A de na prakseri fu Gado taki libisma nyanbun fu a libi na wan Paradeysi
„Yehovah Gado now ben teki libisma èn poti en na ini na dyari fu Eden fu wroko en èn fu sorgu en.” — GENESIS 2:15.
1. San ben de a prakseri fu na Mekiman bigin bigin ini a tori fu sma di e gi yesi?
A BEN de na prakseri fu na Mekiman di a ben abi bigin bigin, èn a de te now ete en prakseri taki sma di e gi yesi sa abi wan libi pe sma no sa kon grani, wan libi di ala ten sa furu psa marki nanga yongu krakti, fri fu ala sosofasi, e abi ala ten wan warti marki fu meki kon tru, wan libi pe den e gi èn kisi tru lobi sondro gridifasi, ini volmaaktifasi — na ini wan paradeysi! — Genesis 2:8; teki gersi nanga Lukas 23:42, 43.
2. (a) San ben musu psa di na fosi libisma ben kon sabi sani? (b) Oten Gado ben meki na fosi libisma, pe èn na ini sortu ten fu na yari?
2 Fu si dati, dan wi abi fu tyari soso nomo na Adam kon a wi fesi di Gado ben meki nyunyun di fu a fosi tron a ben bigin kon sabi sani, di a ben luku en eygi skin èn ben meki ala sani di a ben si èn yere èn firi lontu en wroko tapu en, di nanga wan schok a ben frustan taki a ben de a libi! Disi ben de so wan 6000 yari psa kba, na ini a yari 4026 bifo wi G.T., akruderi na teri fu ten fu na Santa Buku. A ben de na ini wan kontren di ini na ten disi sma sabi leki Turku ofu na ini na zuidwest pisi fu san sma e kari now Asiya, na wan presi ini na birti fu den liba Eufrat nanga Tigris, èn so bun tapu na noordsey lontu fu wi grontapubol. Na ten ben sa de so wan 1 oktober, fu di den moro owru kalender fu libisma ben bigin teri na ten lontu na datum dati.
3. (a) Na ini sortu toestand na fosi libisma ben kon a libi? (b) San ben tron a nen fu na fosi libisma, èn san na nen dati ben wani taki?
3 Di na fosi libisma ben kon a libi, a ben de wan bigisma kba, ben meki bun dorodoro, ben gosontu dorodoro, èn a ben abi wan frustan fu moraliteit di ben bun dorodoro. Na nen di ala ten baka na beybri tori e gi en, e memre wi na a sani di den ben teki meki en. En nen ben de ʹA·dhamʹa Na grontapu, ofu doti di den ben teki meki en, den ben kari ʹa·dham·mahʹ. En nen so bun nanga reti ben sa kan wani taki „grontapu sma”. Disi ben tron na eygi nen fu na fosi libisma — Adam. Fa a ben de wan sensatie gi Adam di a ben kon a libi, di a ben tron wan sma nanga frustan fu sabi sani!
4. Tapu sortu freymde fasi na fosi libisma no ben wiki kon na libi èn fu san a no ben de wan manpikin so bun?
4 Di na fosi libisma disi, Adam, ben kon na libi, ben wiki kon kisi frustan fu sabi sani, èn ben opo en ay, a no ben ddon na wan borsu furu nanga wwiri, na ini den krakti langa anu fu wan ofu tra uma kesikesi di a ben brasa hori tranga èn di a ben luku na ini en ay èn di nanga safu firi a ten kari Mma. Na fosi libisma, Adam, no ben kon sabi a libi tapu so wan freymde fasi, A no ben firi en srefi na skinfasi famiri na wan kesikesi, no baka ten tu di fu a fosi tron a ben si wan. Na a dey di Gado ben meki en noti ben de fu prakseri taki a ben de wan bakapikin, wan fara manpikin fu wan kesikesi ofu so wan sortu mekisani. Ma na fosi libisma, Adam, ben musu tan ini don ini na tori fu na fasi fa a ben du kon? Nôno?
