A nyun schema gi a gemeente konmakandra
1, 2. Sortu kenki sa kon na den konmakandra, bigin fu yanuari 2009?
1 Na ini a wiki fu 21-27 april 2008, brada nanga sisa na heri grontapu ben yere wan prisiri nyunsu. „Bigin fu 1 yanuari 2009, a Gemeente Bukustudie sa hori na a srefi dei leki a Theokrasia Diniwroko-skoro nanga a Diniwroko Konmakandra. A nen fu a Gemeente Bukustudie o de Gemeente Bijbelstudie.”
2 Schema gi na alawiki konmakandra disi: A heri konmakandra, makandra nanga singi èn begi, o de 1 yuru nanga 45 miniti. A konmakandra o bigin nanga singi èn begi (5 min.), èn baka dati a Gemeente Bijbelstudie (25 min.) o hori. Wantewante baka dati, a Theokrasia Diniwroko-skoro (30 min.) sa bigin. Baka dati, wi sa bigin a Diniwroko Konmakandra (35 min.) nanga wan singi (5 min.). A konmakandra sa tapu nanga singi èn begi (5 min.). Fu yepi yu fu sreka yusrefi gi den konmakandra disi, a schema gi a Gemeente Bijbelstudie, gi a Theokrasia Diniwroko-skoro nanga a Diniwroko Konmakandra sa kon ibri mun na ini Wi Kownukondre diniwroko.
3. Fa a Gemeente Bijbelstudie sa hori?
3 A Gemeente Bijbelstudie: A konmakandra disi sa hori leki a Waktitoren-studie. A no sa de fanowdu fu luku fosi san wi ben leri a wiki na fesi. Na presi fu dati, den sani di a brada o taki na a bigin musu syatu. Disi sa meki taki nofo ten de gi ala sma fu gi syatu piki. A fesiman-opziener sa seti sani so taki ala wiki wan tra owruman e hori a konmakandra disi.
4. Sortu kenki o kon na ini a Diniwroko Konmakandra?
4 A Diniwroko Konmakandra: A Diniwroko Konmakandra o tan a srefi, ma den pisi di den brada sa hori o kon moro syatu. Den sani di musu meki bekènti sa de feifi miniti. A ten disi musu de nofo fu meki den prenspari sani bekènti èn fu leisi spesrutu brifi fu a bijkantoro. Den sani soleki den preikiwroko konmakandra, a krin fu a zaal, a raportu fu moni afersi, nanga tra brifi di a bijkantoro gwenti fu seni, no abi fu leisi moro. Den musu poti den sani disi na tapu a bord so taki ala sma kan leisi den. Den sma di abi wan prati na a konmakandra, musu sreka densrefi bun, den musu hori densrefi na den rai di skrifi èn na a ten di den kisi.
5. Fa a schema fu a gemeente konmakandra sa de na ini a wiki te a kring-opziener e fisiti a gemeente?
5 A fisiti fu a kring-opziener: A schema gi a wiki fu a kring-opziener, no sa kenki. Tapu tudewroko, a Theokrasia Diniwroko-skoro nanga a Diniwroko Konmakandra o hori, èn baka dati wi o singi. Baka dati, a kring-opziener sa hori wan lezing fu 30 miniti. Neleki fa a de now taki a Bukustudie e hori tapu wan tra dei te a kring-opziener e fisiti a gemeente, na so a Gemeente Bijbelstudie sa hori tapu wan tra dei. Baka dati wi o singi èn a kring-opziener sa hori a dienst-lezing fu en. A konmakandra sa tapu nanga singi èn begi.
6. San na a frantwortu fu a grupu-opziener?
6 Preikiwroko konmakandra: Den owruman fu a gemeente, sa poti grupu-opziener fu luku den preikiwroko grupu èn den brada disi musu poti prakseri na ibri sma na ini a grupu fu den. Te a de fanowdu taki wan dinari ini a diniwroko abi a frantwortu fu luku a grupu, dan en o de a grupu-dinari.
7. San wi kan fruwakti fu a nyun schema fu wi gemeente konmakandra?
7 Soleki fa wi si, dan wi o kisi moi leri nanga deki-ati na a konmakandra disi, èn dati o yepi wi fu kon abi wan moro bun matifasi nanga Yehovah. Na so fasi wi o man de moro bun preikiman nanga leriman, di kisi leri fu du a diniwroko moro bun.—Ef. 4:13, 14; 2 Tim. 3:17.
8. Fa a sreka di wi o sreka wisrefi na fesi, o tyari wini kon gi wi èn gi trawan?
8 Te wi o sreka wisrefi bun gi den konmakandra disi, dan dati sa yepi wi fu poti prakseri na den moro prenspari sani fu na alawiki konmakandra. Wi alamala sa abi na okasi fu gi piki èn na so fasi wi o man gi makandra deki-ati (Rom. 1:11, 12; Hebr. 10:24 ). A marki fu wi na fu „gebroiki a wortu fu waarheid na wan reti fasi” so taki wi e „go na fesi”.—1 Tim. 4:15; 2 Tim. 2:15.
9. Sortu fasti bosroiti wi musu abi èn fu san ede?
9 Wi e prisiri nanga a prenspari kenki disi di tyari kon na ini wi gemeente konmakandra. Meki wi alamala tan teki a tiri di „a getrow èn koni srafu” e gi èn meki wi tan krosibei na wi Bigi Skapuman di e sreka wi gi a bigi „banawtu” di de krosibei.—Mat. 24:21, 45; Hebr. 13:20, 21; Openb. 7:14.