Te Yu Wani Hori wan Mati Bun, Dan Yu Musu De wan Mati

Sma de mati fu makandra fu di den lobi makandra. O moro yu e leri fu Yehovah, o moro yu sa lobi en. Te yu e kon lobi Gado moro, dan yu sa angri moro nanga moro tu fu dini en. Disi sa meki taki yu e tron wan disipel fu Yesus Krestes (Mateus 28:19). Te yu e tron wan memre fu a koloku osofamiri fu Yehovah Kotoigi, dan yu sa firi a matifasi di yu abi nanga Gado fu têgo. San yu musu du?

Yu musu sori taki yu lobi Gado fu di yu e gi yesi na den wet fu en. „Disi na san a lobi gi Gado wani taki, dati wi e hori den komando fu en; èn toku den komando fu en no de wan hebi lai.”​—1 Yohanes 5:3.

Du san yu e leri. Yesus ben fruteri wan tori di e sori a sani disi. Wan koni man ben bow en oso na tapu klepston. Wan don man ben bow en oso na tapu santi. Di wan bigi winti wai, dan na oso di ben bow na tapu klepston no ben broko, ma na oso di ben bow na tapu santi ben fadon nanga wán lo babari. Yesus ben taki dati den sma di e yere den leri fu en èn e du den, de neleki a koni man di ben bow na tapu klepston. Ma den sma di e arki den leri fu en èn no e du den de neleki a don man di ben bow na tapu santi. Leki sortu wan fu den man yu wani de?​—Mateus 7:24-27.

A gi di wan sma e gi ensrefi abra na Gado. Disi wani taki dati yu e taki nanga Yehovah na ini begi en èn yu e taigi en taki yu wani du en wani fu têgo. Te yu e du a wani fu Gado, dan yu e sori taki yu na wan disipel fu Yesus Krestes.​—Mateus 11:29.

Dopu. „Teki dopu èn wasi yu sondu puru, fu di yu e kari en nen.”​—Tori fu den Apostel 22:16.

Du ala sani di yu man na ini a diniwroko fu Gado. „Awansi san unu e du, du en nanga un heri sili leki gi Yehovah èn no gi libisma.”​—Kolosesma 3:23.