Wan toemoesi moi tamara

Satan nanga en ogri jeje no sa kori libisma moro langa. Jehovah iti den komoto kaba na hemel (Openbaring 12:9). Ini a krosibei tamara, Gado sa opo doe sani baka nanga Satan nanga den ogri jeje foe en. Na apostel Johanes ben taki ini wan fisjoen di Gado ben gi: „Èn mi ben si wan engel di saka komoto na hemel nanga na sroto foe a peti di no abi gron èn wan bigi keti na en anoe. Èn a ben graboe a draak, a fosi sneki, di de Didibri nanga Satan, èn ben tai en doesoen jari langa. Èn a ben fringi en go na ini a peti di no abi gron èn ben sroto èn laki disi na en tapoe, so taki a no kan kori den nâsi moro te leki den doesoen jari ben kon na wan kaba” (Openbaring 20:1-3). Baka ten, Didibri nanga en ogri jeje sa kisi pori foe têgo. — Openbaring 20:10.

Gado sa kiri poeroe den takroe sma na grontapoe toe. — Psalm 37:9, 10; Lukas 13:5.

Den dedewan sa libi baka!

Baka te Satan nanga den ogri jeje poeroe a pasi, dan Jehovah sa tjari foeroe blesi kon gi libisma. Joe sa memre ete taki den dedewan de sondro libi, taki den no de. Jesus ben teki dede gersi nanga sribi — wan dipi sribi sondro dren (Johanes 11:11-14). A ben doe dati foe di a ben sabi taki a ten ben sa kon, pe den wan di e sribi na ini dede sa wiki kon a libi. A ben taki: „A joeroe e kon di ala den sma, di de na ini den memre grebi, sa kon na doro.” — Johanes 5:28, 29; teki gersi Tori foe den Apostel 24:15.

Den sa tjari den kon a libi, dja na grontapoe. Na presi foe dede boskopoe, dan prisiri njoensoe sa gi foe den wan di tjari kon baka a libi! Fa a sa de wan prisiri foe bari wan switikon gi lobiwan di komoto na grebi!