A Diniwroko-konmakandra e sreka wi gi ibri boen wroko
1 A marki foe a Diniwroko-konmakandra na foe boeweigi èn foe sreka wi foe teki moro foeroe prati ini a preikiwroko èn ini a wroko foe meki disipel (2 Tim. 3:17). Ma, efoe wi no sreka wisrefi boen gi a konmakandra noso efoe wi no e doe san wi e leri, dan den winimarki sa de pikinso nomo.
2 Te joe e sreka joesrefi na fesi, dan disi sa jepi joe foe teki a bodoi moro boen ini joe. Loekoe den poeblikâsi baka di den sa gebroiki, èn tjari den nanga joe go na a konmakandra, so taki joe kan leisi te a takiman e taki foe den èn so taki joe man teki prati. Poti boen prakseri te joe e arki, èn skrifi den sani di joe kan gebroiki bakaten.
3 A fesiman opziener e loekoe den prati foe a konmakandra tapoe a schema finifini baka. Bekwaam owroeman nanga dinari ini a diniwroko, e kisi a toewijzing foe sreka den prati disi (om blz. 72, 73, Bakratongo). Gemeente di no abi nofo owroeman nanga dinari ini a diniwroko, kan gi tra bekwaam brada a toewijzing foe jepi den (km 12/76, Aksi boksoe, Bakratongo). Ibri takiman moesoe sreka boen, moesoe hori ensrefi na den bodoi di gi ini a schema, èn moesoe doe moeiti foe no pasa a ten di a kisi.
4 Leki fa a gwenti de, dan a konmakandra e bigin nanga wan toe sani gi a gemeente. A brada di kisi a toewijzing foe doe dati, moesoe taki nanga a fesiman opziener na fesi, foe kan kon sabi foe sortoe afersi a moesoe taki. Den afersi disi kan de brifi foe a Genootschap noso sani foe memre wi gi sani di sreka gi a velddienst noso gi den ala-moen raport. Kande wi e jere taki sikisma de di moesoe kisi fisiti noso wi e jere finifini tori foe den wroko di a gemeente wani foe doe gi a ten di de na wi fesi. Arki boen so taki joe sa sabi sani èn de klariklari foe fisiti den sikisma noso foe teki prati na den wroko foe a gemeente.
5 Te a de fanowdoe taki wan prati foe a konmakandra moesoe hori nanga den arkiman, dan sreka joesrefi foe di joe e leisi a materiaal èn e soekoe den tekst. Prakseri fa joe wani gebroiki den rai èn sortoe komentaar joe kan gi foe gi trawan deki-ati. Joe kan sori a praktis waarde foe a bodoi foe di joe e froeteri wan sjatoe ondrofenitori.
6 Te wan demonstrâsi de, proeberi dan foe poti joesrefi na ini a situwâsi dati, èn prakseri san joe ben o taki. Poti prakseri na tapoe den boeweisi di den ben gebroiki èn a fasi fa den ben taki-go-taki-kon. Proeberi foe memre san joe ben taki a lasti tron di joe ben de na ini so wan sortoe situwâsi, èn loekoe fa den penti di den ben demo kan jepi joe foe kisi moro boen bakapisi ini a ten di e kon.
7 Den sma di e teki prati na demonstrâsi nanga na aksi-takimakandra, moesoe oefen a prati foe den boen na fesi. Ibriwan sma moesoe sabi san a sa taki èn san a moesoe doe na tapoe a podium. Moro foeroe a de so, taki den prati di no oefen boen na fesi, no e boeweigi noso no e gi deki-ati na den arkiman. Son sma di abi wan prati, e kon srekasreka foe oefen a pisi foe den na a kaba foe a Waktitoren-studie di hori a wiki na fesi, so taki den kan oefen na tapoe a podium èn foe meki den brada di e sorgoe gi den mikrofon sabi san o de fanowdoe.
8 Son tron a programa sa abi wan lezing na ini di e taki foe wan spesroetoe fanowdoe foe a gemeente noso foe wan Waktitoren artikel di e kon na a joisti ten. Arki boen, teki a rai na ati, èn doe moeiti foe fiti en na ini joe libi.
9 Wi wani de „srekasreka gi ibri boen wroko” (2 Tim. 2:21). A Diniwroko-konmakandra na wan foe den sani di Jehovah seti foe jepi wi foe doe dati. A fisiti foe konmakandra na wan getrowfasi èn na opregti moeiti foe gebroiki san wi e leri, sa jepi wi foetroe, so taki wi kan „doe wi diniwroko dorodoro”. — 2 Tim. 4:5.