5. San Adam ben sabi seyker seyker fu en dyari di ben de leki wan park èn fu en srefi?
5 Wi kan frustan heri bun taki a ben aksi en srefi fa ala den moy sani di en ay ben si ben du kon. A ben de na ini wan dyari di ben de leki wan park, wan paradeysi di no en srefi ben go denki, ben meki èn ben sreka. Fa ala disi ben du kon? Leki wan volmaakti libisma di abi frustan nanga koni a ben sa wani sabi disi. A no ben abi no wan ondrofeni a fesi. A ben sabi taki a no ben meki en srefi, no ben meki en srefi gro kon de san a de. A no ben wroko en srefi nanga eygi muyti go doro na presi pe a de. — Teki gersi nanga Psalm 100:3; 139:14.
6. Fa kande seyker Adam ben du taki a ben de a libi èn ben de na ini wan volmaakti grontapu tanpe?
6 Taki na fosi libisma, Adam, ben kisi na nyun ondrofeni disi fu abi na prisiri fu libi na ini wan volmaakti grontapu oso, kande ben meki a prisiri bigin bigin fu go denki pe a ben komoto èn fu san-ede a ben de. Kande wante wante so a ben bari prisiri bbari. A ben si taki wortu ben komoto fu en mofo. A ben yere en srefi e taki ini a tongo fu libisma, e taki sani fu den moy sani di a ben e si èn ben e yere. O bun a ben de fu libi dya na ini na paradeysidyari disi! Ma ala di nanga prisiri nanga yepi fu ala sani san a ben e si, ben e yere, ben e smeri, èn ben e firi, ben e teki bodoy na ini en, dan dati ben musu poti en so srefi tu fu go denki. Efu wi ben de na ini en presi dan na heri afersi ben sa de wan ray tori, wan ray tori di wi srefi no ben sa kan lusu.
Na de fu libisma a no wan ray tori
7. Fu san-ede a no ben de gi Adam bun langa wan sani di no ben de fu frustan taki a ben e libi èn ben de na ini wan paradeysi dyari?
7 Taki a ben de drape libi libi èn en wawan, sondro taki wan tra sma so leki en srefi ben de fu si na ini na paradeysidyari no ben wan afersi di ben teki langa fu na fosi libisma, Adam, no ben man fu frustan srefi srefi. A ben yere wan sten, wan sma ben e taki. Libisma ben frustan a sten. Ma pe na takiman ben de? Libisma no ben si no wan sma, Na sten ben kon fu wan yeye kondre di no de fu si, èn ben taki nanga en. A ben de na sten fu na Mekiman fu libisma, en Mekiman! En libisma ben kan piki en na ini a srefi sortu tongo. A ben frustan taki a ben taki nanga Gado, na Mekiman. Libisma no ben abi no wan nyunten sabidensi radiyo-ontvanger fanowdu fu yere na sten fu Gado. Gado ben abi takimakandra langa langa nanga en leki a sani di a ben meki.
8, 9. (a) Tapu sortu aksi Adam ben kan kisi piki èn sortu sorgu nanga belangstelling fu wan Tta ben sori gi en? (b) Sortu piki Adam ben kisi fu en heymel Tta?
8 Now libisma ben sabi taki a no ben de en wwan èn dati ben musu du en bun. En frustan ben furu nanga aksi. A ben kan aksi na Wan di no ben de fu si èn di ben taki nanga en. Suma ben meki en nanga a dyari disi fu prisiri? Fu san-ede den ben poti en dya, èn san a ben musu du nanga en libi? A libi ben abi wan marki? Na a fosi libisma disi, Adam, ben kisi sorgu nanga belangstelling fu wan ppa, bika a ben piki den aksi fu en tapu wan fasi di ben gi en frustan, di ben e ondrosuku sani, satisfaksi. Fa a ben musu de wan prisiri gi en Mekiman, a Sma di ben gi en libi, en heymel Tta, fu yere fa libisma ben bigin fu taki èn ben taki en fosi wortu! Fa a ben musu gi en heymel Tta koloku fu yere en manpikin e taki nanga en! Na aksi di leki a fosi wan ben kon fu en srefi ben de: „Fa mi du kon a libi?” Na heymel Tta nanga ala prisiri ben gi piki tapu dati, èn nanga disi ben erken na fosi libisma leki en manpikin. A ben de wan „manpikin fu Gado”. (Lukas 3:38). Yehovah ben meki sma kon sabi en leki na Tta fu na fosi libisma, Adam. Na piki di Adam heymel Tta ben gi en tapu en aksi èn di a ben gi abra na en bakapikin, ben kon tapu disi:
9 „En Yehovah ben go abra fu meki libisma fu a doti fu grontapu èn fu bro na libibro na ini en noso-olo, èn libisma ben tron wan libi sili. Moro fara Yehovah Gado ben prani wan dyari na ini Eden, na a owstusey, èn drape a ben poti a libisma di a ben meki. Na so Yehovah Gado ben meki ala sortu bon sproyti komoto fu grontapu, moy gi na ay èn bun leki nnyan, èn so srefi tu na bon fu libi na ini na mindri fu na dyari èn na bon fu sabi bun nanga ogri. Now wan liba ben de di ben lon komoto fu Eden fu gi na dyari watra, èn fu drape a ben prati en srefi èn te yu luku en bun ben tron fo bigi liba. — Genesis 2:7-10.b
10, 11. (a) Sortu sani Adam ben kon sabi krin, ma fu sortu tra aksi a ben musu kisi so srefi tu wan piki? (b) Sortu piki a heymel Tta ben gi Adam?
