A fasi fa engel abi krakti na wi tapu

DI A profeiti Danièl ben e taki fu den engel fu Gado di a ben si na ini wan fisyun, dan a skrifi: „Dusun tron dusun [engel] ben de di ben e tan dini [Gado], èn tin dusun tron tin dusun ben e tan tanapu leti na en fesi” (Danièl 7:10). A tekst disi e tyari kon na krin fu san ede Gado meki den engel. Den musu dini en èn den musu de srekasreka fu du san a e taigi den.

Gado e gebroiki den engel fu du son sani di sa abi krakti tapu a libi fu libisma. Wi sa go luku fa a e gebroiki den engel fu tranga èn fu kibri a pipel fu en, fu tyari boskopu gi libisma, èn fu gi ogrisma a strafu di komoto fu en.

Engel e tranga èn e kibri sma

Den yeye mekisani ben si fa grontapu nanga den fosi libisma meki, èn sensi a ten dati den poti bun furu prakseri na a libisma famiri. Bifo Yesus Krestes ben tron wan libisma, dan leki a sma di e prenki koni, a ben taki: „Den sani di mi ben lobi trutru, ben de na den manpikin fu libisma” (Odo 8:31). Bijbel e taigi wi tu taki „den engel e angri fu kon sabi” den sani di abi fu du nanga Krestes èn nanga a ten di e kon, soleki fa Gado ben tyari kon na krin gi den profeiti fu en.—1 Petrus 1:11, 12.

Baka wan pisi ten, den engel kon si taki bun furu sma no ben e dini a lobi-ati Mekiman fu den. A ben musu fu de so taki a sani disi meki den getrow engel firi sari srefisrefi! Ma na a tra sei, te wan sondari abi berow èn a e drai go baka na Yehovah, dan ’den engel e prisiri’ (Lukas 15:10). Engel e broko den ede trutru nanga a tanbun fu den wan di e dini Gado, èn ibri leisi baka Yehovah gebroiki den fu tranga èn fu kibri den getrow futuboi fu en na grontapu (Hebrewsma 1:14). Luku wan tu eksempre.

Tu engel ben tyari a regtfardiki man Lot nanga den umapikin fu en komoto na ini a kontren fu den foto Sodom nanga Gomora, so taki den no lasi den libi di den ogri foto disi kisi pori (Genesis 19:1, 15-26).a Hondrohondro yari baka dati, sma trowe a profeiti Danièl na ini wan lew-olo, ma toku noti no pasa nanga en. Fa dati du kon? „Mi eigi Gado ben seni en engel kon èn a ben tapu a mofo fu den lew”, na so a taki (Danièl 6:22). Engel ben yepi Yesus di a bigin nanga en diniwroko na grontapu (Markus 1:13). Syatu bifo Yesus dede, dan wan engel kon na en èn „a gi en krakti” (Lukas 22:43). A ben musu fu de so taki Yesus ben kisi deki-ati fu a yepi di na engel ben gi na den muilek momenti dati na ini en libi! Wan engel ben fri na apostel Petrus tu fu strafu-oso.—Tori fu den Apostel 12:6-11.

Den engel e kibri wi na ini a ten disi? Te wi e anbegi Yehovah akruderi a Wortu fu en, dan wi abi a dyaranti taki den tranga engel fu en di wi no man si, e kibri wi. Bijbel e gi wi a pramisi disi: „Na engel fu Yehovah e seti ensrefi lontu den wan di e frede En, èn a e frulusu den.”—Psalm 34:7.

Ma wi musu frustan taki a moro prenspari frantwortu di engel abi, a no fu du sani gi libisma, ma fu dini Gado (Psalm 103:20, 21). Den no e du san libisma e aksi, ma den e du san Gado e taigi den. Sobun, a no den engel wi musu aksi yepi, ma na Yehovah Gado (Mateyus 26:53). Fu di wi no man si den engel, meki a no de fu taki dati wi no man kon sabi san Gado e meki den du fu yepi libisma na ini difrenti afersi. Ma wi sabi taki Yehovah e „gebroiki a krakti fu en fu a bun fu den sma di lobi en nanga den heri ati” (2 Kroniki 16:9; Psalm 91:11). Wi abi a dyaranti tu taki ’awansi san wi e aksi akruderi a wani fu en, Gado e yere wi’.—1 Yohanes 5:14.

Den Buku fu Bijbel e taigi wi sosrefi taki wi musu begi èn dini Gado wawan (Exodus 20:3-5; Psalm 5:1, 2; Mateyus 6:9). Den getrow engel e gi wi deki-ati fu du dati. Fu eksempre, di na apostel Yohanes ben wani anbegi wan engel, dan na engel dati warskow en taki: „Luku bun! No du dati! . . . Anbegi Gado.”—Openbaring 19:10.

