A pramisi foe wan moro betre libi

JOE ben sa wani foe de fri foe den problema di e meki a libi de so moeilek? Joe wani libi na ini wan grontapoe pe a libi switi a srefi leki tapoe a prenki di de na fesisei nanga na bakasei foe a tijdschrift disi? Loekoe a prenki dati boen. Sma abi boen foeroe foe njan. Den sa njan boen srefisrefi foe a switi njanjan dati. Ibri wan foe den kolokoe. Sma foe difrenti ras e libi na ini vrede nanga makandra. Srefi den meti de nanga vrede! No wan sma e feti. No wan sma pôti. No wan sma siki. Moi kontren de, heri moi bon, èn soifri èn krin watra. Dati na wan troetroe moi situwâsi!

Oiti a grontapoe disi sa de leki dati? Ija, a sa de wan paradijs (Lukas 23:43). Gado, di ben meki grontapoe, abi na prakseri foe meki libisma njan boen foe wan moro betre libi na wan paradijs grontapoe. Èn joe kan de drape!

Sortoe libi joe ben sa froekisi?

Fa a grontapoe paradijs di moesoe kon ete sa de difrenti foe a grontapoe pe wi e libi now? Na ini a ten disi, moro leki wán miljard sma de nanga angri ibri dei. Ma na ini a paradijs di Gado abi na prakseri gi grontapoe, ibri sma sa abi boen foeroe foe njan. Bijbel e pramisi: „Jehovah foe den feti-legre troetroe sa poti gi ala pipel . . . wan fesa-njanjan foe preti di lai nanga oli, wan fesa-njanjan foe win di den kibri na tapoe a sakasaka” (Jesaja 25:6). No wan mankeri foe njanjan sa de, bikasi bijbel e taki: „Karoe sa de foeroe na grontapoe; na tapoe na ede foe den bergi sani sa de pasa marki.” — Psalm 72:16.

Na ini a ten disi, foeroe sma abi toemoesi takroe tanpresi, noso den e feti foe pai na oso-joeroe foe den. Tra sma no abi oso èn den e sribi na tapoe strati. Akroederi a Wereld-gezondheidsorganisatie, 100 miljoen foe den pikin na grontapoe no abi tanpresi. Ma na ini a paradijs di moesoe kon ete, ibri sma sa abi wan oso gi ensrefi. A Wortoe foe Gado e taki: „Den sa bow oso troetroe èn go libi na ini; èn troetroe den sa prani droifi-djari èn den sa njan foe den froktoe foe den.” — Jesaja 65:21.

Foeroe sma e doe wroko di den no lobi. Foeroe tron den e wroko langa èn tranga ibri dei, ma den e kisi pikinso pai nomo. Pikinmoro 1 foe ibri 5 sma na grontapoe e libi nanga wan pai foe mendri leki 500 dala na ini wan jari. Ma na ini a paradijs di e kon, sma sa prisiri foe den wroko èn den sa si den boen bakapisi foe dati. Gado e pramisi: „Den sma di mi teki sa gebroiki a wroko foe den eigi anoe krinkrin. Den no sa wroko tranga foe soso.” — Jesaja 65:22, 23.

Na ini a ten disi, siki de na ala sei. Foeroe sma breni. Son wan dofoe. Trawan no man waka. Ma na ini a paradijs, sma sa kon fri foe siki. Jehovah e taki: „No wan sma di e libi drape sa taki: ’Mi siki’” (Jesaja 33:24). Èn gi den sma di malengri kaba, a switi pramisi na: „Na ini a ten dati den ai foe den breniwan sa kon opo, èn srefi den jesi foe den dofoewan sa kon opo. Na ini a ten dati a malengriwan sa kren neleki wan dia [wan man dia], èn a tongo foe a babaw-wan sa bari wan prisiri babari.” — Jesaja 35:5, 6.

Na ini a ten disi sma e pina foe pen, sari nanga dede. Ma na ini a paradijs na grontapoe, ala den sani disi no sa de. Ija, srefi dede no sa de moro! Bijbel e taki: „Gado srefi sa de nanga den. Èn a sa figi poeroe ala watra-ai na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Openbaring 21:3, 4.

A de krin dan taki a paradijs na grontapoe di Jehovah pramisi, sa wani taki wan moro betre libi gi a libisma famiri. Ma fa wi kan de seiker taki a sa kon? Oten a sa kon, èn fa? San joe moesoe doe foe de drape?