemel Messias kownoekondre. A grontapoe kownoekondre di Jehovah ben poti tapoe na naatsi Israël, ben de wan agersifasi na wan pikinfasi foe na kownoekondre „disi di noiti sa go na ondro”. Di David ben tjari na ark foe na ferbontoe go na ini na foto foe Jeruzalem, a ben kan singi foe dat’ede nanga prisiri: „Meki den hemel prisiri, meki na grontapoe bréti, èn meki den taki a mindri den naatsi ’Jehovah srefi ben tron kownoe’” (1 Kronieken 16:31). Ija, Jehovah „ben tron kownoe ini wan spesroetoe betekenis gi heri Israël. A ben de wan ten foe bigi prisiri, èn David ben wani meki na bigi sani disi, di ben psa, bekenti na ala sé.
5, 6. (a) Na sortoe fasi David ben de a mindri den kownoe wan kownoe di ben de aparti? (b) David ben de wan agersifasi foe soema èn na sortoe fasi?
5 Na kweki di David ben kisi leki wan herder ben poti na fundamenti foe a de wan aparti kownoe a mindri den kownoe. A ben de wan herder-kownoe. Na psalmsingiman e ferteri fa Gado ben ferkisi David gi na positsi disi te a e taki: „[Jehovah] ben ferkisi . . . en knegti David èn ben teki en poeroe foe den skapoekoi . . . foe den herder foe Jakob, en pipel, na tapoe Israël, en famiri goedoe, èn a ben tjari den go njan grasi. Akroederi na soifri-reti-fasi foe en ati, èn nanga na koni foe en anoe a ben go tjari den.” — Psalm 78:70-72.
6 Na herder sorgoe foe David gi en pipel, en soifri-reti-fasi foe ati na fesi foe en Gado èn en koni leki tiriman ben meki a ben de wan toemsi boen eksempre foe agersi na Messias di boo kon, èn di tapoe wan spesroetoe fasi den ben sa gebroiki foe sori na universele kownoewroko foe Jehovah èn foe opo doe wroko leki wan lobi herder-kownoe. Na moifasi disi fa sani boo waka na ini na prakseri di jehovah ben abi bakaten na proféti Ezechiël ben taki dati a fesi: „Mi wani wiki wán herder tapoe [Israël], èn a moe tjari den go njan grasi, ija, mi knegti David, . . . èn misrefi, Jehovah sa tron den Gado, èn mi knegti David wan edeman na den mindri. Misrefi, Jehovah ben taki disi.” — Ezechiël 34:22-24.
Na Herder-Kownoe foe di den ben taki na fesi foe en e sori ensrefi
7, 8. (a) Fa sma ben kon sabi na Herder-kownoe di den ben taki a fesi foe en, èn san ben sa de leki wan djaranti tapoe a fundamenti foe na sani di ben taki a fesi taki ben o psa? (b) Foe sortoe prakseri meki Jehovah ben feni „Jezus boen”?
7 Na soema, di Jehovah ben taki a fesi foe en ben de en égi Manpikin Jezus. Na foe en na engel Gabriel ben taki gi na wenke Maria: „Loekoe! joe sa kisi na ini joe bere èn meki wan manpikin, di joe moe gi a nen Jezus.’ Èn disi sa de bigi èn den sa kari en na Manpikin foe na Moro Héwan, èn Jehovah Gado sa gi en na troon foe en tata David èn a sa tiri foe tégo leki kownoe tapoe na oso foe Jakob èn wan kaba no sa kon na en kownoekondre” (Lukas 1:31-33). Fa disi ben de wan moi fasi foe sori na kownoewroko foe Jehovah! Sowan sani di ben o psa na ini a ten di o kon séker ben sa de wan djaranti di ben sa de a moro bigi bekenti di ben sa doe na a heri grontapoe: „Jehovah srefi ben tron kownoe!”