Engel e tyari boskopu fu Gado

A wortu „engel” wani taki „boskopuman”, èn dati na wan tra fasi fa den engel e dini Gado, namku den e tyari boskopu fu Gado gi libisma. Fu eksempre, „Gado seni na engel Gabrièl go na wan foto na ini Galilea di ben nen Nasaret”. Fu san ede? Fu taigi wan yongu nyunwenke di nen Maria taki a ben o kon de nanga bere èn taki a ben o meki wan manpikin di a musu kari Yesus (Lukas 1:26-31). Gado ben seni wan engel go tu na den skapuman na ini den wei fu taigi den taki „Krestes, a Masra” gebore (Lukas 2:8-11). Na so den engel ben tyari boskopu fu Gado go tu gi Abraham, Moses, Yesus, nanga tra sma di Bijbel e taki fu den.—Genesis 18:1-5, 10; Exodus 3:1, 2; Lukas 22:39-43.

Fa engel e dini leki boskopuman fu Gado na ini a ten disi? Luku san Yesus ben taki na fesi fu a wroko di den bakaman fu en ben o du bifo a sistema disi kon na wan kaba. A ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:3, 14). Ibri yari, Yehovah Kotoigi e gebroiki moro leki wán milyard yuru fu preiki a bun nyunsu fu Gado Kownukondre. Ma yu ben sabi taki engel abi wan prati tu na a wroko disi? Na apostel Yohanes ben taki fu wan fisyun di a ben kisi: „Mi si wan tra engel . . . ; a ben abi têgo bun nyunsu di a ben musu meki bekènti leki prisiri nyunsu na den sma di e libi na grontapu, èn gi ala kondre, lo, tongo, nanga pipel” (Openbaring 14:6, 7). A tekst disi e tyari kon na krin san na a moro prenspari wroko di engel e du gi a bun fu libisma na ini a ten disi.

Te Yehovah Kotoigi e preiki oso fu oso, dan den e ondrofeni taki engel e tiri a wroko disi. Furu tron den e miti sma di ben begi Gado fu seni wan sma kon fu yepi den frustan a wani fu En, èn syatu baka dati, kotoigi ben de na den doro. Fu di den engel e tiri a wroko èn fu di den Kotoigi srefi e teki prati na wroko disi, meki ibri yari hondro dusundusun sma e kon sabi Yehovah. Meki a de so taki yu e kisi wini fu a wroko disi di den engel e tiri, èn di e kibri sma libi.

Engel e gi sma a strafu di e komoto fu Gado

Aladi den engel no abi a makti fu krutu libisma, toku a no de so taki den e luku nomo san e pasa (Yohanes 5:22; Hebrewsma 12:22, 23). Na ini a ten di pasa, den ben e gi sma a strafu di komoto fu Gado. Fu eksempre, Gado gebroiki engel na ini a feti di a ben e feti teige den Egeptesma fu owruten, di ben e hori den Israelsma na ini katibo (Psalm 78:49). Èn a ben de na ini wán neti nomo taki „na engel fu Yehovah” kiri wan hondro aititenti na feifi dusun srudati na ini a kampu fu wan feanti fu Gado en pipel.—2 Kownu 19:35.

Na ini a ten di e kon, engel sa gi sma a strafu tu di e komoto fu Gado. Yesus sa kon „nanga den tranga engel fu en na ini wan bigi faya; na a ten dati, a o puru atibron na tapu den sma di no sabi Gado èn na tapu den sma di no e gi yesi na a bun nyunsu” (2 Tesalonikasma 1:7, 8). Ma a pori dati sa kon soso tapu den sma di no e gi yesi na a boskopu di e preiki now na heri grontapu nanga yepi fu den engel. Nowan ogri sa miti den wan di e suku Gado èn di e libi akruderi Bijbel leri.—Sefanya 2:3.

Wi de nanga tangi trutru taki ala ten den getrow engel e du san Gado e taigi den! Yehovah e gebroiki den fu yepi èn fu kibri den loyaal futuboi fu en na grontapu. Disi e trowstu wi trutru fu di ogri yeye de di wani du wi ogri.

Suma na den ogri yeye?

Na a ten fu den 1500 yari baka di Satan kori Eva na ini Eden, den engel fu Gado si taki Satan Didibri ben man meki taki ala libisma drai baka gi Gado. Ma a no ben man du dati nanga wan tu getrow sma soleki Abel, Heinok, nanga Noa (Genesis 3:1-7; Hebrewsma 11:4, 5, 7). Sonwan fu den engel ben bigin waka tu baka Satan. Bijbel e taki dati den na den yeye di ben trangayesi Gado „na ini a ten fu Noa” (1 Petrus 3:19, 20). Fa den trangayesi Gado?

