Yepi pikin fu nyanbun moro fu komankandra
1 Te yu pikin e fisiti komakandra, dan den e arki trutru? Den kan ferteri yu baka ibri komakandra sani di den ben leri? Yu ben gi den dek’ati fu poti prakseri èn fu meki gebroiki fu sabi di den kisi fudi den e arki bun? Yu e gi den wan bun eksempre nanga san yu taki na tapu den komakandra, wan eksempre di den kan si, yere èn waka na en baka? Positief piki na tapu den aksi disi de tumsi prenspari efu pikin wani gro leki dienstknegti fu Yehovah di e gi densrefi krinkrin na ini en anbegi.
POTI GO NA INI DEN PRAKSERI NA PRENSPARI FASI FU A FISITI FU KOMAKANDRA
2 Wan pikin abi bijbelleri fanowdu efu a wani kisi tego libi (Yoh. 17:3). Efu wan pikin wani leri fu warderi yeye sani, dan na fisiti fu komakandra de fanowdu. Sontron papa nanga mama e draidrai fu teki den pikin go na komakandra fudi den e frede dati den pikin sa stoor trawan. Wantu fu den e libi den pikin fu den tan na oso fu meki den osowroko fu skoro. Ma wan koni papa ofu mama e meki den pikin go na den komakandra. — Deut. 31:12.
3 A fosi sani di wan pikin fu sensi pikinnengreten mu leri de dati a mu go na Kownukondrezaal fu arki. Ma efu a e kisi sani fu hori en bezig, soleki preisani ofu sukrusani ofu froktu, ofu a mag prei tapu en sturu dan a sa leri fu arki èn kon si fu san-ede wi e fisiti komakandra na ini na Kownukondrezaal? Ma efu wan pikin no e tyari ensrefi bun, dan wan ferstandiki papa ofu mama sa poti dati kon reti èn yepi en na wan lobi fasi fu arki, no fudi a o bai en kon na en sei nanga wan switi-sani ofu preisani ma nanga na trangaleri fu poti na Wortu fu Gado na ini en libi. — Odo 13:24; Ef. 6:4.
NA EKSEMPRE FU YU LEKI PAPA OFU MAMA
4 Na Wachttoren fu 15 mei 1982 ben taki na tapu bladzijde 14 den aksi di e kon now: „Yu pikin sabi taki yu e teki bijbelstudikomakandra seryusu? Den e si dati yu e feni den komakandra disi prenspari nofo no wawan fu de drape ma fu abi wan prati na den èn fu gi kommentaar te den e aksi fu disi?” Efu yu pikin e si dati na a ten fu na komakandra yu e taki fu soso ofu yu ofu trawan e prei nanga den, sortu indruk dati sa meki dan tapu den? Fa den sa si den komakandra? Di pikinnengre de sma di man fu gersi tra sma, dan na eksempre fu yu sa abi bigi krakti tapu den. Te yu luku en bun dan wi alamala kan gi pikinnengre wan bun eksempre fudi wi no e taki ofu e syusyu fu soso, èn efu dati de trutru fanowdu fu taki wan sani fu respeki gi tra sma fu du en so safri leki a kan.
5 Son papa nanga mama ben feni en bun fu gi pikinnengre den eigi eksemplaar fu den buku di e gebroiki tapu den komakandra. Den e yepi den pikin fu den kande na a ten fu na osofamiristudi fu sreka kommentaar di fiti. Papa nanga mama kan gi dek’ati na den pikin ooktu fu luku ete wantron den punt di ben taki na tapu den komakandra, èn fu teki ten fu piki den aksi di den sa abi kande. Papa nanga mama mu luku bun ooktu fu prijse den pikin fu den fu na prati di den e teki na den komakandra.
6 A de tru dati na a opleiding disi tranga wroko fu a sei fu den papa nanga mama de fanowdu. Ma fu du sani na a fasi fu Gado e tyari bun winimarki kon. Soleki na tekst e taki: „Na regtvaardikiwan e waka na ini en soifri-retifasi. Koloku den manpikin fu en baka en de”. — Odo 20:7.