Dwengi yu firi

SONTRON senwe e naki wan takiman te a musu hori wan lezing, spesrutu efu a no e hori lezing furu. Senwe kan naki wan preikiman pikinso te a de na ini a preikiwroko èn a e bigin nanga en fosi takimakandra fu a dei. Di Yeremia ben kisi a wroko leki wan profeiti, dan a ben piki taki: „Luku, mi no sabi kwetikweti fa mi musu taki, bika mi na wan boi ete” (Yer. 1:5, 6). Yehovah ben yepi Yeremia èn A sa yepi yu tu. Bakaten, yu kan leri fu taki sondro fu senwe-senwe.

Wan takiman di no e senwe-senwe kan sori dati na a fasi fa a e tyari ensrefi, a no e bruya esi-esi. A e pristeri ensrefi na wan fasi di trawan gwenti fu en, èn a e du dati na wan fasi di fiti gi na okasi dati. Te a e meki sani nanga en anu, dan a e du dati fu di a wani doro wan marki trutru. En sten no e beifi, ma a de krin.

Aladi yu kan firi taki yu no so man tron so wan sma di e taki sondro fu senwe-senwe, toku yu kan meki muiti fu kon moro bun na ini a tori disi. Fa? Meki wi luku fu san ede senwe e naki wan takiman èn fu san ede a no man dwengi ensrefi. A kan, taki disi abi fu du nanga san e pasa na ini en skin.

Te yu musu du wan muilek sani di yu wani du bun, ma yu no de seiker efu yu o du en bun, dan yu kan bigin frede pikinso. Dati e meki taki na edetonton e taigi a skin fu meki moro fu wan spesrutu sortu sani di den e kari adrenaline. Te dati e pasa, dan a kan meki yu ati naki moro esi, yu e bigin bro moro esi tu, yu e bigin broko sweti, yu anu nanga yu kindi kan bigin beifi pikinso, èn sosrefi yu sten kan bigin beifi pikinso. A skin fu yu wani yepi yu nanga dati, fu di a e sorgu taki yu e kisi moro krakti. A sani di yu musu sabi na fa yu kan gebroiki a krakti disi so taki yu kan denki bun èn so taki yu man hori wan fayafaya lezing.

Fa fu sorgu taki yu no e frede so furu moro. Memre taki ala sma e frede pikinso. Ma fu man taki sondro fu senwe-senwe, dan yu musu pruberi no frede tumusi, so taki yu no e bruya èn so taki yu man taki na wan fasi di fiti na a situwâsi dati. Fa yu kan du disi?

Sreka yusrefi heri bun. Teki yu ten fu sreka a lezing fu yu. Sorgu taki yu frustan heri bun san na a tori fu san yu musu taki. Efu a lezing fu yu na wan lezing pe yusrefi kan suku den sani di yu musu taki, dan hori na prakseri san den arkiman sabi kaba fu a tori, èn san yu wani doro nanga a tori disi di yu o taki nanga den. Disi sa yepi yu fu suku sani di sa warti trutru gi den arkiman fu yu. Efu na a bigin yu e feni en wan muilek sani fu du, dan taki fu a problema disi nanga wan takiman di abi furu ondrofeni. A kan yepi yu fu ondrosuku bun, sortu sani yu kan taki èn suma na den arkiman fu yu. Te yu de seiker taki den sani di yu o taki sa tyari wini gi yu arkiman èn te yu sabi heri bun san yu o taki, dan a wani di yu sa wani fruteri den arkiman dati, sa bigi moro leki a frede di yu e frede kande fu hori yu lezing.

Poti spesrutu prakseri na den sani di yu sa taki na a bigin fu yu takimakandra. Sabi fa yu o bigin. Te yu bigin kaba fu hori yu lezing, dan kande senwe no sa naki yu so furu moro.