8 Bakadi Jezus ben gebore tapoe wan wondroefasi èn ben gro tron wan bigisma, a ben pristeri ensrefi foe teki dopoe na ini watra foe na liba Jordaan. Na a okasi dati Gado ben erken Jezus leki en Manpikin foe di a ben kanti en jeje tapoe en èn ben taki: „Joe de mi manpikin, na lobiwan, mi ben feni joe boen” (Lukas 3:22), Foe san den ben feni Jezus „boen”? Na tori foe Lukas e ferklari: „Di Jezus ben bigin nanga en wroko, a ben abi sowan dritenti jari”(Lukas 3:23; voetnoot ini Na Ingrisi-NW-verwijsbijbel; ofoe: ’ben bigin [nanga a leri foe sma]’). Na Revised Standard Version èn na New International Version e taki: „Di a ben bigi nanga en diniwroko.” San ben de a „wroko” foe Jezus ofoe „diniwroko”? San ’a ben leri sma’? Na skrifiman Mattéus e gi a piki: „[Jezus] ben hari psa heri Gailléa aladi a ben leri sma na ini den djoe kerki èn ben e préki a boen njoensoe foe a kownoekondre, èn ben e dresi ibri sortoe foe siki èn ibri sortoe foe mankeri a mindri a pipel.”
9. Na sortoe fasi Jezus ben de leki en fosten tata David?
9 Jezus ben gi en libi na a ’meki bekenti foe na kownoekondre’ foe Gado na alasé. Netleki en fosten tata David, a so a ben sori taki a ben abi wan soifri-reti-ati foe di a no ben libi no wan pikin pisi foe a getrowfasi foe en gi na kownoekondre foe Jehovah na wan sé (Lukas 9:60; 4:3-13; Johannes 16:33). Jezus ben bewijsi dati en ben de na ’wán herder’ dati, di Jehovah ben pramisi dati a boo wiki. A ben meki a firi kolokoe foe gi njanjan na jejefasi na den sma di den kerki tiriman „ben foefoeroe èn ben drifi go-kon . . . èn di ben de leki skapoe sondro herder” (Mattéus 9:36). Jezus ben taki foe en wroko leki koni herder foe sma èn foe na kon moro bigi di a wroko disi safrisafri ben sa ondrofeni ini den jari bakaten: „Mi de na Toemsi Boen Herder, èn mi sabi mi skapoe èn mi skapoe sabi mi . . . èn mi abi tra skapoe, di no de foe disi koi; den dati ooktoe mi moe tjari, èn den sa tron wán ipi, wán herder.” — Johannes 10:14, 16
10. San wi kan leri foe den difrenti fasi fa den djoe ben opo doe wan sani na tapoe na kari foe Jezus foe waka na en baka?
10 Fa den djoe ben doe tapoe a kari foe Jezus foe tron en bakaman di joe kan teki gersi nanga skapoe? Den fasi fa den ben doe ben de difrenti. Wi sa go ondrosoekoe now wantoe foe den fasi disi fa den ben doe; go loekoe pikinso fa joe ben sa doe foe di joe ben kon ini kontakti nanga na boskopoe foe na kownoekondre foe Gado.
„Tron mi bakaman” — San de a fasi fa joe e doe tapoe disi?
11. Ferteri fa Simon, Andréas, Jakobus, Johannes nanga Mattéus ben doe na tapoe na kari foe Jezus: „Kon baka mi.”
11 Di Jezus ben waka na sé na se foe Galiléa, a ben si Simon èn en brada Andréas, di ben e fisi. „Jezus ben taki gi den: ’Kon a mi baka èn mi sa meki oenoe tron fisiman foe libisma.” Èn wantewante den ben libi den srepi foe den èn ben waka na en baka. Èn baka di a ben go pikinso moro fara a ben si Jakobus, a manpikin foe Zebedeüs, èn en brada Johannes, èn a ben kari den. Tapoe disi den ben libi den tata Zebedeüs nanga den wrokoman ini a boto èn den ben go na en baka” (Markus 1:16-20), Na srefi positief fasi foe opo doe wan sani na belastingman. Levi odoe Mattéus ben sori. „[Jezus] ben taigi en: ’Tron mi bakaman.’ Èn aladi a ben libi ala sani na en baka, a opo tanapoe èn waka na en baka.” — Lukas 5:27, 28.
