Suma Na den Mati fu Gado?

Yesus Krestes na a Manpikin fu Yehovah; a de a moro krosibei mati fu Yehovah, a de a sma di Yehovah lobi trutru. Bifo Yesus ben libi leki wan libisma na grontapu, a ben libi na ini hemel leki wan makti yeye (Yohanes 17:5). Baka dati a ben kon na grontapu fu leri sma a waarheid fu Gado (Yohanes 18:37). A ben gi en libisma libi tu fu kan puru sondu nanga dede gi den libisma di e gi yesi (Romesma 6:23). Now Yesus na a Kownu fu Gado Kownukondre, wan hemel tiri di sa tyari Paradijs kon na a grontapu disi.—Openbaring 19:16.

Den engel na Gado mati tu. Den engel no ben bigin libi leki libisma na grontapu. Gado ben meki den na hemel, bifo a ben meki grontapu (Yob 38:4-7). Milyunmilyun engel de (Danièl 7:10). Den mati disi fu Gado na ini hemel wani taki sma musu leri a waarheid fu Yehovah.​—Openbaring 14:6, 7.

Gado abi mati tu na grontapu; a e kari den en kotoigi. Wan kotoigi di de na fesi krutu e fruteri san a sabi fu wan sma noso wan sani. Den Kotoigi fu Yehovah e fruteri trawan san den sabi fu Yehovah èn fu a prakseri fu en (Yesaya 43:10). Neleki den engel, na so den Kotoigi wani yepi yu tu fu leri a waarheid fu Yehovah. Den wani taki yu musu de Gado mati tu.