Den engel fu Gado e yepi sma

SON sma e taki dati den e bribi soso san den kan si nanga den eigi ai. Ma dati don. Furu sani de di noiti wi no si nanga wi eigi ai, ma den de trutru. Yu kan kari wán fu den sani dati?—

Fa a de nanga a winti di wi e bro? Wi kan firi en?— Opo yu anu, èn bro na en tapu. Yu firi wan sani?— Iya, yu firi wan sani, ma yu no kan si a winti, a no so?—

Wi taki kaba fu yeye. Wi no man si den nanga wi ai. Wi leri taki sonwan fu den bun, ma trawan fu den takru. Kari wan tu bun yeye di yu no man si.— Iya, yu abi Yehovah Gado, yu abi Yesus, èn yu abi bun engel. Takru engel de tu?— Bijbel e taki dati den de. Fruteri mi san yu kon sabi fu den.—

Wán sani di wi sabi, na taki bun engel nanga takru engel tranga moro wi. A Bigi Leriman ben sabi furu fu engel. Dati ben kon fu di a ben de wan engel bifo a gebore leki wan beibi na grontapu. A ben libi nanga tra engel na ini hemel. A ben sabi milyunmilyun fu den. Ala den engel disi abi wan nen?—

We, wi leri taki Gado gi den stari nen. Fu dati ede wi kan de seiker taki ala den engel abi wan nen tu. Èn wi sabi taki den kan taki nanga makandra fu di Bijbel e taki fu a ’tongo fu den engel’ (1 Korentesma 13:1). Fu san yu denki den engel e taki? Den e taki fu wi di de dyaso na grontapu?—

Wi sabi taki den engel fu Satan, den ogri yeye, e pruberi fu meki wi trangayesi Yehovah. Sobun den musu taki fu a fasi fa den kan du disi. Den wani taki wi musu de leki den, so taki Yehovah no o lobi wi tu. Ma fa a de nanga den getrow engel fu Gado? Yu denki taki den e taki fu wi tu?— Iya, den e du dati. Den wani yepi wi. Meki mi fruteri yu fa wan tu fu den engel fu Gado ben yepi sma di ben lobi Yehovah èn di ben e dini en.

Fu gi wan eksempre, yu ben abi wan man di ben nen Danièl, èn a man disi ben libi na ini Babilon. Furu sma drape no ben lobi Yehovah. Sma ben meki wan wet srefi di ben taki dati iniwan sma di ben begi Yehovah Gado, ben o kisi strafu. Ma Danièl no ben tapu fu begi Yehovah. Yu sabi san den du nanga Danièl?—

Iya, takru sma ben meki trawan fringi Danièl go na ini wan olo pe lew ben de na ini. Drape Danièl ben de en wawan nanga wan tu lew di ben abi angri srefisrefi. Yu sabi san pasa baka dati?— Danièl ben taki: „Gado ben seni en engel kon èn a ben tapu a mofo fu den lew.” Notinoti no ben pasa nanga Danièl! Engel kan du wondru sani gi den sma di e dini Yehovah.​—Danièl 6:18-22.

Dan yu abi sosrefi a ten di Petrus ben de na strafu-oso. Yu sa memre taki Petrus ben de wan mati fu a Bigi Leriman, Yesus Krestes. Son sma no ben lobi en di Petrus taigi den taki Yesus ben de a Manpikin fu Gado. Sobun den poti Petrus na strafu-oso. Srudati ben e hori wakti na Petrus fu luku taki a no lowe gowe. Suma ben kan yepi en?—

Petrus ben e sribi na mindri tu waktiman, èn den anu fu en ben tai nanga keti. Ma Bijbel e taki: ’Luku! Na engel fu Yehovah kon, èn wan leti bigin skèin na ini a strafu-oso kamra. Na engel fasi Petrus na en sei fu wiki en, èn a taki: „Opo esi-esi!” ’

A momenti di a taki dati, den keti fadon komoto fu Petrus en anu! Èn na engel taigi en: ’Weri yu krosi, weri yu susu, èn kon nanga mi.’ Den waktiman no ben man du noti, fu di na engel ben e yepi Petrus. Now den doro na wan isri portu, èn wan fruwondru sani pasa. A portu opo fu ensrefi! Na engel dati ben fri Petrus so taki a ben kan go doro nanga a preikiwroko.​—Tori fu den Apostel 12:3-11.

Den engel fu Gado kan yepi wi tu?— Iya, den kan du dati. Disi wani taki dati den sa sorgu ala ten taki notinoti no e pasa nanga wi?— Nôno, te wi e du don sani, dan engel no e sorgu taki ogri no miti wi. Ma srefi te wi no e du don sani, toku takru sani kan pasa nanga wi. Gado no taigi den engel fu sorgu taki takru sani no pasa nanga wi. Na presi fu dati, Gado gi den engel wan spesrutu wroko fu du.

Bijbel e taki fu wan engel di e taigi sma na ala presi fu anbegi Gado (Openbaring 14:6, 7). Fa na engel e taigi den dati? A e bari komoto fu hemel so taki ibri sma kan yere en?— Nôno, na presi fu dati, den bakaman fu Yesus na grontapu e fruteri tra sma fu Gado, èn den engel e tiri den na ini a wroko fu den. Den engel e sorgu taki den sma di wani kon sabi Gado trutru, e kisi na okasi fu yere a boskopu disi. Wi kan teki prati na a preikiwroko dati, èn den engel sa yepi wi.

Ma fa a de efu sma di no lobi Gado e meki en muilek gi wi? Kon meki wi taki dati sma e poti wi na strafu-oso. Den engel ben o fri wi?— Den ben o man du dati. Ma den no e du dati ala ten.

Wan leisi, Paulus, a bakaman fu Yesus, ben de wan strafuman. A ben de na ini wan boto na a ten di wan kefalek bigi winti ben e wai. Ma den engel no fri en wantewante. Dati ben kon fu di tra sma ben musu yere a boskopu fu Gado tu. Wan engel ben taki: „Paulus, no frede. Yu musu tanapu na fesi Caesar.” Iya, sma ben musu tyari Paulus go na Caesar, a tiriman fu den kondre fu grontapu, so taki Paulus ben kan preiki gi en. Den engel ben sabi ala ten pe Paulus ben de, èn den yepi en. Den sa yepi wi tu te wi e dini Gado trutru.​—Tori fu den Apostel 27:23-25.

Den engel sa du ete wan prenspari wroko, èn den o du dati heri esi. A ten e doro esi-esi taki Gado sa pori ogrisma. Den sma di e taki dati den no e bribi na ini engel fu di den no man si den, sa kon si taki den no abi leti kwetikweti.​—2 Tesalonikasma 1:6-8.

San dati o wani taki gi wi?— Te wi de na a sei fu den engel fu Gado, dan den sa yepi wi. Ma wi de na a sei fu den trutru?— Wi de na a sei fu den te wi e dini Yehovah. Èn te wi e dini Yehovah, dan wi sa taigi tra ma fu dini en tu.