Aksi di opo kon

◼ Fa wi kan hori den gemeente konmakandra, sondro fu pasa a ten?

Ten e pasa esi-esi te wi nanga mati e taki wan switi tori. Fu dati ede, a no de makriki fu hori wisrefi na a ten di wi kisi gi den prati fu a konmakandra. San wi kan du?

Bigin biten. Te a heri gemeente e kon makandra, dan a bun fu gi den arkiman wan kari fu teki den sidonpresi wán noso tu miniti bifo unu bigin a programa so taki a konmakandra kan bigin biten sondro taki sani waka bruyabruya (Preik. 3:1). Te wi e kon makandra nanga wan moro pikin grupu, soleki den preikiwroko konmakandra, dan wi no abi fu wakti den wan di musu kon ete, ma wi musu bigin wantewante.

Sreka yusrefi bun. Wan prenspari fasi di kan yepi yu fu hori yusrefi na a ten di yu kisi, na fu di yu e sreka yusrefi bun na fesi. Hori a marki fu a prati na prakseri. Kon sabi san na den moro prenspari penti, èn poti krakti na den tapu. Luku bun taki yu no poti tumusi furu prakseri na den finifini tori di no de so prenspari. Hori a takimakandra makriki. Efu yu musu hori wan demonstrâsi noso wan interview na ini a prati fu yu, dan oefen den na fesi. Efu a kan, dan oefen a prati fu yu nanga wan tranga sten aladi yu e luku o langa a e teki fu hori a prati.

Prati den sani di yu wani taki na ini difrenti pisi. Efu yu musu hori wan lezing noso wan takimakandra nanga den arkiman, dan yu sa feni en bun fu prati den sani di yu sa taki na ini pikinpikin pisi. Bosroiti o langa yu sa taki fu wan pisi, èn skrifi dati syatu na a lanki fu a papira fu yu. Dan yu musu hori a ten na prakseri te yu e hori a takimakandra. Te yu abi wan takimakandra nanga den arkiman, dan yu musu luku bun taki yu no meki den sma gi tumusi furu piki na a bigin pisi. Bakaten dati kan meki taki yu o hasti yusrefi te yu musu taki fu den moro prenspari sani. Den wan di e teki fesi na a Waktitoren-studie musu libi nofo ten fu taki fu den aksi na ini a faki, na a kaba fu a studie. Den musu luku bun sosrefi fu no go ini a ten fu a lasti singi nanga begi.

Tapu biten. Efu wan konmakandra abi difrenti pisi, leki wan Diniwroko Konmakandra, dan ibri takiman musu sabi o ten a pisi fu en e bigin, èn o ten a musu kaba. San yu kan du te yu e si taki a konmakandra no o kaba biten? Kande wan tu brada kan pruberi fu hori a prati fu den moro syatu fu di den o taki soso fu den moro prenspari penti èn no fu pikinpikin sani di no de so prenspari. Te yu man du disi, dan dati e sori taki yu na wan bun leriman.

Wi leki arkiman kan yepi a brada di e teki fesi fu di wi e gi syatu piki, èn fu di wi no e taki langa fu sani di no de prenspari. Na a fasi dati, wi alamala kan sorgu taki den konmakandra e waka „na wan fasi di fiti èn leki fa sani seti”.—1 Kor. 14:40.