Na ini a ten fu Noa, engel ben de di opo densrefi teige Gado fu di den gowe libi a presi di den ben abi na mindri a grupu fu den engel fu Gado, èn den kon na grontapu pe den teki libisma skin. Fu san ede den ben du dati? Den ben kon kisi a tranga firi fu abi seks demakandra nanga umasma. Disi meki taki den meki pikin di Bijbel e kari Nefilim, èn bakaten den pikin disi ben tron bigiskin man di ben e du ogri. Boiti dati, ’na ogridu fu libisma ben kon furu na grontapu èn ala prakseri di ben de na ini libisma ati, ben takru ala ten’. Ma Yehovah Gado no ben gi pasi taki libisma tan go doro nanga na ogri di den ben e du. A tyari wan Frudu kon na heri grontapu, èn a sani dati kiri ala ogri libisma èn sosrefi den Nefilim. Den wan-enkri libisma di tan na libi ben de den getrow futuboi fu Gado.—Genesis 6:1-7, 17; 7:23.

Den engel di ben opo densrefi teige Gado no kisi pori na a ten fu a Frudu. Den ben gowe libi a libisma skin di den ben abi, èn den drai go baka na hemel. Baka dati den tron ogri yeye. Den teki a sei fu Satan Didibri, di Bijbel e kari „a tiriman fu den ogri yeye” (Mateyus 12:24-27). Neleki a tiriman fu den, na so den ogri yeye wani nomonomo taki libisma anbegi den.

Ogri yeye kan du sma ogri, ma wi no abi fu frede den. Den no abi a makti fu du ala san den wani. Di den trangayesi engel drai go baka na hemel, dan den no ben mag de memre moro fu a grupu fu Gado en getrow engel. Na presi fu dati, den no ben abi a yeye fu Gado moro, èn den no abi nowan howpu gi a ten di e kon. Iya, a strafu di den kisi, na taki den de na ini Tartarus, noso na ini dungru na yeye fasi (2 Petrus 2:4). Yehovah tai den nanga „banti fu têgo”, so taki den de na ini dungru na yeye fasi. Boiti dati, now den no man teki libisma skin moro.—Yudas 6.

San yu musu du?

A de so taki ogri yeye abi krakti ete tapu libisma? Iya, den e du dati nanga yepi fu „ triki”, soleki den wan di a tiriman fu den, Satan Didibri, e gebroiki (Efeisesma 6:11, 12). Ma te wi e teki a rai di skrifi na ini Gado Wortu, dan wi man tanapu kánkan teige den ogri yeye. Boiti dati, den wan di lobi Gado, sa kisi kibri fu den tranga engel.

Fu dati ede a de tumusi prenspari taki yu e kon leri sabi den markitiki fu Gado di skrifi na ini den Buku fu Bijbel, èn taki yu e du tu san yu e leri! Yu kan kon sabi moro fu den sani di Bijbel e leri, te yu meki kontakti nanga Yehovah Kotoigi na ini a kontren fu yu, noso te yu e skrifi go na den sma di tyari a tijdschrift disi kon na doro. Yehovah Kotoigi sa prisiri fu studeri Bijbel nanga yu, sondro taki yu abi fu pai gi dati, èn den sa du dati na wan ten di yu feni bun.

[Futuwortu]

[Faki na tapu bladzijde 6]

A FASI FA DEN ENGEL ORGA

Yehovah orga den engel fu en na a fasi disi:

Na engel di abi a moro bigi krakti èn makti, na Mikael a gran engel, noso Yesus Krestes (1 Tesalonikasma 4:16; Yudas 9). Den seraf, syerub, nanga tra engel abi wan moro lagi posisi leki en.

Den seraf abi wan bun hei posisi na ini a seti fu Gado. Den e dini leki futuboi na a kownusturu fu Gado. A wroko di den musu du, na fu meki a santafasi fu Gado bekènti èn fu hori a pipel fu en krin na yeye fasi.—Yesaya 6:1-3, 6, 7.

Den syerub e dini tu na a kownusturu fu Gado èn den e sorgu taki Yehovah e tan kisi glori.—Psalm 80:1; 99:1; Esekièl 10:1, 2.

Den tra engel e du wroko na ini a nen fu Yehovah, èn den e du san a e taigi den.

[Prenki na tapu bladzijde 4]

Engel ben tyari Lot nanga den umapikin fu en gowe fu kisi kibri

[Prenki na tapu bladzijde 5]

Di na apostel Yohanes ben pruberi fu anbegi na engel, dan na engel taigi en: „No du dati!”

[Prenki na tapu bladzijde 6]

Engel e gi sma a strafu di komoto fu Gado

[Prenki na tapu bladzijde 7]

Yu e kisi wini fu a preikiwroko di den engel e tiri?