Fa wi musu sreka wisrefi gi a Diniwroko Konmakandra?
1. Fu san ede a Diniwroko Konmakandra seti, èn fa wi kan kisi moro wini fu en?
1 A Diniwroko Konmakandra seti fu yepi wi fu du a diniwroko bun. A Diniwroko Konmakandra e taki moro furu fu a preiki fu a bun nyunsu fu a Kownukondre, a meki fu disipel, èn a meki di wi musu meki bekènti taki Gado o krutu ogrisma heri esi (Mat. 28:20; Mark. 13:10; 2 Petr. 3:7). Wi o kisi moro wini fu a prenspari konmakandra disi te wi e sreka wisrefi bun èn te wi de klariklari fu teki prati na en.
2. Fa wi kan sreka wisrefi fu arki wan lezing?
2 Den lezing: Nofo tron a skrifi kaba sortu publikâsi a takiman musu gebroiki fu sreka a lezing fu en. Yu kan luku den pisi pe a lezing teki puru èn yu kan luku sosrefi den Bijbeltekst di kari na ini a publikâsi. Yu kan prakseri fa yu kan fiti den sani dati na ini yu diniwroko.
3. San wi kan du fu sreka wisrefi gi wan aksi-nanga-piki takimakandra?
3 Aksi-nanga-piki takimakandra: A pisi disi e hori pikinmoro a srefi leki a Waktitoren-studie. A takiman e taki syatu wan tu sani na a bigin èn na a kaba. Hari strepi na ondro den prenspari pisi fu ibri paragraaf, èn de srekasreka fu gi syatu piki di e tyari den moro prenspari sani kon na krin.
4. Fa wi kan sreka wisrefi gi wan takimakandra nanga den arkiman?
4 Takimakandra nanga den arkiman: A pisi disi e hori leki wan lezing, ma a takiman sa poti wan tu aksi gi den arkiman. Te yu e hari strepi na ondro den prenspari pisi èn te yu e luku den Bijbeltekst di kari, dan yu o man gi piki tapu den aksi di a takiman e poti. A brada di e hori a pisi disi sa du muiti fu gi den arkiman na okasi fu teki prati na a takimakandra, so taki den prenspari pisi kon na fesi.
5. San sa yepi wi fu kisi moro wini fu den demonstrâsi?
5 Demonstrâsi: Son pisi fu a konmakandra abi demonstrâsi na ini, di e sori fa sani e waka trutru na ini a preikiwroko èn fa wi kan gebroiki den sani di wi leri na ini a kontren pe wi e preiki. A takiman kan aksi owruman, preikiman di abi ondrofeni, noso pionier fu hori a demonstrâsi. Yu kan sreka yusrefi gi a pisi disi, te yu e prakseri na fesi fa a demonstrâsi o hori. Te wan demonstrâsi e hori, dan prakseri san yu ben o taki èn fa yu ben o fiti en na difrenti ososma. Sorgu taki yu tyari a publikâsi noso a tijdschrift di den o gebroiki na ini a demonstrâsi. Tapu a dei te yu e kon makandra nanga yu osofamiri fu anbegi Gado, dan a ben o bun fu oefen sonwan fu den demonstrâsi disi.
6. Fu san ede wi musu sreka wisrefi gi a Diniwroko Konmakandra?
6 Wi o kisi moro wini fu a Diniwroko Konmakandra, te wi e sreka wisrefi gi den difrenti pisi èn te wi e prakseri na fesi fa den pisi dati o hori. Te wi e du dati, dan wi o man gi makandra moro deki-ati (Rom. 1:11, 12). Te wi e teki ten fu sreka wisrefi gi a Diniwroko Konmakandra, dan wi o man du wi wroko moro bun.—2 Tim. 3:17.