„Poti prakseri na a fasi fa yu e arki”

TE YU wani leri wan sani, dan a de prenspari fu arki. Efu wan sma e arki, dan dati kan yepi en tu fu tan na libi. Di Yehovah ben sreka en pipel fu fri den fu katibo na Egepte, dan a ben taigi Moses san ben musu pasa. Baka dati Moses taigi den owruman fu Israel san den ben musu du fu frulusu den fosi geborewan fu den, so taki na engel no ben o kiri den (Ex. 12:21-23). Baka dati, den owruman ben fruteri den sani disi na ala osofamiri. Den ben fruteri disi nanga mofo. Den sma ben musu arki heri bun. San den ben du? Bijbel e fruteri: „Ala den manpikin fu Israel ben du soifri san Yehovah ben taigi Moses nanga Aron. Soifri dati na san den ben du” (Ex. 12:28, 50, 51). Fu di den du dati, meki Israel ben kisi frulusu na wan fruwondru fasi.

Now Yehovah e sreka wi fu si wan moro bigi frulusu srefi. Seiker, wi musu poti seryusu prakseri na den sani di a e leri wi. Den sani disi, wi e kisi fu yere na den gemeente konmakandra. Yu e nyan bun trutru fu den konmakandra disi? Furu e anga fu a fasi fa yu e arki.

Yu e memre wan tu sani di yu yere na den konmakandra? Yu abi a gwenti fu suku fu gebroiki den sani di yu yere na ini yu libi? Noso yu e pruberi fu prati den nanga trawan? Yu e pruberi disi ibri wiki baka?

Sreka yu ati

Efu wi wani nyan bun trutru fu den sani di wi e yere na den Kresten konmakandra, dan wi musu sreka wi ati. Fu san ede disi de prenspari? Disi wi kan si na san ben pasa na ini a ten di Yosafat ben de Kownu fu Yuda. Yosafat no ben frede fu opo taki gi a tru anbegi. A ben „puru den hei presi nanga den santa postu fu Yuda”. Baka dati a gi den kownu-manpikin, den Leifisma, nanga den priester a komando fu leri a pipel na ini ala den foto fu Yuda a Wet fu Yehovah. Ma toku, „den hei presi srefi no ben gowe” (2 Kron. 17:6-9; 20:33). Den sma ben anbegi falsi gado èn na anbegi di den ben anbegi Yehovah na den heiden hei presi, no ben bun kwetikweti. Na anbegi dati ben de so tranga, dati a no ben kan rutu puru.

Fu san ede a leri di Yosafat ben gi Yuda no ben tan langa? A tori e taki moro fara: „A pipel srefi no ben sreka den ati ete gi a Gado fu den fositen tata.” Den ben yere san den ben musu du, ma den no ben du san den yere. Kande den ben denki taki fu teki waka go na a tempel na ini Yerusalem fu tyari srakti-ofrandi, ben de wan muilek sani. Awansi fa a no fa, den no ben abi bribi, èn fu dati ede na ati fu den no ben pusu den fu du wan sani.

Efu wi no wani drifi gowe baka èn go du sani neleki fa Satan en grontapu e du sani, dan wi musu sreka wi ati fu kisi a leri di Yehovah e gi na ini a ten disi. Fa wi musu sreka wi ati? Wan prenspari fasi na fu begi. Wi musu begi taki wi kan sori fu de nanga tangi na ati te wi e kisi a leri fu Gado (Ps. 27:4; 95:2). Disi sa yepi wi fu warderi den muiti di wi brada e du. Aladi den de onvolmaakti, toku den e gi densrefi na Yehovah so taki A kan gebroiki den fu gi en pipel leri. Disi sa yepi wi fu taki Yehovah tangi gi den nyun sani di wi e leri, ma boiti dati, a sa gi wi na okasi fu kisi moro warderi gi den sani di wi leri kaba. Efu wi wani du ala sani di Gado wani, dan wi sa begi: „Leri mi, o Yehovah, fu den pasi fu yu. . . . Meki mi ati kon de wán fu man frede yu nen.”​—Ps. 86:11.

