Rai gi den wan di abi wan prati na a Diniwroko Konmakandra
Bigin nanga Wi Kownukondre diniwroko fu a mun disi, wan tu sani sa kenki na a schema fu a Diniwroko Konmakandra. Den rai di e kon now o meki wi frustan den tori moro bun di skrifi na ini na artikel di nen: „Fa wi musu sreka wisrefi gi a Diniwroko Konmakandra”, na ini Wi Kownukondre diniwroko fu mei 2009. Den sani disi na:
◼ Lezing: A takiman e hori wan lezing di teki puru fu wan pisi na ini wan publikâsi, èn den arkiman no o teki prati na a pisi disi. A takiman musu poti prakseri na sani di kan yepi a gemeente.
◼ Aksi nanga piki: A pisi disi e hori pikinmoro a srefi leki a Waktitoren-studie. A takiman e taki syatu wan tu sani na a bigin èn na a kaba, èn a e poti den aksi fu ala den paragraaf. A takiman no musu taki tumusi furu. Te nofo ten de, dan wan sma kan leisi den prenspari Bijbeltekst. Wan sma no musu leisi den paragraaf, boiti efu a skrifi taki dati musu du.
◼ Takimakandra: A takiman e hori wan lezing, èn den arkiman kan teki prati na a pisi disi. A pisi disi no de wan lezing nomo, èn a no de wan takimakandra fu soso aksi nanga piki.
◼ Demonstrâsi nanga interview: Te a skrifi taki wan demonstrâsi musu hori, dan dati wani taki dati a brada di e hori a pisi disi, abi a frantwortu fu sorgu taki wan demonstrâsi e hori. Ensrefi no abi fu hori a demonstrâsi. Den sma di a aksi fu yepi en musu man hori a demonstrâsi bun, den musu de sma di de wan bun eksempre na ini a gemeente, èn a musu aksi den biten fu hori a demonstrâsi. A no ben o bun fu meki nyun preikiman di no abi ondrofeni, sori fa a preikiwroko musu du, soso fu meki den sma disi kisi na okasi fu go na tapu a podium. Ma sonwan fu den, a brada kan gebroiki leki ososma na ini wan demonstrâsi. Den preikiman di e hori wan demonstrâsi, musu luku den arkiman. Te a takiman e interview wan sma, dan a sma musu de na tapu a podium, na presi taki a e sidon na ini a zaal. Den sma di musu hori wan demonstrâsi noso di de na ini wan interview musu oefen dati na fesi. Efu ten no de moro èn a brada musu syatu a pisi di a e hori, dan a o sorgu taki den demonstrâsi noso interview go doro. Fosi wan dinari ini a diniwroko aksi wan sma fu hori demonstrâsi noso interview, a musu aksi a fesiman fu den owruman noso wan tra owruman efu a fiti fu gebroiki so wan sma.
Efu spesrutu rai gi fa fu hori wan prati, dan den brada musu hori densrefi na den rai disi. Te den brada e hori a pisi fu den fu a Diniwroko Konmakandra soleki fa a skrifi na tapusei, dan den kan meki a Diniwroko Konmakandra waka „na wan fasi di fiti èn soleki fa sani seti”.—1 Kor. 14:40.