Den Mati fu Gado Sa libi na ini Paradijs

Paradijs no sa de leki a grontapu pe wi e libi na ini now. Noiti Gado ben wani taki grontapu ben musu lai problema nanga sari, pen nanga pina. Na ini a ten di e kon, Gado sa meki grontapu kon tron wan paradijs. Fa Paradijs sa de? Kon meki wi go luku san Bijbel e taki:

Bun sma. Paradijs sa de a tanpresi fu den mati fu Gado. Den sa du bun sani gi makandra. Den sa libi akruderi den regtfardiki pasi fu Gado.​—Odo 2:21.

Nofo nyanyan. Na ini Paradijs, angri no sa de. Bijbel e taki: „Siri-nyanyan [noso nyanyan] sa de bogobogo na grontapu.”​—Psalm 72:16.

Moi oso nanga wroko di e gi prisiri. Na a Paradijs grontapu, ala osofamiri sa abi en eigi oso. Ala sma sa du wroko di e meki den firi trutru koloku.​—Yesaya 65:21-23.

Vrede na heri grontapu. Sma no sa feti èn dede moro na ini orloku. Gado Wortu e taki: „[Gado] e meki feti kon na wan kaba.”​—Psalm 46:8, 9.

Wan bun gosontu. Bijbel e pramisi: „No wan sma di e libi [na ini Paradijs] sa taki: ’Mi siki’” (Yesaya 33:24). So srefi, no wan sma sa malengri noso breni noso dofu noso no sa man taki.—Yesaya 35:5, 6.

Wan kaba sa kon na pen, sari, nanga dede. Gado Wortu e taki: „Dede no sa de moro, no wan sari, no wan babari, no wan pen no sa de moro. Den fositen sani pasa kaba.”​—Openbaring 21:4.

Ogri sma no sa de moro. Yehovah e pramisi: „Den ogri sma, . . . sa koti puru fu grontapu srefi; èn den wan di e tori trawan, den sa hari den puru fu en.”​—Odo 2:22.

Sma sa lobi makandra èn lespeki makandra. Ala sma sa du reti. Sma no sa kwinsi trawan moro. Bigi-ai no sa de moro. Sma no sa de leki feanti fu makandra moro. Ala sma sa de wán èn den sa libi akruderi den regtfardiki pasi fu Gado.​—Yesaya 26:9.