Hori yu prakseri na wán

Furu sani de di kan hari wi prakseri te wi wani arki wan tori bun. A kan taki wi e denki wan lo sani di e gi wi broko-ede. Te sma e meki babari èn te den e wakawaka na ini a konmakandra presi noso dorosei fu a presi, dan dati kan puru wi prakseri fu den tori di wi e arki. Te wi abi problema nanga wi gosontu, dan wi kan abi skin-ati èn dati kan meki en muilek gi wi fu poti yesi arki. Furu tron, den wan di abi yongu pikin e si taki den musu poti prakseri na den pikin disi tu, èn dati e meki taki den sma disi no man arki ala ten san e taki. San kan yepi wi fu hori wi prakseri na wán, so taki wi kan arki a heri programa?

Nanga wi ai wi kan si furu sani, èn den sani dati kan abi krakti na tapu san wi e prakseri. Gebroiki yu ai fu tan luku a takiman. Disi sa yepi yu fu hori yu prakseri na san a e taki. Te a takiman e leisi wan tekst fu Bijbel, srefi te a e leisi wan tekst di yu sabi kaba, dan suku a tekst tu èn leisi en makandra nanga a takiman te a e leisi en. Pruberi fu no drai yu ede fu luku ibri leisi te yu e yere wan sani noso te yu e si wan sma e opo. Efu yu ai e luku tumusi furu sani, dan disi sa puru yu prakseri fu san a takiman e taki, èn yu sa misi furu fu den sani di a e taki fu a podium.

Efu wan ’prakseri di e trubu yu’ e meki en muilek gi yu fu hori yu prakseri na a programa, dan yu musu begi Yehovah fu yepi yu, so taki yu kan hori yu frustan na wán èn so taki yu kan abi wan korostu ati. Disi yu abi fanowdu fu man poti ala yu prakseri na a programa (Ps. 94:19; Fil. 4:6, 7). Yu kan begi na so wan fasi, moro leki wán leisi efu dati de fanowdu (Mat. 7:7, 8). Yehovah gi wi den gemeente konmakandra tu. Yu kan de seiker taki a wani taki yu musu kisi winimarki fu den konmakandra.​—1 Yoh. 5:14, 15.

Arki den lezing

Kande yu kan kari wan tu moi sani di yu ben yere na ini lezing di hori. Ma fu arki wan lezing, abi moro na ini leki fu memre wan tu bun sani nomo. Wan lezing de neleki te wan sma ben o teki waka go na wan presi. Aladi a kan, taki a sma sa si wan lo moi sani te a de na pasi, toku a moro prenspari sani na fu doro na a presi pe a musu go. Kande a takiman wani yepi den arkiman fu frustan wan spesrutu tori èn meki den teki wan bosroiti, noso kande a wani meki den du wan spesrutu sani.

Prakseri a taki di Yosua ben hori gi a pipel fu Israel, soleki fa dati skrifi na Yosua 24:1-15. A sani di Yosua ben wani doro na fu gi a pipel deki-ati so taki den ben o tanapu kánkan gi a tru anbegi. Disi den ben o man du te den no ben o bumui nanga nowan sortu afkodrei fu den kondre lontu den. Fu san ede dati ben de so prenspari? Fu di falsi anbegi ben de so furu, meki a ben de wan bigi kefar gi a pipel. Den ben kan lasi a bun matifasi di den ben abi nanga Yehovah. Yosua begi a pipel, èn den piki en, èn den ben taki: „Wi fu wi sei, no ben sa kan gowe libi Yehovah kwetikweti fu go dini tra gado. . . . Wi sa dini Yehovah.” Èn na dati den ben du tu!​—Yos. 24:16, 18, 31.

Te yu e arki wan lezing, pruberi fu si krin san na a marki di a takiman wani doro. Prakseri fa den sani di a takiman e taki, e yepi fu doro a marki dati. Aksi yusrefi san yu musu du nanga den sani di a takiman e taki.

Arki te den takimakandra e hori

A Waktitoren-studie, a Gemeente Bukustudie, èn wan tu prati na a Diniwroko Konmakandra, e hori leki wan aksi-nanga-piki takimakandra fu sani di komoto fu Bijbel.

Efu yu e arki te a takimakandra e hori, dan te yu luku en bun, a de neleki yu e taki nanga wan sma. Efu yu wani nyan bun srefisrefi, dan yu musu arki bun. Arki bun sortu marki a takimakandra abi. Luku fa a brada di e hori a studie, e poti krakti tapu san na a moro prenspari tori. Te a brada di e hori a studie, e poti den aksi, dan prakseri fa yu ben o piki den aksi disi. Arki te tra sma e tyari a tori kon na krin èn te den e fruteri fa den denki taki wi kan gebroiki dati na ini wi libi. Efu yu e frustan fa trawan e si a tori, dan dati kan yepi yu si wan tori tra fasi leki fa yu ben si en kaba. Yusrefi kan sori fa yu e prakseri fu a tori, fu di yu tu e taki san yu e bribi.​—Rom. 1:12.

