PISI 14

Gado e taki nanga yepi fu en profeiti

Yehovah e seni profeiti fu tyari boskopu di abi fu du nanga den krutubosroiti fu en, nanga a tru anbegi èn nanga a howpu taki a Mesias o kon

NA A pisi ten fu den kownu fu Israel nanga Yuda, wan spesrutu grupu fu man ben tyari boskopu fu Gado. Den man disi ben de profeiti. Den man disi ben abi wan tranga bribi èn den ben abi deki-ati fu fruteri sma den sani di Gado ben taki. Luku fo prenspari sani fu san den profeiti fu Gado ben taki.

1. A pori fu Yerusalem. Langa ten na fesi, den profeiti fu Gado bigin warskow sma taki Yerusalem ben o kisi pori, èn taki sma no ben o libi drape. Spesrutu den profeiti Yesaya nanga Yeremia ben taki fu dati. Den ben sori krin fu san ede Gado ben ati bron nanga den sma fu a foto. Aladi den ben taki dati den ben teki presi gi Yehovah, toku den ben teki prati na falsi anbegi, den ben du kruka sani, èn den ben du ogri.—2 Kownu 21:10-15; Yesaya 3:1-8, 16-26; Yeremia 2:1–3:13.

2. A tru anbegi e seti kon bun baka. Baka di a pipel fu Gado ben de 70 yari na ini katibo na Babilon, den ben o kon fri. Den ben o drai go baka na a kondre fu den èn den ben o bow a tempel fu Yehovah baka na ini Yerusalem (Yeremia 46:27; Amos 9:13-15). Sowan 200 yari na fesi, Yesaya ben kari a nen fu a sma di ben o wini Babilon èn di ben o meki a pipel fu Gado seti a tru anbegi kon bun baka. A sma dati ben de Sirus. Yesaya ben taki finifini fu a spesrutu fasi fa Sirus ben o teki a foto abra.—Yesaya 44:24–45:3.

Den Dyu di ben de na ini katibo na ini Babilon e drai go baka na Yerusalem

3. A kon fu a Mesias èn den sani di a ondrofeni. A Mesias ben o gebore na ini a foto Betlehem (Mika 5:2). A ben o abi sakafasi èn a ben o kon na ini Yerusalem na tapu wan buriki (Sakaria 9:9). Aladi a ben o abi switifasi, toku sma no ben o lobi en, èn den no ben o poti bribi na ini en (Yesaya 42:1-3; 53:1, 3). A ben o dede na wan ogri-ati fasi. Disi ben o de a kaba fu en libi fu ala ten? Nôno, bika na ofrandi fu en ben o meki taki furu sma kisi pardon fu den sondu (Yesaya 53:4, 5, 9-12). Dati ben kan pasa soso te a ben o kisi wan opobaka.

4. Te a Mesias o tiri grontapu. Sondu libisma no man tiri densrefi na wan fasi di e tyari vrede kon, ma Bijbel e kari a Mesias Kownu, a Granman fu Vrede (Yesaya 9:6, 7; Yeremia 10:23). Na ondro a tiri fu en, ala libisma o libi na ini vrede nanga makandra èn srefi nanga ala den meti (Yesaya 11:3-7). Siki no o de moro (Yesaya 33:24). Srefi dede no o de noiti moro (Yesaya 25:8). Na a ten te a Mesias e tiri, sma di dede o kisi wan opobaka fu libi na grontapu.—Danièl 12:13.

—Den tori disi teki puru fu den buku Yesaya, Yeremia, Danièl, Amos, Mika, nanga Sakaria.