12. Sortoe problema a man abi di ben taigi Jezus: „Mi sa waka na joe baka pe joe e go ooktoe”?
12 Ma a no ala sma ben opo doe wan sani positief tapoe a kari foe Jezus: „Tron mi bakaman.” Prakseri a man di Lukas kapitel 9 e taki foe en nanga soema Jezus tapoe en waka foe dorp go na dorp ben kon na ini kontakti. A ben taigi Jezus: „Mi sa waka a joe baka, pe joe sa go ooktoe.” Ini a tori foe Mattéus e kon na krin dati a man disi ben de wan meester foe wet. A pipel ben e loekoe nanga respeki na den meester foe wet èn ben kari den „rabbi”. Loekoe now san Jezus ben piki: „Den kraboedagoe abi olo èn den fowroe foe hemel sribipresi, ma na Manpikin foe libisma no abi wan presi foe poti en ede” (Lukas 9:57, 58). Jezus ben sori a man disi krin dati a ben moesoe de tevréde nanga fasi di no de makriki efoe a ben tron en bakaman. Foe disi wi kan si dati a man disi ben abi toemsi bigi-memre foe waka baka a libifasi disi. Foe no sabi pe joe sa sribi a tra neti ben de wan toemsi bigi onsekerfasi gi en.
13. San ben de a réde foe a piki di Jezus ben gi na wan trawan di ben kan tron wan bakaman?
13 Jezus ben taigi wan tra sma di ben de drape: „Tron mi bakaman.” Ma a ben piki Jezus: „Gi mi pasi fosi foe go èn beri mi papa.” Loekoe pikinso na a piki foe Jezus: „Meki den dedewan beri den dedewan foe den, ma go èn meki na kownoekondre foe Gado bekenti na alasé” (Lukas 9:59, 60). Na ekskuus foe a man disi no ben wani taki dati en papa ben dede kaba. Efoe a ben dede, dan a no ben sa de wan sani di de so dati na manpikin ben tanapoe e arki Jezus a tapoe a pasi dati. Nono, te wi loekoe san a man ben taki, dan wi e si dati a ben aksi foe kisi ten, sodati te na a dede foe en tata a ben kan tan na oso. A no ben de klari foe gi wantewante ini en libi a kownoekondre foe Gado na fosi presi. — Mattéus 6:33
14, 15. (a) Tapoe san na aksi di na di foe dri man ben aksi Jezus, ben sori? (b) Sortoe leri wi kan kisi now foe a piki di Jezus ben gi na a man disi?
14 Na tori e ferteri foe wan di foe dri man di ben pristeri ensrefi nanga en friwani nanga den wortoe: „Mi sa waka na joe baka, Masra, ma gi mi pasi foe gi adjosi na den sma foe na oso.” A de krin dati a man disi ben wani poti kondisi gi a waka baka Jezus. Te joe loekoe en leti a ben taigi Jezus: ’Loekoe mi sa tron wan foe den bakaman foe joe efoe . . .’ San Jezus ben piki? „No wan sma di ben poti en anoe na a ploegoe èn e loekoe na den sani na en baka de boen gi na kownoekondre foe Gado” (Lukas 9:61, 62). Efoe wan sma di e ploegoe wani meki wan let’opoe olo na ini a gron, dan a moe tan loekoe let’opoe na en fesi. Efoe a drai en ede foe loekoe na en baka, dan na olo séker sa kon kron. Na man di e ploegoe kan stotoe foetoe srefi fadon! A so a de ooktoe nanga den sma di e waka na baka den foetoemarki foe Jezus; efoe awinsi a de wan pikin ten, den drai loekoe a baka na na owroe seti foe sani disi, den den e aksi foe moeilekheid, sodati a foetoe foe den sa stotoe èn den sa komoto ’foe na smara pasi di e tjari go na libi’. — Mattéus 7:14; loekoe Lukas 17:31-35.
