Fa yu musu gebroiki a mikrofon

DEN Kresten brada nanga sisa fu wi e teki den ten èn den e du furu muiti fu de tapu den Kresten konmakandra. Efu den musu kisi winimarki fu den sani di e taki, dan den musu yere krin san e taki tapu den konmakandra.

Na ini Israel fu owruten, den sani soleki mikrofon nanga tra sani fu meki sma yere sani moro bun, no ben de. Bifo a pipel fu Israel ben go na ini a Pramisi Kondre, dan Moses ben taki nanga den na a opo presi fu Moab. Ma fa ala den milyunmilyun arkiman di ben drape ben man yere san Moses ben taki? Kande Moses ben poti wan tu man na spesrutu presi na a heri kampu, so taki den man disi ben man fruteri trawan baka san Moses ben taki (Deut. 1:1; 31:1). A no langa baka di Israel bigin teki a pisi kondre abra na a westsei fu a Yordan, dan Yosua ben meki a pipel kon makandra na fesi a bergi Gerisim nanga a bergi Ebal, èn soleki fa a sori dan den Leifisma ben de na a lagipresi di ben de na mindri den tu bergi disi. Drape ala den sma ben yere èn ben piki „Amen” tapu den blesi nanga den fluku fu Gado di den ben yere (Yos. 8:33-35). A kan, taki na a okasi disi den ben du a srefi sani leki san Moses ben du fu meki ala sma yere den wortu fu en, ma sondro tweifri a presi srefi, ben de wan presi pe ala sma ben kan yere den wortu krin di Yosua ben taki a dei dati.

Sowan 1500 yari baka dati, di „wan heri ipi sma ben kon” na a Se fu Galilea fu yere Yesus, a go na ini wan boto, a boto komoto fu syoro, èn Yesus ben sidon na ini a boto fu taki nanga den sma (Mark. 4:1, 2). Fu san ede Yesus go na ini wan boto fu taki nanga den sma? Soleki fa a sori, dan a libisma sten de fu yere moro krin te a musu pasa tapusei fu wan grati liba.

Teleki a bigin fu a di fu 20 yarihondro, dan furu tron na a krin sten nanga a krakti sten fu wan takiman ben meki taki furu sma ben man yere san a ben taki. Ma toku, sensi den yari baka 1920, dan den futuboi fu Yehovah ben man meki bun gebroiki fu sani soleki mikrofon nanga versterker fu meki wan sma sten de moro bun fu yere na den kongres fu den.

Sani soleki versterker. Den sortu yepisani disi kan meki wan takiman en sten piki moro tranga, èn toku na a srefi ten wan sma e yere a srefi sten fu a takiman. A takiman no abi fu du bun furu muiti fu meki sma yere en sten. Den arkiman no abi fu du bun furu muiti fu man yere san a takiman e taki. Na presi fu dati, dan den kan poti prakseri fu arki a boskopu.

Tapu den kongres nanga den tra bigi konmakandra fu wi leki Yehovah Kotoigi, wi e du furu muiti fu abi den yepisani soleki versterker. Boiti dati, na ini furu Kownukondre zaal den e gebroiki den yepisani disi fu meki a sten fu sma piki moro tranga te den e hori lezing, ma sosrefi te den e teki fesi na wan konmakandra, noso te den e leisi na tapu a podium. Èn wan tu gemeente abi mikrofon srefi gi den arkiman fu gi komentaar tapu den konmakandra. Efu yu gemeente abi den sortu sani disi, dan leri fu gebroiki den bun.

Wan tu prenspari sani. Efu yu wani gebroiki den yepisani disi bun, dan hori den fo sani disi na prakseri: (1) A mikrofon musu de sowan 10 teleki 15 centimeter fu yu mofo. Efu a mikrofon de tumusi krosibei, dan kande den wortu fu yu no sa de fu yere soleki fa yu taki den trutru. Efu a mikrofon de tumusi fara, dan den sma no sa yere yu so bun moro. (2) A mikrofon sa musu de leti na yu fesi, a no musu de sei yu mofo. Efu yu e drai yu ede go na a reti-anusei noso na a kruktu-anusei, yu musu taki soso te yu fesi de leti na fesi a mikrofon. (3) Taki pikinso moro tranga leki fa yu gwenti taki nanga sma, èn taki nanga pikinso moro faya tu. Ma a no de fanowdu fu bari. A versterker sa sorgu taki ala den arkiman sa man yere yu. (4) Efu yu wani krin yu gorogoro, noso efu yu musu kosokoso noso efu yu musu blo yu noso, dan sorgu taki yu drai yu ede komoto fu a mikrofon.

Te yu e hori wan lezing. Te yu tanapu na fesi a pikin tafra fu a takiman, dan soleki fa a gwenti de, wan brada sa seti a mikrofon gi yu. Te a brada e seti a mikrofon gi yu, dan tanapu neleki fa yu gwenti tanapu, nanga yu fesi go na den arkiman. Poti den papira fu yu na tapu a pikin tafra fu a takiman, èn sorgu taki a mikrofon no meki taki yu no man si den papira so bun moro.

