Rai di abi fu du nanga bribi, fa wi musu tyari wisrefi, èn lobi

YAKOBUS nanga Yudas ben de afubrada fu Yesus. Petrus nanga Yohanes ben de tu fu den 12 apostel fu Yesus. Ala nanga ala, den fo man dati skrifi seibi brifi di de na ini den Kresten Griki Buku fu Bijbel. Ibriwan fu den brifi abi a nen fu a sma di skrifi en. Na Gado meki den skrifi den rai disi na ini den brifi. Den rai disi musu yepi Kresten fu tai hori na Yehovah èn fu tan horibaka gi Gado Kownukondre.

Kresten musu sori bribi. A no nofo fu taki nomo dati wi abi bribi. Wan sma di abi trutru bribi e du wan sani. Yakobus e skrifi: „Fu tru, . . . bribi sondro wroko dede” (Yakobus 2:26). Efu wi e sori bribi te wi e kisi tesi, dan dati o meki taki wi horidoro. Efu wan Kresten wani du dati, dan a musu aksi Gado koni èn a musu abi na overtoigi taki Gado o gi en a koni dati tu. Te wi e horidoro, dan Gado sa feni wi bun (Yakobus 1:2-6, 12). Te wan anbegiman e tan sori bribi èn a e tan gi yesi na Gado awinsi san e pasa, dan Yehovah Gado sa yepi en. Yakobus e taki: „Kon krosibei na Gado, èn a sa kon krosibei na unu.”​—Yakobus 4:8.

A bribi fu wan Kresten musu tranga nofo fu man yepi en fu kakafutu gi tesi èn gi sani di kan meki a tyari ensrefi na wan fasi di no fiti. Den sma na ini a ten fu Yudas ben e tyari densrefi na wan fasi di no fiti kwetikweti, èn fu dati ede Yudas gi den tra bribiman a deki-ati „fu feti tranga gi a Kresten bribi”.​—Yudas 3.

Kresten musu tan tyari densrefi na wan krin fasi. Yehovah e fruwakti taki den anbegiman fu en de santa, dati wani taki dati den musu de krin na ala fasi. Petrus e skrifi: „Unu musu kon santa tu na ini ala san unu e du, bika Gado Buku taki: ’Un musu de santa, bika mi [Yehovah] santa’” (1 Petrus 1:15, 16). Kresten abi wan moi eksempre di den kan teki. Petrus e taki: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Aladi Kresten kan nyan pina, fu di den e hori densrefi na den markitiki fu Gado, toku den e tan abi „wan bun konsensi” (1 Petrus 3:16, 17). Petrus e gi Kresten a deki-ati fu tyari densrefi na wan santa fasi èn fu du sani di e sori taki den e dini Gado. Na a srefi ten den e wakti a krutudei fu Gado èn a nyun grontapu pe „retidu o tan”.​—2 Petrus 3:11-13.

Kresten musu sori lobi. Yohanes skrifi: „Gado na lobi.” Na apostel e sori taki Gado sori trutru lobi, di a seni Yesus leki wan „ofrandi di e tapu den sondu fu wi”. San Kresten musu du fu dati ede? Yohanes e tyari kon na krin: „Lobiwan, efu disi na fa Gado lobi wi, dan wisrefi de fruplekti fu lobi makandra tu” (1 Yohanes 4:8-11). Wan fasi fa wi kan sori a lobi disi, na te wi e gi wi brada nanga sisa wan switikon.​—3 Yohanes 5-8.

Ma fa den anbegiman fu Yehovah kan sori taki den lobi en? Yohanes e piki: „Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yohanes 5:3; 2 Yohanes 6). Sobun, den sma di e gi yesi na Gado e kisi a dyaranti taki Gado o tan lobi den, èn a pramisi den „têgo libi”.​—Yudas 21.

​—Den tori disi teki puru fu Yakobus; 1 Petrus; 2 Petrus; 1 Yohanes; 2 Yohanes; 3 Yohanes; Yudas.