Te yu e studeri a tori na fesi, dan dati sa yepi yu arki den sani di e taki na a takimakandra èn teki den sani dati krinkrin na ini yu, èn a sa yepi yu tu fu frustan den piki di trawan e gi. Efu yu no abi na okasi fu studeri a tori finifini, dan pruberi fu teki awansi wan tu miniti nomo fu luku a tori di den brada sa taki fu en. Disi yu musu du fosi a konmakandra hori. Te yu sa du dati, dan dati sa yepi yu fu kisi moro winimarki fu a takimakandra.

Arki tapu den kongres nanga tra bigi konmakandra

Tra fasi leki na den gemeente konmakandra, dan na den kongres èn na tra bigi konmakandra, a kan pasa moro makriki taki sani kan hari wi prakseri puru. Disi kan meki taki a kan de moro hebi fu poti yesi arki tapu den bigi konmakandra. San kan yepi wi?

Wan prenspari sani na fu rostu bun te neti. Ibri dei, fosi a programa bigin, dan pruberi fu hori na prakseri san na a tori di o taki. Luku den nen fu ala den lezing, èn pruberi fu prakseri san yu sa yere. Gebroiki yu Bijbel bun. Furu sma kon si taki te den e skrifi wan tu prenspari penti syatu na tapu papira, dan dati e yepi den fu hori den prakseri na a programa. Skrifi den sani di yu yere èn di yu wani gebroiki na ini yu libi èn na ini yu diniwroko. Taki fu wan tu sani di yu leri, ibri dei te yu e go na a bigi konmakandra noso te yu e kon fu a bigi konmakandra. Disi sa yepi yu fu memre san yu ben leri.

Leri pikin-nengre fu arki

Kresten papa nanga mama kan yepi den pikin fu den, srefi den pikin-noti-pikin, fu kon „koni fu kisi frulusu”. Disi den kan du te den e tyari den pikin kon na den gemeente konmakandra, na den kongres èn na den tra bigi konmakandra (2 Tim. 3:15). Fu di a no ala pikin-nengre na a srefi èn a no ala pikin-nengre man sidon arki langa, dati meki yu musu abi a koni fu man si krin san de fanowdu fu yepi den poti yesi arki. Kande den rai di e kon now, sa man yepi yu.

Te yu de na oso, dan poti ten na wan sei fu meki den yongu pikin fu yu sidon leisi den buku di wi abi leki Kresten, noso fu den luku den prenki na ini den buku disi. Te yu de na den konmakandra, dan no gi den yonguwan fu yu preisani, soso fu meki den abi wan sani fu du. Neleki fa a ben de na ini Israel fu owruten, na so a de tu na ini a ten disi, taki yonguwan e kon na den konmakandra „so taki den kan arki èn so taki den kan leri” (Deut. 31:12). Te a kan, dan wan tu papa nanga mama e gi den pikin-noti-pikin fu den wan eigi buku srefi fu den tori di e taki tapu a konmakandra. Te den pikin-nengre e kon pikinso moro owru, dan yepi den fu sreka densrefi so taki den kan abi wan prati na den takimakandra pe den arkiman mag gi piki tu.

Den Buku fu Bijbel e sori krinkrin taki fu arki Yehovah èn fu gi yesi na en, na tu sani di abi furu fu du nanga makandra. Disi wi kan si na ini den wortu di Moses ben taigi a pipel fu Israel: „Mi poti libi nanga dede na yu fesi, blesi nanga fluku; èn yu musu frukisi libi . . . fu di yu lobi Yehovah, yu Gado, fu di yu e arki en sten èn fu di yu e tan hori na en” (Deut. 30:19, 20). Na ini a ten disi, a de prenspari fu wi arki den sani di Yehovah e leri wi èn fu wi gi yesi na den, so taki wi kan gebroiki den na ini wi libi. Disi de prenspari efu wi wani taki Gado feni wi bun èn efu wi wani kisi a blesi fu têgo libi. Fu dati ede, a de prenspari srefisrefi taki wi e gi yesi na a warskow di Yesus ben gi: „Poti prakseri na a fasi fa yu e arki”!​—Luk. 8:18.