10 Na krin nanga fris frustan fu Adam ben dringi srefi srefi den bodoy disi di ben gi en satisfaksi. Now a ben sabi taki a no ben komoto fu na kondre di no de fu si fu pe en Mekiman nanga Setiman fu sani ben e taki komoto. Na presi fu dati den ben meki en komoto fu na grontapu pe a ben e libi a tapu èn a ben de so bun fu grontapu. A Sma di ben gi en libi èn en Tta ben de Yehovah Gado. A ben de „wan libi sili”. Fu di a ben kisi en libi fu Yehovah Gado, meki a ben de wan „manpikin fu Gado”. Den bon lontu en na ini a dyari fu Eden ben meki froktu di ben de bun fu nyan, èn a ben kan nyan fu den èn tan na libi leki wan libi sili. En toku, fu san-ede a ben musu tan na libi, èn fu san-ede den ben poti en na grontapu, na ini na dyari disi fu Eden? A ben de wan bigisma di tyari ede nanga okasi di a ben abi na skinfasi èn a ben abi na reti fu sabi dati. Noso fa a ben kan doro en marki na ini a libi en na so fasi prisiri en Mekiman nanga Tta fu di a e du na wani fu Gado? Den piki tapu den aksi disi ben gi na ini den tori di e kon now:
11 Yehovah Gado now ben teki na libisma èn poti en na ini na dyari fu Eden fu wroko dati èn fu sorgu gi en. Èn Yehovah Gado so srefi tu ben poti na komando di e kon now gi na libisma: ’Fu ibri bon fu na dyari yu mag nyan te yu bere furu. Ma fu na sey fu na bon fu sabi bun nanga ogri, yu no musu nyan fu dati, bika na a dey di yu sa nyan fu dati, seyker yu sa dede’” — Genesis 2:15-17.
12. Fu sortu sani Adam ben musu gi en Mekiman tangi, èn fa libisma ben kan gi Gado na so wan fasi grani?
12 Adam ben sa musu de en Mekiman grantangi taki a ben kisi wan sani fu du di na wan bun fasi ben hori en bezig na ini a moy dyari disi fu Eden. Now a ben sabi na wani fu en Mekiman, èn a ben kan du na grontapu wan sani gi En. Now wan frantiwortu ben de tapu en, namku fu wroko na dyari fu Eden èn sorgu fu en, ma dati ben sa de wan prisiri sani. Te a ben o du dati a ben kan sorgu taki na dyari fu Eden ben sa tan de so, taki disi ben de wan grani èn prèyse gi na Mekiman fu en, Yehovah Gado. Te Adam ben kisi angri fu a wroko di a ben wroko, dan a ben kan nyan te en bere furu fu den bon fu na dyari. Na a fasi disi a ben kan meki en krakti kon nyun baka èn langa en libi fu koloku sondro fu sani skotu dati — sondro fu kba. — Teki gersi nanga Preykiman 3:10-13.