Den srefi sani yu kan du te yu e sreka yusrefi gi a preikiwroko. No prakseri soso a tori di yu wani taki, ma prakseri sosrefi den sma nanga suma yu o taki. Sreka yusrefi bun tapu san yu o taki na a bigin. Teki leri fu na ondrofeni fu bun preikiman.

Te yu musu hori wan lezing gi wan grupu fu sma, dan kande yu sa firi taki yu no sa abi so furu senwe te yu e skrifi a heri lezing fu yu na tapu papira. Ma fu taki en leti, dan yoisti a sani disi kan meki taki yu o senwe moro te yu musu hori wan lezing. A tru taki wan tu takiman e skrifi furu sani na tapu papira, ma trawan baka no e skrifi so furu. Ma efu yu de seiker taki a boskopu fu yu na wan warti boskopu, dan yu no sa poti so furu prakseri moro na yusrefi. Te yu abi a seikerfasi disi, dan dati sa de wan moro bigi yepi gi yu, leki fu skrifi ala sani na tapu papira.

Sreka yu lezing nanga wan tranga sten. Te yu e pruberi disi, dan dati sa meki yu de seiker taki yu man taki san yu abi na prakseri. Te yu e sreka yu lezing na so wan fasi, dan yu e hori sani na prakseri di yu kan memre wantewante te yu musu hori yu lezing srefi. Te yu e sreka yusrefi, dan du neleki yu de na tapu a podium srefi. Du neleki yu e si den arkiman fu yu. Sidon na wan tafra noso tanapu neleki fa yu o du dati te yu o hori wan lezing trutru.

Begi Yehovah meki a yepi yu. Yehovah sa piki so wan begi? „Disi na san wi sabi seiker fu en, taki awansi san wi e aksi akruderi a wani fu en, a e yere wi” (1 Yoh. 5:14). Efu yu wani gi Gado grani èn efu yu wani yepi sma nyan bun fu en Wortu, dan seiker A sa yepi yu te yu e begi en fu dati. A dyaranti dati kan gi yu furu krakti fu du a wroko di yu kisi fu du. Moro fara, yu kan kweki a froktu fu a yeye, namku lobi, prisiri, vrede, nanga a dwengi di yu e dwengi yusrefi. Te yu e du dati, dan yu sa kisi a denki di yu abi fanowdu fu no senwe-senwe.​—Gal. 5:22, 23.

Kisi ondrofeni. O moro yu de na ini a preikiwroko, o moro yu sa si taki senwe no e naki yu so furu moro. O moro yu e gi komentaar tapu den konmakandra, o moro dati sa yepi yu fu taki na fesi tra sma. O moro lezing yu e hori na ini a gemeente, o moro yu sa si taki yu no e frede so furu moro te yu musu hori wan lezing. Yu ben sa wani abi moro okasi fu hori lezing? Dan taigi a skoro-opziener taki yu wani abi wan prati na a skoro te trawan no man hori a lezing fu den.

Baka di yu du den sani di wi kari tapusei, dan yu sa kisi wini efu yu e ondrosuku san e pasa nanga son sma te senwe e naki den. Te yu e si san e pasa te wan sma e senwe-senwe èn te yu e leri fa yu kan basi den sani dati, dan dati sa yepi yu fu taki sondro taki tra sma e si trutru dati senwe e naki yu. Den sani di e pasa kan abi fu du nanga sani di yu e du nanga yu skin, noso sani di e pasa nanga yu sten.

Sani di yu e du nanga yu skin. Sma kan si na den sani di yu e du nanga yu skin noso den sani di yu e meki nanga yu anu, efu senwe e naki yu. Kon meki wi luku den anu fosi. Te yu e fow yu anu na tapu yu baka, te yu e hori den leki steifi planga na yu sei noso te yu e hori a tafra fu a takiman bun steifi, dan dati e sori taki senwe e naki yu. Sosrefi, te yu e poti yu anu èn e puru en baka na ini yu saka ibri leisi, te yu e lusu noso e fasi den knopo fu yu dyakti, te yu e fasi yu seifesi, yu noso, nanga yu bril sondro taki a de fanowdu, dan sma e si tu taki senwe e naki yu. Te yu e prei kande nanga yu oloisi, yu potlood, yu linga noso nanga den papira pe yu skrifi sani na tapu, èn te yu e bigin meki sani nanga yu anu ma yu no e go doro nanga dati, dan dati e sori tu taki senwe e naki yu.