15 Joe ben jere na kari foe Jezus: „Tron mi bakaman”? Fa joe ben doe nanga na kari dati? Joe ben sori nasrefi positieffasi leki den discipel Simon. Andréas, Jakobus, Johannes, nanga Mattéus? Joe de netleki den man di ben de klari foe tjari ibri ofrandi di ben de fanowdoe foe den go waka na ini den foetoemarki foe na meester? Efoe joe e piki na aksi nanga „ija”, dan joe sa abi na diri grani foe abi wan prati na a meki bekenti foe na boen njoensoe foe na Kownoekondre foe Gado na alasé.
16. Fa Jezus ben sreka den bakaman foe en na tapoe foe préki makandra nanga en na boen njoensoe?
16 Bifo Jezus ben seni en discipel go foe meki na kownoekondre bekenti, a ben leri den nanga jepi foe en persoonlek eksempre tapoe wan konifasi foe den ben moesoe doe disi. Morofara Jezus ben gi den rai finifini foe na fasi fa tapoe ibri kontren den ben moe soékoe na sma di ben de leki skapoe. Den rai foe Jezus na ini na di foe twenti jarhondro disi de te now ete boen. Meki oen go loekoe wantoe foe den, di skrifi na ini kapitel 10 foe a tori foe Mattéus.
Rai di ben gi foe na kownoekondrepréki
17. Teki gersi na mama foe a tori foe na kownoekondre boskopoe di den préki na ini a fosi jarhondro nanga di den e préki now?
17 Na boskopoe foe den discipel ben moesoe abi nasrefi thema di Jezus ben meki bekenti: „Préki a tapoe joe waka èn taki: ’Na kownoekondre foe den hemel kon krosbé kaba’” (Mattéus 10:7). Ma na kownoekondre dati opo kaba ini hemel. Jehovah Herder-Kownoe, Kristus Jezus, e tiri now! Foe dat’ede meki den wortoe foe David abi wan moro bigi betekenis now: „Meki den hemel prisiri, meki na grontapoe bréti, èn meki den taki a mindri den naatsi: „Jehovah srefi ben tron kownoe!” (1 Kronieken 16:31) Na ini a ten disi wi no abi wawan na grani foe hori baka gi na spesroetoe wortoe disi foe Jehovah universele kownoewroko, ma wi abi ooktoe na prisiri foe libi na ini a ten na ini pe na stré-aksi ini a tori foe Jehovah soevereiniteit sa loesoe te foe tégo alaten.
18. Tapoe san Jezus ben poti krakti na ini Mattéus 10:8-10 di a ben de fesi en bakaman, èn soema e warderi disi spesroetoe na ini a ten disi?
18 Mattéus 10:8-10 e ferteri foe na fasi foe den sma di e teki prati na a prékiwroko. A Ownoekondre foe Gado moe teki na fosi presi na ini den libi; den fanowdoe na skinfasi e kon na tapoe na di foe toe presi. Foe san-ede? Jezus e taki: „Bika na wrokoman de warti en njanjan.” Na hemel Tata foe wi sa sorgoe alaten gi den sma di e fertrow tapoe en. Èn na ini a ten disi hondrohondro doesoendoesoen foeroeten bedinari a mindri Jehovah Kotoigi kan ferteri dati disi de so. — Numeri 18:30, 31; Deuteronomium 25:4.
