Wan bun bosroiti

KANDE yu ondrosuku yu tori finifini, èn yu seti a moro bigi pisi fu yu lezing bun. Kande yu sreka fa yu o bigin nanga yu lezing, so taki a hari a prakseri fu den sma. Ma toku, ete wan sani de fanowdu. Dati na wan bun bosroiti. No denki dati a no de so prenspari. Furu tron na san yu e taki leki lasti, na dati den sma e memre gi wan langa ten ete. Efu a bosroiti swaki, dan srefi den sani di yu ben taki fosi dati, kan lasi furu krakti.

Prakseri a sani disi: Di Yosua ben doro a kaba fu en libi, dan a ben fruteri den owru man fu a pipel fu Israel wan sani di den no ben sa man frigiti so esi. Yosua ben taki fa Yehovah handri nanga Israel sensi a ten fu Abraham. Baka di a fruteri disi, dan san Yosua du? A de so, taki a ben poti krakti nomo tapu san a ben fruteri kaba? Nôno. Na presi fu dati, dan a taki nanga furu firi fu tranga a pipel: „Frede Yehovah èn dini en sondro fowtu èn ini waarheid.” Yusrefi musu leisi Yosua 24:14, 15, èn luku san Yosua ben taki leki lasti sani.

Wan tra prenspari lezing na a wan di na apostel Petrus ben hori gi wan ipi sma di ben de na Yerusalem na a ten fu a Pinksterfesa fu 33 G.T. A tori disi de fu feni na Tori fu den Apostel 2:14-36. Na a fosi presi, Petrus tyari kon na krin taki densrefi si fa a profeititori fu Yoèl kon tru na a momenti di a yeye fu Gado kanti kon tapu den wan di ben drape. Baka dati Petrus sori fa disi abi fu du nanga den profeititori di taki fu a Mesias èn di skrifi na ini den Psalm. Drape ben taki na fesi taki Yesus Krestes ben o opo baka èn taki Gado ben o hei en fu sidon na a reti anu fu en. Baka dati, na ini en bosroiti, Petrus sori krinkrin san na a tori di ibri arkiman ben musu frustan bun. A taki: „Fu dati ede, meki a heri oso fu Israel sabi trutru taki Gado ben meki a Yesus disi, di unu ben spikri na wan postu, tron Masra èn Krestes sosrefi.” Den wan di ben drape, ben aksi: „Un man, brada, san wi musu du?” Petrus taigi den: „Abi berow, èn meki ibriwan fu unu teki dopu na ini a nen fu Yesus Krestes” (Tori. 2:37, 38). A dei dati sowan 3000 fu den arkiman ben bribi den tru tori fu Yesus Krestes, fu di san Petrus taigi den, naki na ati fu den trutru.

Sani fu hori na prakseri. San yu e taki na ini a bosroiti fu yu, musu abi fu du langalanga nanga a nen fu yu lezing. A musu de krin taki a abi langalanga fu du nanga den moro prenspari sani di yu ben fruteri na ini yu lezing. Aladi kande yu wani kari wan tu prenspari wortu fu a nen fu yu lezing na ini yu bosroiti, toku efu yu wani, dan yu kan kari a heri nen baka.

Furu tron, san yu wani du nanga den sani di yu e taki, na fu gi trawan deki-ati so taki den du san yu fruteri den. Wan fu den moro prenspari sani fu a bosroiti, na fu sori den arkiman san den musu du. Di yu ben teki a nen fu yu lezing èn di yu suku den moro prenspari penti, dan kande yu prakseri finifini fu san ede a tori sa de prenspari gi yu arkiman èn san na a marki di yu wani doro nanga a lezing. Yu du dati? Efu na dati yu ben du trutru, dan yu sabi san yu wani den arkiman fu du. Now yu musu tyari kon na krin san yu wani den fu du, èn kande fa den kan du dati.

Boiti taki yu e sori den arkiman san fu du, dan a bosroiti fu yu musu gi den deki-ati. A bosroiti musu sori bun fu san ede den arkiman musu du wan sani, èn kande sosrefi san na den winimarki te den e du so. Efu yu denki bun san na a lasti sani di yu wani taki, èn efu yu prakseri bun fa yu o taki en, dan dati e gi furu krakti na yu heri lezing.

Hori na prakseri taki yu de na a kaba fu yu lezing. Den sani di yu e taki musu sori taki dati de so trutru. Yu no musu taki tumusi slow, ma yu no musu taki tumusi gaw tu. No taki gawgaw teleki yu kaba, èn baka dati no tapu wantronso nanga a taki di yu e taki. Na a tra sei, no meki a de so tu taki yu e bigin taki moro safri. Yu musu taki tranga nofo, ma yu no musu taki tumusi tranga tu. Na den lasti sani di yu e taki, a musu de krin fu yere taki yu de na a kaba fu yu lezing. Te yu e taki den lasti sani disi, dan yu musu taki den na wan seryusu fasi èn nanga overtoigi. Te yu e sreka yusrefi fu hori yu lezing, dan no frigiti fu poti spesrutu prakseri tu na a bosroiti.