Te yu e senwe-senwe, dan dati de fu si tu te ibri tron yu e skoifi den futu fu yu, te yu no man tanapu na wán presi nomo, èn te yu e tanapu leki wan steifi planga noso leki wan sma di no e span nanga noti. Ma a de fu si tu te yu e natinati yu mofobuba ibri leisi noso te yu e swari spiti, te yu e bro esi-esi èn te yu e bro hebi.

Efu yu e meki muiti trutru, dan yu kan dwengi yusrefi fu no senwe moro soleki fa wi kari na tapusei. Teki wan fu den sani disi di wi kari na tapusei, dan wroko na en, baka dati go na wan trawan. Kon sabi sortuwan fu den sani disi yu e du te yu e senwe, èn prakseri na fesi san yu kan du fu no meki a pasa moro nanga yu. Efu yu e meki a muiti dati, dan trawan sa si krin taki yu no e senwe-senwe.

Sani di e pasa nanga yu sten. Sma kan yere tu na yu sten taki senwe e naki yu. Disi den o yere te yu sten de tumusi hei, noso te a e beifi. Wan tra sani di kan pasa tu na taki yu e krabu yu gorogoro ibri leisi, noso taki yu e taki tumusi gaw. Yu kan lusu den problema disi èn wini den fruferi gwenti disi, fu di yu e du tranga muiti fu basi yu sten.

Efu yu e firi taki senwe e naki yu, dan wakti wan momenti, hari bro dipi wan tu leisi fosi yu go na tapu a podium. Meki muiti fu relaks yu heri skin. Na presi fu denki taki senwe e naki yu, dan prakseri fu san ede yu wani fruteri den arkiman den sani di yu sreka gi den. Fosi yu bigin taki, dan teki wan momenti fu luku den arkiman fu yu, luku efu yu e si wan fesi di e lafu switi nanga yu èn lafu baka nanga en. Na ini a bigin yu no musu taki esi-esi, èn baka dati poti ala yu prakseri na a lezing fu yu.

San yu kan fruwakti. No fruwakti taki senwe no sa naki yu moro. Furu takiman de di hori omeni bun lezing kaba na tapu a podium èn den du dati someni yari kaba. Toku den e firi taki senwe e naki den pikinso fosi den go na tapu a podium fu taki nanga den arkiman. Ma den takiman disi leri fu basi a senwe di e naki den pikinso.

Efu yu e du seryusu muiti fu puru ala sani di kan meki sma si taki senwe e naki yu pikinso, dan den arkiman fu yu sa si yu leki wan takiman di e dwengi en firi. A kan, taki senwe e naki yu ete pikinso, ma den arkiman fu yu no sa si dati kwetikweti.

Memre a sani di na edetonton e meki te senwe e naki wan sma. Memre taki dati e gi a skin moro krakti. Gebroiki a krakti disi fu taki nanga moro firi.

A no de so taki yu musu go na tapu a podium fosi, bifo yu e bigin pruberi fu du ala den sani disi. Leri fu no senwe-senwe èn fu dwengi yusrefi ibri dei ini a tori disi. Leri tu fu taki nanga den yoisti firi te yu e taki nanga tra sma ibri dei. Efu yu e du dati, dan dati sa yepi yu furu fu de seiker fu yusrefi te yu de na tapu a podium èn te yu de na ini a preikiwroko, èn dati na den presi pe a de moro prenspari fu de seiker fu yusrefi.