19. Fa den e soekoe now na sma di ’warti foe disi’, èn na ondro a tiri foe soema?
19 Morofara Jezus e gi na rai: „Sortoe foto ofoe sortoe dorpoe joe e go toe, ondrosoekoe soema de drape di warti disi, èn tan drape te leki joe gwe” (Mattéus 10:11). San disi wani taki? Dati wan sma ben de warti a grani foe teki na dienstknegti disi foe Jehovah nanga prisiri na ini en oso èn foe arki na boskopoe foe na Kownoekondre. A no de foe taki, dati na a ten dati den discipel dati ben tan na ini na oso foe sowan sma di ben warti disi èn ben gebroiki a oso leki fundamenti foe pe den ben tan wroko morofara finifini na tra pisi foe na gebied aladi den ben e soekoe tra sma di ben warti disi. Na ini a ten disi Jehovah Kotoigi e waka a baka wan srefi sortoe fasi foe wroko. Den e gi miljoenmiljoen joeroe na disi èn den e gi foeroe moeiti foe soekoe na ini difrenti kontren na den sma di de warti. Te den feni den sma disi, dan a e gi den kotoigi foeroe prisiri foe go baka foe fisiti den sma dati èn foe tjari a wortoe foe Gado kon a krin gi den. Na so fasi Jezus, na Herder, ben tjari na ini a ten disi en skapoe tapoe koni fasi go na en reti-anoe foe boen-ati. — Mattéus 25:31-33.
20. Fa wan osofamiri srefi e ondrofeni dati a de warti na vréde di na kownoekondreprékiman e winsi en?
20 „Te joe go na ini na oso, taki oso na osofamiri odi, èn efoe na oso warti disi, dan so na vréde di joe e winsi en moe kon a tapoe” (Mattéus 10:12, 13). „Vréde moe de nanga na oso disi” ben de na ini a ten foe Jezus wan normaalfasi foe gi odi (Lukas 10:5). Di Jezus ben gebore, den engel ben singi: „Glori na Gado na ini den moro hépresi na loktoe, èn na grontadoe vréde a mindri sma foe boen wani” (Lukas 2:14). Wan osofamiri di ’ben de en warti’, ben sa kisi a vréde disi di ben taki a fesi, foe di a ben teki na kownoekondre boskopoe foe den discipel. Na ini a ten disi a boen njoensoe foe a kownoekondre abi a srefi krakti. Nanga jepi foe Jezus Kristus a e tjari den sma kon na ini wan vréde matifasi nanga Gado, aladi a abi leki baka-pisi ooktoe vréde a mindri kompe bribiman. — 2 Korinte 5:20, 21; Filippi 4:7; Efese 4:3.
21. Foe san-ede na jaritekst foe 1986 de so fiti?
21 Na ini na kalenderjari 1986 na jaritekst di komoto foe Lukas 9:60 sa de foe si na ini den kownoekondre zaal foe Jehovah Kotoigi alape na grontapoe. „Go . . . meki na kownoekondre foe Gado bekenti na ala sé.” Fa disi sa de gi ala den troe bedinari foe Gado wan moi sani foe memre èn wan dek’ati foe teki prati alaten na a préki foe na kownoekondre foe Gado. Ija, a kownoekondre dati de dja foe sensi 1914! A de a wrokosani foe Gado na ini na anoe foe en Messias-Kownoe. A sa masi ala den grontapoe kownoekondre foe Satan. Foe dat’ede meki a no de wan ferwondroe sani dati a kownoekondre foe Jehovah na ini na libi foe ibri Kotoigi foe Jehovah moe teki na moro prenspari presi. Wi sabi taki disi wani taki a ferloesoe foe wi foe kisi libi. — 1 Timóteus 4:16.
San joe ben sa piki?
◻ O langa èn o stéfi sondro foe seki na kownoewroko foe Jehovah de?
◻ Sortoe universele stré-aksi moe loesoe now?
◻ San ala den bakaman foe Jezus moe de klari foe doe?
◻ Foe san-ede den wortoe „Jehovah srefi ben tron kownoe” wani taki now moro sani ete?
◻ Sortoe marki na jaritekst foe 1986 sa dini?
[Prenki na tapoe bladzijde 3]
Mattéus ben libi ala sani a baka èn a ben waka a baka Jezus