PISI 1
A Mekiman e gi libisma wan paradijs
Gado e meki den stari nanga planeiti na hemel, èn a e meki libisani na grontapu. A e meki wan man nanga wan uma di no abi sondu, èn a e poti den na ini wan moi dyari. A e gi den komando tu èn den musu gi yesi na dati
FURU sma sabi den biginwortu disi: „Na a bigin Gado meki hemel nanga grontapu” (Genesis 1:1). Nanga den tumusi moi wortu disi, Bijbel e meki wi kon sabi a moro prenspari Sma na ini den Santa Buku fu Bijbel. A Sma dati na a almakti Gado, Yehovah. Den fosi vers fu Bijbel e sori taki Gado na a Mekiman fu den milyunmilyun stari nanga planeiti, sosrefi a planeiti disi di wi e libi na tapu. Den vers baka dati, e tyari kon na krin taki a teki difrenti langa pisi ten, di Bijbel e agersi nanga dei, fu Gado sreka grontapu so taki wi ben kan libi na tapu. Na so ala den tumusi moi sani di wi e si na grontapu, kon de.
A moro aparti sani di Gado meki na grontapu ben de libisma. Gado ben meki libisma leki wan prenki fu ensrefi, iya, den man sori den srefi fasi fu Yehovah, soleki lobi nanga koni. Gado meki libisma fu a doti fu grontapu. Gado kari a fosi man Adam, èn a poti en na ini a paradijs, noso a dyari fu Eden. Na Gado srefi ben meki a dyari, èn a ben furu en nanga moi bon di ben e gi furu froktu.
Gado ben si taki a man ben abi wan patna fanowdu. Gado gebroiki wan fu den lebriki fu Adam fu meki wan uma èn a tyari en gi a man. Na uma disi ben tron a wefi fu a man, èn bakaten a kisi a nen Eva. Adam ben breiti trutru, èn a taki a puwema disi: „Ai, disi na trutru bonyo fu mi bonyo èn skin fu mi skin.” Gado ben taki: „Na fu dati ede wan man o gowe libi en papa nanga en mama. A musu tai hori na en wefi èn den musu tron wán skin.”—Genesis 2:22-24; 3:20.
Gado ben gi Adam nanga Eva tu komando. A fosi komando na taki den ben musu wroko a gron, den ben musu sorgu grontapu, a tanpe fu den, èn te fu kaba den ben musu furu grontapu nanga den bakapikin fu den. A di fu tu komando, na taki fu ala den someni bon di ben de na ini a dyari, den no ben musu nyan a froktu fu wán fu den bon. A bon dati ben nen: „Sabi san bun èn san ogri” (Genesis 2:17). Efu den ben trangayesi Gado, den ben o dede. Nanga yepi fu den komando dati, Gado ben gi a man nanga na uma na okasi fu sori taki den teki en leki a Tiriman fu den. Efu den ben gi yesi na en, dan dati ben o sori tu taki den lobi en, èn taki den ben de nanga tangi gi san a du gi den. Den ben abi furu reide fu saka densrefi na ondro a bun tiri fu en. Noti no ben misi na den libisma dati. Bijbel e taigi wi: „Gado luku ala den sani di a meki èn a si taki den ben de heri bun.”—Genesis 1:31.
—Den tori disi teki puru fu Genesis kapitel 1 nanga 2.