Fruwakti fu têgo libi
13. Sortu fruwakti na fosi libisma ben abi, èn fu san-ede wi kan taki dati?
13 Sondro kba? Fa disi ben de gi na volmaakti libisma pikinmoro wan prakseri di no de fu bribi! Ma fu san-ede? En Mekiman no ben abi na prakseri kweti kweti fu figi na dyari fu Eden disi di meki na wan meysterlek fasi. Fu san-ede a ben sa musu pori en eygi wroko, efu dati ben de so bun èn na so wan tumusi moy fasi ben sori na man di a man fu meki nyun sani di de moy èn aparti? A de wan logika sani taki a no ben de na ini en prakseri kweti kweti fu handri so (Yesaya 45:18). En fu di ala ten baka sorgu nanga prakseri ben musu gi na a kofarlek moy dyari disi, meki wan gronman nanga sorguman so leki na libisma Adam ben de fanowdu. Èn efu na libisma di ben sa sorgu fu en, noyti ben sa nyan fu na froktu fu na bon „fu sabi bun nanga ogri” di Gado ben tapu en fu nyan, dan a no ben sa dede noyti. Na volmaakti libisma ben sa kan libi fu têgo!
14. Fa Adam ben kan prisiri na ini têgo libi na ini wan paradeysi?
14 Têgo libi na ini a paradeysidyari fu Eden ben de na fruwakti fu Adam! Fu têgo a ben sa kan nyanbun fu na libi, efu na wan volmaakti fasi a ben tan gi yesi na en Mekiman èn noyti ben sa nyan fu na froktu di na Mekiman fu libisma ben tapu en fu nyan. A ben de En winsi taki na volmaakti libisma ben tan gi yesi èn ben tan na libi fu têgo. Fu tapu en fu nyan fu na froktu fu „na bon fu sabi bun nanga ogri” no ben de wan sani san ben tyari na dede kon. A ben de soso wan tesi tapu na volmaakti gi di libisma ben musu gi yesi na en Tta. A ben gi libisma wan okasi fu buweysi en lobi gi Gado, en Mekiman.
15. Fu san-ede Adam ben kan luku go a fesi na wan tumusi moy tamara, pe furu bun sani ben e wakti en fu a sey fu en Mekiman?
15 Nanga ini en ati na satisfaksi taki a no ben du kon so maar nomo ma ben abi wan heymel Tta, ala di en frustan ben kon krin nanga a frustan di a ben kon frustan na marki di a abi na ini na libi, nanga têgo libi na en fesi na ini wan paradeysi, meki na tamara ben luku gi na libisma tumusi moy. A ben nyan fu den bon di ben bun leki nnyan èn ben tan farawe fu „na bon fu sabi bun nanga ogri”. A ben wani sabi fu en Mekiman san ben bun. Wroko — no fu wan pori wan ma di ben de na ini a wroko fu na dyari fu Eden ben bun, èn na volmaakti libisma ben e wroko.
A no ben firi na fruplekti fu tyari sani kon a krin
16-18. Sortu so kari kibritori Adam no ben abi fu lusu, èn fu san-ede?
16 Na dey ben meki presi gi na neti di na bigi heymel faya fu dey di a ben kan si e waka psa na a heymel, ben dongo. A ben kon dungru, neti, èn a ben kan si munkenki now. Disi no ben furu en nanga wan firi fu frede; a ben de a moro pikinwan fu den tu bigi heymel faya, di ben basi na neti (Genesis 1:14-18). Kande seyker a ben de so taki faya-woron ben e frey lontu na ini a dyari, e leti èn e kiri a faya fu den leki pikin lanpu.
17 Di neti ben kon èn a ben kon dungru, a ben firi na fanowdu fu sribi neleki den meti di ben de lontu en. Di a ben wiki wan firi fu angri ben kon na en èn a ben nyan nanga prisiri fu den froktubon di a ben kisi pasi fu nyan èn a ben nyan switi fu taki en so fu a nnyan fu en.
18 Nanga nyun krakti èn nanga kowru-ati fu na netirostu a ben poti en prakseri tapu a wroko fu na dey. Ala di a ben si ala na grun lontu en, a no ben abi a prakseri taki a ben musu dukrun go na ini a kibritori dati fu san dusun dusun yari a baka sma ben sa kari fowtowsenteyse, na raytori disi fu na wroko di na grun klorustof fu prani na chorofyl fu den, e wroko fu kobroyki na krakti fu na leti fu a son fu meki, nnyan gi libisma nanga meti èn na a srefi ten e teki na ini den na kooldioxide di libisma nanga meti bro go na dorosey èn e gi zuurstof baka di den kan hari kon na inisey. Wan libisma ben sa kan kari en wan kibritori, ma a no ben de fanowdu gi Adam fu lusu a tori disi. A ben de wan wondru fu na Mekiman fu libisma. A ben frustan en, èn a ben meki a wroko gi a bun fu na libi fu meti nanga libisma na grontapu. Fu dati-ede meki na sabi di a ben sabi taki Gado, na Mekiman, ben meki sani gro, ben de nofo gi na volmaakti frustan fu na fosi libisma, èn na wroko di libisma ben kisi fu Gado ben de na ini a sorgu gi den sortu fu libi disi fu den prani di ben e gro na ini a dyari fu Eden. — Luku Genesis 1:12.