Te yu e bigin taki, dan arki fa a sten fu yu de. A sten fu yu tranga tumusi? Noso a gersi taki den letter leki „p” e sutu pikinso te yu e taki? Dan kande a sani di yu musu du, na fu go 2,5 teleki 5 cm moro na baka fu a mikrofon. Te yu e luku den sani di de tapu den papira fu yu, dan memre taki yu musu taki èn leisi soso te yu fesi sori go na a mikrofon noso te yu fesi de pikinso moro hei leki a mikrofon; no taki te yu fesi de na ondro a mikrofon.

Te yu e leisi komoto fu a podium. A moro bun fu hori yu Bijbel noso wan tra buku na so wan fasi taki den arkiman e si yu fesi. Fu di kande a mikrofon sa de leti na yu fesi, dati meki kande yu sa musu hori a sani di yu musu leisi, pikinso go na wan sei. Disi wani taki dati yu ede musu drai pikinso go na a tra sei fu a mikrofon. Efu yu e du disi, dan te yu e leisi, yu sa taki langalanga na ini a mikrofon.

Furu brada di e leisi tapu a Waktitoren-studie e tanapu èn e taki na ini wan mikrofon di seti leti-opo. Te den tanapu so, dan dati e meki taki den kan bro moro bun èn den kan leisi nanga moro faya. No frigiti taki a moro bigi pisi fu a konmakandra dati, na a leisi di wan brada e leisi den paragraaf. Moro furu den arkiman sa man nyan bun, te den e yere ala sani di a brada e leisi.

Te yu e gi komentaar tapu a konmakandra. Efu yu gemeente e gebroiki mikrofon gi den arkiman, dan memre taki a de prenspari tu taki yu musu taki soifri èn tranga nofo te yu o taki wan sani na ini a mikrofon. Te yu e gi komentaar, dan meki muiti fu hori a Bijbel noso tra sani di wi e studeri, na ini yu anu. Disi sa yepi yu fu si a pisi tori krin te yu e taki na ini a mikrofon.

Na ini wan tu gemeente a de so, taki brada abi a wroko fu tyari a mikrofon gi wan sma di o gi komentaar. Efu dati de so na ini yu gemeente, dan tan opo yu anu te yu musu gi komentaar, so taki a brada di e waka nanga a mikrofon, kan si pe yu e sidon èn so taki a kan doro esi na yu. Efu a mikrofon na wan di yu musu hori na yu anu, dan de srekasreka fu teki a mikrofon na ini yu anu te a doro. Bigin gi yu komentaar, baka te yu hori a mikrofon soifri. Te yu kaba taki, dan gi a brada a mikrofon baka wantewante.

Te yu e hori wan demonstrâsi. Te yu sa gebroiki wan mikrofon gi wan demonstrâsi, dan yu musu denki bun san yu musu du. Efu a mikrofon seti leti-opo, dan yu sa abi ala yu tu anu fu hori yu Bijbel nanga den papira fu yu. Efu yu sa gebroiki wan mikrofon di yu kan hori na yu anu, dan dati e meki taki yu kan buweigi moro fri, ma yu musu meki mofo nanga yu patna fu hori a mikrofon gi yu. Dati sa meki taki yu abi ala yu tu anu fu gebroiki yu Bijbel. Yu nanga yu patna di e prei leki ososma musu sreka unsrefi, so taki yu patna sabi fa a musu hori a mikrofon bun gi yu. No frigiti tu taki te yu de na tapu a podium, èn spesrutu te yu e taki, dan yu no musu drai yu baka gi den arkiman.

Na den demonstrâsi tapu a Diniwroko Konmakandra, dan kande moro sma sa de, èn kande den sa waka na tapu a podium. Sobun, kande moro mikrofon de fanowdu. Den mikrofon disi musu seti kaba gi den sma di abi wan prati, te den go na tapu a podium. Fu sorgu taki den mikrofon de na a yoisti presi tapu a yoisti ten, dan sani musu sreka bun na fesi. Te yu e sreka a demonstrâsi wan tu leisi, fosi a dei doro di yu musu hori en, dan dati e gi yu na okasi fu sori den sma di abi wan prati, fa den musu gebroiki den mikrofon bun. Te yu no man sreka yusrefi na tapu wan podium, dan kande a ben sa bun taki den sma di abi wan prati, hori wan sani di gersi wan mikrofon, so taki den kan leri fa den musu hori wan mikrofon bun. Baka te a demonstrâsi hori, dan den sma di ben abi wan prati, no musu poti den mikrofon grofu na tapu a tafra, èn den musu luku bun taki den no fadon abra den titei di e waka go na den mikrofon te den e gowe fu a podium.

Te wi e poti prakseri na a fasi fa wi musu gebroiki den mikrofon, dan wi e du wan sani di abi wantewante fu du nanga a marki di wi abi nanga wi konmakandra; dati na taki wi wani taki fu Gado Wortu so taki wi alamala makandra kan nyan bun fu dati (Hebr. 10:24, 25). Te wi e leri fu gebroiki den mikrofon bun, dan wi kan yepi wisrefi fu doro a marki disi.