De wan Bun Arkiman
1 Wan sma di wani arki nanga ala en prakseri, musu dwengi ensrefi fu du dati. Na arkiman musu wani tu fu leri sani èn fu kisi wini fu san a e yere. Fu dati ede Yesus ben poti krakti na tapu taki a prenspari fu ’poti prakseri na a fasi fa yu e arki’.—Luk. 8:18.
2 Wi musu du disi spesrutu te wi e go na den gemeente konmakandra, den bigi konmakandra nanga den kongres. Te wi e go na den konmakandra disi, dan dati na okasi pe wi musu arki bun (Hebr. 2:1). Dyaso wan tu penti de di sa yepi yu fu de wan bun arkiman na den Kresten konmakandra disi.
◼ Yu musu frustan o prenspari den konmakandra de. Den de wan prenspari fasi fa ’Yehovah e gi wi leri’ nanga yepi fu a „getrow basya”.—Yes. 54:13; Luk. 12:42.
◼ Yu musu sreka yusrefi na fesi. Luku sortu tori den sa taki fu den na den konmakandra, èn no frigiti fu tyari yu Bijbel nanga yu eigi eksemplaar fu a publikâsi di den e studeri.
◼ Te den konmakandra e hori, dan yu musu du muiti spesrutu fu poti prakseri na den sani di den e taki fu den drape. Yu musu luku fu no takitaki nanga den sma di e sidon na yu sei, èn luku lontu fu si san den tra sma na ini a zaal e du. Pruberi fu no meki sani puru yu prakseri fu di yu e sidon prakseri san yu o du te a konmakandra kaba noso e prakseri tra sani.
◼ Ondrosuku san yu e yere. Aksi yusrefi: ’San disi abi fu du nanga mi? O ten mi sa gebroiki en?’
◼ Skrifi den moro prenspari sani nanga bijbeltekst tapu papira. Disi e yepi yu fu poti ala yu prakseri na san den brada e taki. A e yepi yu tu fu memre prenspari sani di yu kan gebroiki baka ten.
3 Leri den Pikin fu Yu fu Arki: Pikin-nengre musu kisi leri na yeye fasi (Deut. 31:12). Na ini owruten, „ala sma di ben abi nofo frustan fu arki” èn di ben de na mindri Gado pipel, ben musu arki nanga ala den prakseri te sma ben leisi a Wet gi den (Neh. 8:1-3). Efu papa nanga mama e teki prati na den konmakandra èn e poti prakseri trutru, dan a kan taki den pikin fu den ben sa wani du dati tu. A no wan koni sani fu tyari preisani noso buku nanga prenki di den pikin kan kloru, so taki den abi wan sani fu du. Efu yu e tyari yu pikin go na toilet sondro taki a de fanowdu trutru, dan a pikin no e leri fu arki bun. Fu di „lawfasi tai na a ati fu wan boi”, meki den papa nanga mama musu meki furu muiti fu sorgu taki den pikin fu den sidon tiri èn arki te den de na den konmakandra.—Odo 22:15.
4 Te wi de bun arkiman, dan wi e sori taki wi koni trutru, èn taki wi wani ’teki moro leri na ini wi’.—Odo 1:5.