A ben de en wwan — ma a no ben de sondro prisiri
19. San Adam no ben du ala di a ben frustan taki a ben de en wwan, sondro wan tra sma so leki en na grontapu?
19 Na skoro di libisma ben kisi fu en heymel Tta no ben kon na wan kba. Libisma ben sorgu gi na dyari fu Eden sondro wan tra sma so leki en na grontapu fu moksi en srefi na en na ini na wroko ofu fu yepi en. Fu so fara leki a ben go fu en sortu, na libisma sortu, a ben de en wwan. A no ben bigin nanga a suku fu wan sma di ben gersi en, so taki a ben abi konpani na grontapu. A no ben aksi Gado, en heymel Tta, fu gi en wan brada ofu aan sisa. A de di a ben de en wwan leki libisma no ben meki te fu kba a ben kon law na ini en ede èn a no ben puru a prisiri fu en na ini en wroko èn ini en libi. A ben abi wan konpe na ini Gado. — Teki gersi nanga Psalm 27:4.
20. (a) San ben de na heymarki fu a prisiri fu Adam? (b) Fu san-ede na go doro fu na libifasi disi no ben sa wani taki wan weri-ede tranga wroko gi Adam? (c) San na tra artikel sa taki fu en?
20 Adam ben sabi taki en heymel Tta ben kon luku fa a de nanga en nanga en wroko. A heymarki fu na prisiri fu en de taki a ben e prisi en Gado nanga Mekiman, di den tumusi moy eygifasi fu en ben kon a krin na ini ala moy wroko di a meki na ala sey lontu libisma. (Teki gersi nanga Openbaring 15:3.) Go doro nanga a fasi disi fu libi, no ben sa de wan fruferi tranga wroko èn so srefi tu a no ben o de wan fruferi aladey sani gi na volmaakti libisma disi di ben de na ini balansi èn di ben kan taki nanga en Gado. En Gado ben poti tumusi moy wroko gi Adam na ini na ten di ben e kon, kofarlek switi wroko ben sa gi en bigi satisfaksi nanga bigi prisiri. Na tra artikel sa fruteri moro fu den blesi nanga fruwakti di Adam ben kisi na ini a paradeysi fu en lobi Mekiman.
[Futuwortu]
a Disi na a wortu na in na orsyi tongo fu na tori na ini na Santa Buku fa Gado meki sani. — Genesis 1:26, Nyun-Grontapuvertaling, Stukabeybri, futuwortu.
b Na profeyti Moses, di ben skrifi den tori na ini a buku Genesis na ini a di fu tina siksi yarihondro bifo na gewone teri, ben gi tra bodoy fu na liba disi na ini Eden, akruderi na sabi fu den dey fu en:
„Na nen fu na fosiwan na Pison; disi e gi watra na a heri kondre Havila pe na gowtu de. En na gowtu fu na kondre dati bun. Drape so srefi na bdelliumbusi-kandra èn na onyxston de. En na nen fu na di fu tu liba na Gihon; disi e gi watra na a heri kondre Kus. En na nen fu na di fu dri liba na Hidekkel; disi e waka na owstusey fu Asiriya. Èn na di fu fo liba na a Eufrat.” — Genesis 2:11-14.
San yu e piki tapu disi?
◻ Fu san-ede na kon di Adam ben kon na libi no ben de langa wan raytori gi en?
◻ Sortu wroko Gado ben gi Adam fu du, èn fa a musu ben du tapu disi?
◻ Sortu fruwakti na volmaakti libisma ben abi èn fu san-ede?
◻ Fu san-ede Adam no ben meki en wan wroko fu en libi fu lusu fansortu kibritori?
◻ Fu san-ede na de di Adam ben de en wwan no ben meki a libi de sondro prisiri?
[Sma di abi a reti fu a prenki na tapu bladzijde 16]
NASA photo