O langa a bosroiti musu de? Dati no de wan sani di wi musu luku na tapu wan oloisi wawan. A bosroiti fu yu no musu de wan langabere tori. Yu kan kon sabi o langa a bosroiti fu yu lezing musu de, te yu e luku sortu krakti a abi tapu den arkiman. Furu tron den arkiman sa warderi en te a bosroiti fu yu no de muilek fu frustan, te yu e taki wantewante san yu wani taki, èn te yu e taki bun sani na ini yu bosroiti. Wan pikinso moro langa bosroiti pe yu e fruteri wan syatu agersitori, kan abi bun krakti tu tapu den arkiman efu yu sreka dati bun. Luku a syatu bosroiti fu a heri Bijbel buku Preikiman, soleki fa dati de fu feni na Preikiman 12:13, 14, èn teki dati gersi nanga a bosroiti fu wan moro syatu tori fu a Bergitaki, soleki fa dati skrifi na Mateyus 7:24-27.

Na ini a preikiwroko. Furu tron yu sa si taki, na nowan tra presi leki na ini a preikiwroko, yu sa abi wan bun bosroiti fanowdu. Yu sa abi bun bakapisi te yu e sreka yusrefi bun, èn te yu lobi den sma. Na tapu den bladzijde na fesi, wi gi wan tu rai. Den rai disi yu kan gebroiki bun, srefi efu yu e taki nanga wán sma nomo.

Wan takimakandra kan de kefalek syatu. Kande a sma abi furu wroko fu du. A kan taki yu no man tan moro langa leki wán miniti srefi. Efu a fiti, dan yu kan taki wan sani soleki: „Mi e frustan taki yu abi furu wroko fu du. Ma fosi mi gowe, dan mi wani gi yu wan moi deki-ati fu wan sani di yu kan go sidon denki. Bijbel e sori wi taki wi Mekiman abi wan kefalek moi sani na prakseri. Dati na fu meki a grontapu disi tron wan presi pe sma kan nyan bun fu a libi fu têgo. Wi kan de na ini a Paradijs dati, ma wi musu leri fosi san Gado e aksi fu wi.” Noso kande yu kan aksi nomo efu yu kan kon baka tapu wan ten di moro bun gi na ososma.

Efu yu no man taki moro fara, fu di na ososma tapu a takimakandra wantronso, noso fu di a e taki grofu srefi nanga yu, dan toku yu kan du furu bun ete. Hori a rai na prakseri di de fu feni na Mateyus 10:12, 13 nanga Romesma 12:17, 18. A safu fasi fa yu e piki en, kan kenki a fasi fa a e denki fu Yehovah Kotoigi. Efu yu man du dati, dan dati ben o moi srefisrefi.

Na a tra sei, kande yu taki nanga wan ososma, èn unu ben taki switi nanga makandra. Efu yu wani taki a memre a moro prenspari sani fu san yu taki, dan fu san ede yu no e kari dati ete wan tron gi en? Taki wan sani sosrefi di sa gi en deki-ati fu du san yu taigi en.

Efu yu abi na okasi fu taki moro fara nanga a sma tapu wan tra ten, dan taigi en wan sani so taki a sma wani fu yu kon baka na en. Poti wan aksi gi en, kande wan aksi di skrifi na ini a buku Redeneren aan de hand van de Schrift noso na ini wan tra buku di meki fu hori oso-bijbelstudie. Hori na prakseri san na a marki di yu wani doro, soleki fa Yesus ben sori dati na Mateyus 28:19, 20.

Yu e kon na a kaba fu wan oso-bijbelstudie? Efu yu e kari a nen fu a les baka, dan dati sa yepi a studenti fu memre den sani di yu ben taki nanga en. Efu yu e gebroiki den aksi fu luku baka san a studenti ben leri, dan dati sa meki a studenti memre den moro prenspari sani, spesrutu efu yu e teki nofo ten fu luku ala den aksi disi. Kande yu kan aksi a studenti fa a kan kisi winimarki fu a tori di yu studeri nanga en, noso fa a kan prati a tori dati nanga tra sma. Disi kan yepi a studenti fu go denki fa fu gebroiki den sani di a leri.​—Odo 4:7.

Memre taki a bosroiti fu yu abi krakti tapu a heri lezing fu yu.