Yesus e gi sma leri te den de na pasi fu go na Yerusalem

Wan heri pisi ten kaba, Yesus e preiki moro furu na ini Galilea. Drape moro sma e arki en leki na ini Yudea. Di a ben dresi wan man na ini Yerusalem na Sabat-dei, „den Dyu du moro muiti fu kiri en”.​—Yohanes 5:18; 7:1.

Now a de a mun september noso oktober fu a yari 32. A Kampufesa de krosibei. Sma e hori a fesa disi seibi dei langa. Baka dati den e hori wan spesrutu konmakandra na a di fu aiti dei. Den e hori a fesa disi na a kaba fu a pisi ten te den e prani èn koti nyanyan na den gron. Disi na wan ten fu prisiri èn fu taki Gado tangi.

Den afubrada fu Yesus, sobun Yakobus, Simon, Yosef, nanga Yudas, e taigi en: „Komoto fu dya èn go na Yudea.” Yerusalem na a presi pe ala sma fu a kondre e go fu anbegi Gado. Na a ten fu den dri alayari fesa, a foto lai nanga sma. Den brada fu Yesus e taki: „Nowan sma e du sani kibrikibri efu a wani taki sma musu kon sabi en. Efu yu e du den sani disi, dan meki grontapu si yu.”​—Yohanes 7:3, 4.

Fu taki en leti, den fo brada disi ’no e bribi’ taki Yesus na a Mesias. Toku den wani taki den sma di de na a fesa musu si taki a e du wondru. Yesus sabi taki a sani disi kan tyari problema kon. Dati meki a e taigi den: „Sma fu grontapu no abi fu teige unu, ma den e teige mi, fu di mi e taki dati den e du soso ogri. Unu kan go na a fesa. Mi no o go na a fesa ete, fu di a ten fu mi no doro ete.”​—Yohanes 7:5-8.

Baka wan tu dei den brada fu Yesus e gowe makandra nanga a bigi grupu sma di e go na a fesa. Yesus nanga den disipel fu en e go na a fesa tu, ma sondro taki sma sabi dati. Den no e teki a pasi krosibei fu Yordan-liba di sma gwenti waka, ma den e teki a moro syatu pasi di e pasa na ini Samaria. Yesus nanga den disipel fu en o abi wan sribipresi fanowdu na ini Samaria. Dati meki a e seni wan tu man go na fesi fu sreka wan sribipresi gi den. Den sma fu wan fu den dorpu no wani en drape. Kande den no wani teki den na ini oso fu di den sabi taki Yesus e go na a Dyu fesa na ini Yerusalem. Nanga atibron Yakobus nanga Yohanes e taki: „Masra, yu wani taki wi meki faya fu hemel saka kon na den tapu fu kiri den?” (Lukas 9:54) Yesus e piri-ai gi den fu di a no man bribi taki den aksi en so wan sani. Baka dati den e go moro fara.

Te den de na pasi wan leriman fu Wet e taigi Yesus: „Leriman, mi sa waka na yu baka awansi pe yu e go.” Yesus e piki en: „Krabudagu abi olo pe den e tan èn den fowru di e frei na loktu abi nesi, ma a Manpikin fu libisma no abi nowan presi fu sribi” (Mateyus 8:19, 20). Yesus e sori taki a leriman fu Wet o kisi tesi efu a tron wan bakaman fu en. Soleki fa a sori, dan a leriman disi feni taki a hei tumusi fu libi so wan libi. A bun te ibriwan fu wi e aksi ensrefi: ’Mi de klariklari fu waka na Yesus baka?’

Yesus e taigi wan tra man: „Tron wan bakaman fu mi.” A man e taki: „Gi mi na okasi fosi fu go beri mi papa.” Fu di Yesus sabi san na a situwâsi fu a man disi, meki a e taigi en: „Meki den dedewan beri den dedewan fu den, ma yu musu go fruteri sma fu Gado Kownukondre na ala sei” (Lukas 9:59, 60). Soleki fa a sori, dan a man en papa no dede ete. Efu a ben dede, dan a manpikin fu en no ben o de dyaso e taki nanga Yesus. Sobun, a man disi no wani poti Gado Kownukondre na a fosi presi na ini en libi.

Te den de na pasi fu go na Yerusalem, wan tra man e taigi Yesus: „Masra, mi o waka na yu baka, ma gi mi na okasi fosi fu taki den sma na ini mi oso adyosi.” Yesus e piki en: „Efu wan sma e bigin plugu a gron èn a e luku go na den sani di de na en baka, dan a sma dati no fiti gi a Kownukondre fu Gado.”​—Lukas 9:61, 62.

Den sma di wani tron trutru disipel fu Yesus musu poti a Kownukondre wroko na a fosi presi na ini den libi. Efu a sma di e plugu a gron no e tan luku go na fesi, dan den gotro di a e meki nanga a plugu o kron. Efu a e poti a plugu na gron fu luku san de na en baka, dan a wroko o tan na baka. Na so a de tu taki te wan sma e drai luku den sani di a libi na baka na ini a grontapu disi, dan a kan komoto na a pasi di e tyari sma go na têgo libi.